Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ina-ama, tolanoo, ka'a-fa'di ngala lemin! Au sanga afa'da emi, au dede'a nasala'e nga de, so'ba mamanene su'di kana!"

² Lelek fo hataholi sila la lamanene Paulus kokolak ninik dede'a Ibrani boema, ta lahahala so'on. Boema Paulus kokolak nakandoo nae,

³ "Au hataholi Yahudi, bongi au neme Tarsus nai nusa Kilikia, tehu au amatua nai Yerusalem, de mese matuaina esa na'de Gamaliel, nanoli lutu-lutuk au, Musa fe ita bei ba'ikai nala, hoholo-lalane kala. Sama leo tolano-tolanook fo faik ia manai ia la, au boeo puse nga titi te'e-te'e neu Manetualain.

⁴ Au tunindeni hataholi mana tunga nanoli beuk ndia de nalosa mates. Basa-basas lala'ena, nau touk do inak boe, au ho'u alas fo au taos leo bui dale leu.

⁵ Imam matuaina ma Mana Maketu-Mala'di agama matuaina basa-basas sakasii, au ta pepeko fa. Nana sila nde fe au susula koasa fo au u leo hataholi Yahudi manai Damsi kala u. No susula koasa ndia de au bole ho'u hataholi kamahehelek manai naa la, fo daenga au os leo Yerusalem mai fo hukus."

⁶ Paulus tuis nae leo ia, "Lelek fo au bei nai au leleo-lala'o nga dalek, fo au sanga losa Damsik nde ndia so. Ndia te le'dohana so, boema no kaiboik, mangale'dok esa tane na seli, nandela neme lalai mai de ana okofeo na au.

⁷ Tutika au bala u dae, boema au amanene halak esa nafa'da au nae, 'Saulus, Saulus! Tao le'e de, o tunindeni Au?'

⁸ Boema au atanen ae, 'See O Tuan?' Halak ndia nataa nae, 'Au nde Yesus, hataholi Nazaret ndia, fo o tunindeni ka.'

⁹ Hataholi mana la'ok sama-sama lo au a, lita mangale'dok ndia boe, tehu ta lamanene halak mana kokolak no au ndia fa.

¹⁰ Boema au atane selu kana ae, 'Au muse tao leo beek Lamatuak?' Boema Lamatua ka nataa nae, 'Fo'a leona, mu leo kota Damsi ka dalek mu. Nai naa, besa ka neukose o bubuluk basa hata fo Manetualain sanga fe o tao-no'in.'

¹¹ Au da'di pokek, nana ndelas ndia sa'a na. De au nonoo ngala lalala'o au leo kota Damsi ka dalek u.

¹² Touk esa na'de Ananias, ana leo nai ndia. Hataholi ndia hataholi malalao-malalafuk, ma ana tunga Musa hoholo-lalanen no matetuk. Basa hataholi Yahudi mana leo nai Damsi ka ala fe ha'da-holomata neun.

¹³ Neu donge au boema napadeik neu au boboa nga de nae, 'Tolanoo Saulus! Ela leo bee na o mita seluk leona!' Boema no hatematak ndia boe, au botik au langa nga te au itan so.

¹⁴ Basa boema nafa'da au nae, 'Ita bei ba'ikai nala Manetualai na hele basa o fo daenga o bubuluk hihii-nanaun, ma o mita Yesus fo Manetualain Atan mana tao-no'i Manetualain hihii-nanau na, boema Manetualain nau o mamanene matam Yesus hala na.

¹⁵ Nukose o da'di sakasii soaneu mu tui-benga neu basa hataholi lala'ena, basa hata fo o mitan ma o mamanenen ndia.

¹⁶ Besak ia boso boe mahani mala doo ka bai. Fo'a fo salani o leona. Malo neu Lamatua ka fo Ana se'i-po'i o meme o sala-singo mala mai.'"

¹⁷ "Au fali leo Yerusalem u, de lelek fo au bei hule-haladoi eme Manetualain Uman dale, boema Manetualain Dula Dale na koasa na au.

¹⁸ Au ita Lamatua ka boema nafa'da au nae, 'La'oela Yerusalem lai-lai, te hataholi manai ia la ta nau sipok o tutui-bebengam la'eneu Au fa.'

¹⁹ Boema au ae, 'Lamatuak, ala bubuluk matalolole au u leo uma mamaso kala dalek u, fo au ho'us ma au fepa-li'u hataholi mana lamahele leu O a.

²⁰ Leondiak boe, lelek O sakasiim Stefanus fo nanataonisa ka, au nai ndia boe, de au sipok kanisak ndia. Lena-lenak, au nde anea hataholi mana taolisa Stefanu sa bualo'a nala.'

²¹ Tehu Lamatua ka nafa'da seluk au nae, 'Ka'da mu leona, nana Au sanga adenu o mu leo mamana dook mu, fo nde hataholi ta Yahudi la.'"

²² Hataholi la bei lamanene lahele Paulus kokolak, tehu neu Paulus hala mate'e na boema, ala eki lapane'e ma lae, "Ka'da taomisa hataholi matak leondia ka. Te ta nandaa naso'da so'on!"

²³ Ala eki ma ala ngganggafu ba'du manalu nala de, daesopu ka lapu leo lain neu.

²⁴ Boema malanga solda'du Roma nadenu lo Paulus leo solda'du la kota musu na neu, fo daenga ala palisa kana nai ndia no balakaik fo ala bubuluk hu beek de, hataholi Yahudi la eki lae leo ndia.

²⁵ Tehu nai lelek ala pa'a Paulus fo ala sanga filu kana boema, Paulus nafa'da malanga solda'du matuaina fo napadeik nai ndia nae, "Ade bole filuk nusa Roma hataholin esa, leomae beita palisak dede'a na fa do?"

²⁶ Malanga solda'du matuaina ndia namanene dede'ak ndia boema, neu leo malanga solda'du neu de nafa'dan nae, "Ade ama sanga tao beek ia? Hataholi ia nusa Roma laun ndia!"

²⁷ Boema malanga solda'du neu leo Paulus neu de natanen nae, "So'ba mafa'da su'dik au, ade nusa Roma laun o do!" Boema Paulus nae, "Hei, nusa Roma laun au."

²⁸ Boema malanga solda'du nafa'da selu kana nae, "Au bae doik ta ba'ihanak fa, besa ka au da'di nusa Roma laun!" Boema Paulus nae, "Tehu bongi au te nusa Roma laun au so."

²⁹ No besak ndia boe, basa solda'du mana palisak Paulus dede'a na lakadedeak beno'u, ma malanga solda'du ana bii, nana ana pa'a basa Paulus ninik namosina so, te se'kona nusa Roma laun Paulus.

³⁰ Malanga solda'du Roma ndia nahiik nanseli, ana bubuluk hu beek de hataholi Yahudi la fe salak neu Paulus. Hu ndia de balahaa boema, nalo na malanga ima mala ma Mana Maketu-Mala'di Agama Matua fo lakabubua. Boema ala se'iheni namosina fo ala pa'an neu Paulus lima na, de basa boema lon neu nataa sila basa-basas.

Kisah Para Rasul

Video Kisah Para Rasul 22

Ikuti Kami:

KONTAK | PARTISIPASI | DONASI