Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "Bapak-bapak rik Puari-puari sunyinni! Nyak haga ngemukako pembelaanku jama niku. Cuba dengiko!"

² Waktu tian ngedengi Paulus cawa delom bahasa Ibrani, tian jadi lebih tenang lagi. Maka Paulus nerusko keteranganni.

³ "Nyak jelma Yahudi," ani Paulus, "nyak laher di Tarsus di negeri Kilikia, kidang nyak dibalakko di dija di Yerusalem rik dididik cermat ulih guru besar Gamaliel delom hukum sai dikeniko Musa jama nenek muyang ram. Gegoh injuk Puari-puari sunyinni di dija rani inji, nyak pun giat nihan untuk Allah.

⁴ Nyak nganiaya sampai mati jelma-jelma sai nutuk ajaran ampai udi. Tian sunyinni, bakas maupun bebai, kutangkok rik kukurukko delom bui.

⁵ Imam agung tenggalan rik seluruh Mahkamah Agama dapok ngeni kesaksian bahwa nyak mak bebuhung. Mani tian anodo sai radu ngeniko jama nyak surat pengantar sai ditujuko jama ulun-ulun Yahudi di Damsyik. Jama surat udi nyak ngasi nangkok di dudi ulun-ulun sai percaya jama ajaran ano, rik ngusung tian mik Yerusalem untuk dihukum."

⁶ "Waktu nyak sedang delom lapahku rik hamper sampai di Damsyik, waktu tengah rani, suatu cahaya sai terang nihan tiba-tiba memancar jak langit di sekelilingku.

⁷ Nyak tumbak mik tanoh raduni kudengi suatu suara cawa jama nyak, 'Saulus, Saulus! Mengapi niku nganiaya Nyak?'

⁸ Raduni nyak betanya, 'Sapa Niku, Tuan?' 'Nyakdo Isa ulun Nazaret udi sai niku aniaya,' jawab-Ni.

⁹ Jelma-jelma sai wat di dudi jejama jama nyak ngeliak cahaya udi, kidang tian mak ngedengi suara sai cawa jama nyak.

¹⁰ Raduni nyak betanya muneh, 'Nyak harus bebuat api, Tuhan?' Tuhan ngejawab, 'Minjakdo rik kuruk mik Damsyik. Di dudi kanah niku haga dikeni pandai mengenai sunyinni sai Allah mirak niku lakuko.'

¹¹ Nyak jadi buta mani cahaya sai nyilauko udi. Jadi kantik-kantikku nuntun nyak kuruk Damsyik.

¹² Di dudi wat sai jelma gelarni Ananias. Ia jelma sai saleh rik taat ngejalanko hukum Musa. Sunyinni ulun Yahudi sai tinggal di Damsyik temon-temon ngehormati ia.

¹³ Ia ratong napol nyak, raduni cecok di kebelahku rik cawa, 'Puari Saulus, hagani niku ngeliak luot!' Saat seno juga nyak ngiwakko pudakku, raduni ngeliak ia.

¹⁴ Kak raduni ia cawa jama nyak, 'Allah nenek muyang ram radu milih niku in niku pandai kehaga-Ni, rik ngeliak Isa, Jelma Sai Ngebantu Allah sai ngelakuko kehaga Allah rik ngedengi suara Isa tenggalan.

¹⁵ Niku haga jadi saksi untuk ngabarko jama sunyinni jelma api sai niku radu liak rik dengi.

¹⁶ Tano dang lagi nunggu saka-saka. Minjakdo rik keniko dirimu dibaptis. Beserudo jama Tuhan in niku dibebasko jak dusa-dusamu.'"

¹⁷ "Nyak muloh mik Yerusalem, rik waktu nyak sedang bedua di Lamban Ibadah, nyak dikuasai ulih Ruh Allah.

¹⁸ Nyak ngeliak Tuhan; Ia cawa jama nyak, 'Geluk tinggalko Yerusalem, mani ulun-ulun di dija mak haga nerima kesaksianmu tentang Nyak.'

¹⁹ Nyak cawa, 'Tuhan, tian pandai nihan bahwa nyak radu kuruk mik lamban-lamban ibadah untuk nangkok tian rik mukul ulun-ulun sai percaya jama Niku.

²⁰ Injuk reno muneh waktu saksi-saksi-Mu Stefanus dibunuh mati, nyak tenggalan wat di dudi rik setuju pembunuhan udi. Malah nyakdo sai nunggu kawai jelma-jelma sai ngebunuh ia.'

²¹ Kidang Tuhan cawa luot jama nyak, 'Mikdo, mani Nyak haga ngayun niku mik di rang sai jaoh mik jama ulun-ulun lain Yahudi.'"

²² Ulun-ulun masih terus ngedengi Paulus cawa, kidang di kalimat sai paling akher ano tian mekik keras-keras, "Bunuh gaoh jelma sai injuk seno. Ia mak patut hurik!"

²³ Sambil mekik, tian ngibasko jubah tian, rik ngehamborko harbuk mik udara.

²⁴ Maka komandan pasukan Roma udi ngayun Paulus diusung mik markas in ia diperiksa di dudi pakai kekerasan untuk nyepok pandai api sebab ulun-ulun Yahudi mekik injuk reno tehadap ia.

²⁵ Kidang waktu Paulus radu diikok untuk dilecut, Paulus cawa jama perwira sai cecok di dudi, "Api ngasi ngelecut jelma warga kerajaan Roma semakkung ia diadili?"

²⁶ Ngedengi ano, perwira udi mik jama komandan pasukan rik cawa, "Api inji sai haga Bapak lakuko? Jelma inji warga negara Roma!"

²⁷ Maka komandan udi mik jama Paulus rik betanya, "Cuba keni pandai, api niku warga negara Roma!" "Ya," ani Paulus, "nyak warga negara Roma."

²⁸ Komandan udi cawa muneh, "Nyak jadi warga negara Roma jama ngebayar lamon nihan!" Paulus ngejawab, "Kidang nyak laher sebagai warga negara Roma."

²⁹ Waktu seno juga anggota-anggota tentera sai haga meriksa Paulus udi mundor rik komandan udi pun jadi rabai mani ia radu ngikok Paulus, padahal Paulus warga negara Roma.

³⁰ Komandan pasukan Roma udi mirak nihan pandai api setemonni sai nyebabko ulun-ulun Yahudi nyalahko Paulus. Ulihni seno jemohni ia ngurau imam-imam kepala rik Mahkamah Agama bekumpul. Raduni Paulus dilepasko jak ikokni, kak raduni diusung ngehadap tian sunyin.

Kisah Para Rasul

Video Kisah Para Rasul 22

Ikuti Kami:

KONTAK | PARTISIPASI | DONASI