Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nauli Paulu: "Uma-uma, halalu-halalu! Nipehadingina wongkoya, lawi ina kuuliangaakau notongku."

² Karahadina tauna bosa Paulu mololita i lalu basa Yahudi, mandii mpuumohe. Napaliliumi Paulu lolitana, nauli:

³ "Iko ide to Yahudi. Boea karapoanakangku, Tarsus i tampo Kilikia, agayana hangko anangkoi manina maidana inde i Yerusale. Mosikolana inde, napaguru maroana hadua guru au rabila mpuu, Gamaliel hangana. Ia mopaturo mpuuna ope-ope atura au nawei Musa i toiyorunta hangkoya. Madota mpuuna mampeulai ope-ope aturana Pue Ala, nodo wori ikamu.

⁴ Hangkoya kupopeahi-ahihe tauna au mampeulai Paturona Yesu. Arahe au kupapate. Ara wori bosa tauna au kuhaka hai au kutarunggu, maroa tobalilo maroa towawine.

⁵ Tadulako Menomba Mahile hai ope-ope tadulako agama peisa mopakanoto katouna lolitangku ide. Barana modongko, lawi hangkoya ihirami au moweina sura kuasa au mopaliuna lao i halalunta to Yahudi i kota Damsik. Tunggaiaku lao i Damsik, bona mohakana to Sarani au ara inditi, hai kuantihe i Yerusale bona rahuku."

⁶ "Tanga pualo, i lalu polumaongku iti, hungkumongkai i kota Damsik. Unga pea ara au mewangka hangko i langi au motolelikina.

⁷ Madungkana i tampo, hai mohadina hambua wotu au manguli: 'Saulu, Saulu, moapa hai nupopeahi-ahiNa?'

⁸ Kupekune: 'HemaKo Pue?' Nahanaina: 'Ikomi Yesu to Nasare au nupopeahi-ahi.'

⁹ Rangangku moita worihe au mewangka iti, agayana barahe moisa apa au nauliangaana wotu iti.

¹⁰ Roo indo, kuuli: 'Pue, apa au hangangaa kubabehi?' Nahanaina Pue: 'Mearomoko hai liliuko mesua i lalu kota Damsik. Indolou ina rapahaweako ope-ope au natuduako Pue Ala bona nubabehi.'

¹¹ Anti pewangka iti inona, makaindimi petotokingku. Ido hai raninina rangangku hawe i kota Damsik.

¹² I Damsik, ara hadua tobalilo, Ananias hangana. Ananias iti, tauna manoto, hai maroho peulana i Aturana Musa. Ia rabila ope-ope to Yahudi au maida i Damsik.

¹³ Maimi Ananias meangka i holangku, nauli: 'Halalungku Saulu, meita hulemoko!' I tempo iti pea womi, meita mpuumona, hai kuitami Ananias.

¹⁴ Roo indo, nauliangaa mbulina: 'Pue Ala au rapenombai toiyorunta hangkoya mopileimoko bona nuisa apa peundeaNa. Napileiko bona nuita Yesu, Hawina Pue Ala au manoto, hai bona nuhadi lolitaNa.

¹⁵ Oyomi au ina mewali sabiNa au mopahaweahe ope-ope tauna apa au nuita hai au nuhadimi.

¹⁶ Mewali, apa mani au nupegia? Meangkamoko hai laoko rariu. Mekakaemoko i Pue Yesu bona dosamu Naampungi.'"

¹⁷ "Mewali, hangko inditi, mesulemona lao i Yerusale, hai tangangku mekakae i Souna Pue Ala, kuita hambua pampetudungia.

¹⁸ Kuita Pue Yesu mouliangaana: 'Holigamoko padu hangko i Yerusale, lawi ampu boea Yerusale barahe ina mampoinalai kaKuposabimu.'

¹⁹ Kuhanai: 'Pue, hangangaa ina radokona. Lawi tauna inde moisa mpuu babehiangku hangkoya. Moisahe noumba kalaongku i sou penombaa mohaka hai mopapahaihe tauna au mepoinalai Irio.

²⁰ Nodo wori, i tempona sabiMu Setepanu rapapate, ara worina indo hai kupokatana karapapatena; ikomi au mokampai hampinda tauna au mopapate.'

²¹ Roo indo, Pue mouliangaa mbulina: 'Hangangaa meangkako, lawi Kutuduko lao i tampo au karao, i tauna au barahe to Yahudi.'"

²² Mandiimohe tauna bosa mampehadingi Paulu mololita. Agayana kanaulina ina lao i tauna au barahe to Yahudi, monganga-ngangamohe mopakoi Paulu, rauli masisimbuku: "Papate peami! Barapi hintoto tuwo!"

²³ I pepakoinda iti, motendemohe badunda hai mohawukahe awu anti kamasodonda.

²⁴ Ido hai tadulako surodado iti motudumi surodadona moanti Paulu mesua i sounda surodado, bona rapapahai hai raparesa bona raisa pongkana apa au rakahihia to Yahudi.

²⁵ Hawemohe inditi, Paulu ratakami i arii bona rapapahai. Ido hai ia mololita i hadua tadulako surodado au ara i holana, nauli: "Peisa pae hadua to Roma rapapahai ane bara mani raparesa hai rabotusi kara-karana?"

²⁶ Kanahadina tadulako iti lolitana, laomi i toiwongkona, nauli: "Tua, moapari hai nutudungkai mopapahai tauna iti? Lawi tauna iti to Roma!"

²⁷ Roo indo, tadulako surodado iti lao i Paulu, napekune: "Nuuliangaana, ba tou mpuu to Romako?" Nahanai Paulu: "Tou mpuu."

²⁸ Nauli tadulako surodado iti: "Masuli kakubayarina i topoparenta, bona mewalina to Roma." Nahanai Paulu: "Agayana iko ide, mewalina to Roma hangko i karapoanakangku."

²⁹ Roo indo, surodado au ina moparesa Paulu mousulimohe, hai langa worimi tadulako surodado iti. Lawi iami au motudu tauna motaka Paulu, agayana i tempo iti bara naisa katoRomana.

³⁰ Tadulako surodado iti mampeinao moisa ba apa mpuu salana Paulu pane rasalai to Yahudi. Ido hai kahalona, ia mokakiohe ope-ope kapala-kapala tadulako menomba hai tadulako agama Yahudi au ntanina bona teruhuhe. Roo indo, Paulu rakabahami hangko i tarunggu hai raanti lao rapombelindoa.

Kisah Para Rasul

Video Kisah Para Rasul 22

Ikuti Kami:

KONTAK | PARTISIPASI | DONASI