Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ngomi mimasilo-loa 'iduanga 'o Efesusino ma jamati ma balu-balusika, 'asa de miotagi. Ge'enaka de miosidete kamiogila-gilaka 'o Kos ma tonaikie, de ma bibinie miototarie 'o Rodos ma tonaoka. Ge'enaka de kamiosidetokali 'o Patara ma ba-barenisa.

² 'O Pataraka de miamake 'o ngo'otiri 'imau 'itagi 'o Fenisiasa. So ma rai ngomi ge'enakou mioparene,

³ de miotagi miosidete sigado miamake 'o Siprus ma tonaka mia gubalioka; ma ngomi kamiosidetosi miogila-gila 'o Siriasa. Ngomi mio'uti 'o Tirus ma kotasa, sababu 'o ngo'otiri gee miobare-barene ma gina dua yadokini ge'enaka.

⁴ Ge'enaka ngomi miakililarokasi 'o nyawa yongaku-ngaku 'o Yesusika de mimanoa de de 'ona 'o minggu moi. De 'o Ngomasa 'Itebi-tebini ma manarama so 'o nyawa yongaku-ngaku go'ona widongose 'o Paulusika 'ato 'uwa wotagi 'o Yerusalemude.

⁵ Ma ngaro koge'ena ma salingou miotagiou so miakimada de mia do-dagi miosigila. 'Ona yoodumu de manga weka-wekata, de manga ngowa-ngowaka misi'otaka sigado 'o kota ma dudunika. Doka 'o dowongioka miaika de miobukuku mimalahidoa.

⁶ Ge'ena 'iduanga de miomasilo-loakasi, 'asa de 'o ngo'otirie mioparene de 'ona mita yokokilio manga woaka.

⁷ Ge'ena 'o Tirusoka de miogila-gilali 'o Ptolemaisie. Ge'enaka miakilegakasi 'o nyawa yongaku-ngaku, ma ngale mia tabea miakisitotarokasi de ngomi mimanoa 'o wange moi de de 'ona.

⁸ Ma bibinie de miotagioli so 'o Kaisareaka miaie. Ge'enaka de miaika wimoika wi ronga 'o Filipus, de mimanoa wi woaka. 'Una ge'ena wosiha-habari ma ngale 'o Yesus. 'Unau ge'ena sona gee yatumudiingi 'o Yerusalemuoka yakiiri-iriki ma ngale yoleleani.

⁹ 'Awi ngowaka 'o mosolese yaruata, ma Jo'oungu ma Dutu wakikulakau 'o guata ma ngale yositotara 'o habari ma Jo'oungu ma Dutuno.

¹⁰ Mia wange muruoka naga kadaku, de wositota-totara ma Jo'oungu ma Dutu wi demo wimoi 'o Yudeano woboa wi ronga 'o Agabus.

¹¹ Woboano ngomioka de 'o Paulus wi gorona ma bu-busuku wa'ese. Wa'eseno de wosipusuku wi dou de wi giamino de kawongosekau, "Koneda 'o Ngomasa 'Itebi-tebini 'ingose, ''O gorona ma bu-busuku ma dutu ne'ena dua 'o Yahudioka wipusuku 'isoka kone'ena 'o Yerusalemuoka, de wisisarakani ko 'o Yahudiwa ma nyawaka.'"

¹² Gee mio'isenoka ge'ena, de ngomi de 'o nyawa yongaku-ngaku yoodumu gee 'o Kaisareaka mibaja 'o Paulusika la 'uwau wotagi 'o Yerusalemude.

¹³ Ma 'una wosango, "'Okia ma ngale niokoki'ari kone'ena, 'Esa moi, sigado 'ai singina 'isusa? Sababu ma Jou Yesus, ngoi tomanoakou 'uwa kaitagoko la ngaro 'iso-songene ge'enaka daku."

¹⁴ 'O Paulus kawooluoka so mimaogorokau miosingelo. So ngomi miongose 'ato, "Madaka la ma Jou wi mau 'idadi."

¹⁵ Mia wange muruoka naga ge'enaka 'asa de miomasidiai mia kia sonaa deika miosikaie 'o Yerusalemude.

¹⁶ Nanga 'esa moi 'o Kaisareaka yamuruo naga misi'otaka sigado 'o Manason wi woaka, sababu dua to 'unau wi woaka mimasido-dogumu. 'O Manason ge'ena 'o Siprus ma nyawa, ma do'ingonou wongaku 'o Yesusika.

¹⁷ Gee 'o Yerusalemude miototara, de mia ma-manai ge'enaka gee misibusuku kayomore-morene.

¹⁸ Ma bibinoka 'o Paulus de de ngomi miotagi 'o Yakobusika, miaika 'ena 'o jamati ma balu-balusu mita yoodumu ge'enakau.

¹⁹ 'O Paulus wakitabeakasi 'onaka, 'asa de wakidajarita 'okia sonaa gee ma Jo'oungu ma Dutu wodiaiokau ko 'o Yahudiwa ma nyawaka ma ngekomo 'o Paulus.

²⁰ Yo'isenoka 'o Paulus wi jarita ge'ena de wisiarene ma Jo'oungu ma Dutu. Ge'enaka de kayongosekau 'o Paulusika, "'Esa moi, salingou nanako 'o Yahudioka yocaanokau yongaku 'o Yesusika. 'Ona yoodumu ge'ena yosingou-ngounu ma Jo'oungu ma Dutu wi besesongo gee 'o Musa wositota-totara.

²¹ De ne'ena yogi'isene bari nakidotoko 'o Yahudioka gee yomanoa-noa 'o nyawa ma somoa manga daeraaka, la yamada 'o Musa wi do-dotoko. Ngona nakidongose la manga ngowaka-ngowaka 'uwa yasuna bolo 'uwa yamoteke 'o Yahudioka manga 'adati.

²² Ma 'orasi ne'ena 'o Yahudioka gee yongaku-ngakuokau ma raiokau dua nigi'isene 'ato ngona ne'enaka. So kokia ne'ena?

²³ Yaowa nodomoteke 'okia naga minidongose. Nongoka dau yaruatoka naga yojajiokau ma Jo'oungu ma Dutuka.

²⁴ So tagi naki'asa la de de 'ona niadiai 'o 'adati de 'o 'atorangi ma ngale nia singina niatebini, de ngona namoku manga sewa la manga saeke 'idadi yakulu. Ge'ena dua 'asa de 'o nyawa 'iodumu yanako 'ato 'okia naga gee yogi-gi'isenokau ge'ena ko ma gounguwa, sababu ngona mita nosidagi ma Jo'oungu ma Dutu wi besesongo gee 'o Musa wositota-totara.

²⁵ Ma ko 'o Yahudiokawa gee yongaku-ngakuokau 'o Yesusika, 'onaka miakidusuratokau ma ngale miositotara 'amia butusangi ge'ena la koidadiwa ya'odomo 'o 'inomo 'isisubakau 'o gomanga ma dutuka. Mita koidadiwa ya'odomo 'o 'aunu, bolo 'o haewani gee 'isongene kayawirikiti so ma 'aunu koya'uisuwa; de koidadiwa 'o nyafisuu ma dorou yadiai."

²⁶ So ma bibinoka de 'o Paulus de yaruata go'ona yotagi yadiai 'o 'adati de 'o 'atorangi la manga singina yatebini. Ge'enaka de yowosanga ma Jou wi Woaka yosidemo muruoka dua de 'iduanga manga singina yatebini ge'ena, de muruoka 'asa moi-moi manga su-suba 'o haewani gee yosisuba.

²⁷ Manga singina yatebini ge'ena 'o wange tumudiingino. So gee rekeni 'iduangoka, de 'o Yahudioka yamuruo naga 'o Asiano wimake 'o Paulus ma Jou wi Woaka. Ge'enaka de yosisau-sauku 'o nyawa yoku-kudaika de witagoko.

²⁸ Wi'aoka de yosigaso-gasoko, "Ee 'o Israeloka ma nyawa, nou pomakariwo! Nu'unau gee kiaka naga bato wosidotoko 'o nyawa-nyawaka 'o do-dotoko gee 'inasito-torou 'o Israeloka, 'isito-torou 'o Musa wi do-dotoko, de 'isito-torou ma Jou wi Woa ne'ena. 'Asa de ne'ena ko 'o Yahudiokawa wakisingosaminou ma Jou wi Woaka de yamediri 'o Ngii 'Itebi-tebini ne'ena!"

²⁹ 'Ona koge'ena yongose, sababu 'o Trofimus 'o Efesus ma nyawa gu'una wimakekau 'o kotaka de 'o Paulus, so 'ona yomangano-nganono wi'asakau ma Jou wi Woaka.

³⁰ So ma kotaka ge'ena 'iruahe ka ma moioko, de 'o nyawa yomakokitoomu kayoowa-owara. 'Ona witagoko 'o Paulus de wi'asa wisisupu ma Jou wi Woaka. Kage'ena ma 'orasi de ma Jou wi woa ma ngorana yabenokau.

³¹ Yoru-ruahe gee yomau 'o Paulus wito'omau, de 'o Romaka manga kapita wo'isene 'ato 'o Yerusalemuoka doka 'iruahe ka ma moiku,

³² so ma kapita gu'una waki'ese 'awi solodado yamuruo naga de kayomatai-taiti yomasidatagi de de 'una 'iru-ruahe ma ngiika. 'O nyawa yoku-kudai gee wimakeka 'o solodado ma balusu gu'una de wi solodado yoboa, de yomaogoro 'o Paulus wiribesana.

³³ Ma kapita gu'una waika 'o Paulus witagoko de wosuloko wipusuku. Ge'enaka de ma solodado ma balusu gu'una wosano-sano 'o Paulus ge'ena nagu'una, de 'okia wodiai.

³⁴ Yoku-kudaioka gee munuka yongose koneda, de munuka yongose konedali. Ge'enaka de kairuahe 'ikudai so kowosikanakowau ma titi 'okia sigado 'idadi koge'ena. So wosuloko 'o Paulus wi'asa 'o solodado manga ngiika.

³⁵ Gee 'ona wi'asa ma solodado manga ngiika so sigado ma woa ma nguteka, de yoru-ruahe go'ona kaifoloi yongamo so 'o Paulus 'o solodado kawirimokuou.

³⁶ 'Ona yakisidu-du'uru yoru-ruahe go'ona yosigaso-gasoko, "'Una ne'ena salingou winito'oma!"

³⁷ Wisingosamou 'o solodado manga ngiika, de 'o Paulus kawongosekau ma kapitaka, "Kaidadi? tobicarasi ma eta de de ngona 'Aba?" Ma kapita gu'una wosango, "Etei, so ngona 'o Yunani ma demo kananako?

³⁸ Nako koge'ena, ngona ne'ena ko 'o Mesirinowa wimoi gee ma moi wosiruahe de yoti-tingkai yacaana soata de manga daeka deika wakisiowara yowosanga 'o daeraa 'ika-kakasaka?"

³⁹ 'O Paulus wosango, "Ngoi ne'ena 'o Yahudioka, 'o Tarsusino 'o kota ma amoko 'o Kilikiaka. Tanu noisidabi tobicara 'o nyawa-nyawaka go'ona."

⁴⁰ 'O Paulus wisidabioka wobicara, de woma'okode 'o nguteka de 'o no-nako wakikulakasi de 'awi giama la yomariidi. So 'o nyawa yoodumu yokokiriidoka. Ge'enaka de wobicara 'onaka de 'o Ibranioka manga demo, wongose 'ato,

Kisah Para Rasul

Video Kisah Para Rasul 21

Ikuti Kami:

KONTAK | PARTISIPASI | DONASI