Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob sirang hanami humbani sidea, marlayar ma hanami torus hu Kos, anjaha patarni ai hu Rodus, hunjai hu Patara.
2 Anjaha dob dapot hanami kapal na laho hu Penesia, ai ma imasuki hanami, lanjar marlayar ma hanami.
3 Dob ai ididah hanami ma Pulou Kiprus, ilopusi hanami ma ai hampit sambilounami, anjaha marlayar ma hanami dompak Siria, gabe das ma i Tirus; ai ijai do bongkaron muatan ni kapal ai.
4 Iparayak hanami ma susian ai anjaha marsaran ijai pitu ari dokahni. Marhitei Tonduy in ipalumba sidea do si Paulus, ulang tangkog namin hu Jerusalem.
5 Dob salpu arini hanami ijai, misir ma hanami manoruskon pardalanan. Haganup do sidea manaruhkon hanami hu darat ni huta ai, parinangon age dakdanak. I topi laut ai manrogop do hanami anjaha martonggo.
6 Anjaha dob marjabat tangan, masuk ma hanami hu kapal, anjaha sidea pe mulak ma.
7 Hun Tirus marlayar ma hanami hu Ptolomais; anjaha ijai ma ujung ni parlayarannami; isalami hanami ma hasoman-hasoman ai, anjaha ijai ma hanami marsaran sadari.
8 Patarni ai bingkat ma hanami, anjaha das ma hu Kesarea. Masuk ma hanami hu rumah ni si Pilippus, evangelis ai, ai ma sada humbani na pitu ai, gabe tondok bani ma hanami.
9 Adong ompat boruni, sipanjahai.
10 Sanggah na marsaran ai hanami piga-piga ari ijai, tuad ma hun Judea sada halak, na margoran si Agabus.
11 Ijumpahkon ma hanami, ibuat ma gondit ni si Paulus, anjaha isangkutkon ma ai bani tanganni ampa naheini, lanjar ihatahon ma, “Sonon do simada gondit on sangkuton ni halak Jahudi i Jerusalem, anjaha ondoskononkon hubagas tangan ni sipajuh begu-begu.”
12 Mambogei hata ai, ielek-elek hanami ma rap pakon halak na ijai ai, ase ulang tangkog ia hu Jerusalem.
13 Tapi nini si Paulus ma, “Aha do na binahen nasiam in, tangis mambahen galek uhurhu? Sirsir do ahu sangkuton ronsi matei i Jerusalem halani goran ni Tuhan Jesus.”
14 Halani seng ra ia ojuron, sip ma hanami, nini hanami ma, “Sai saud ma harosuh ni Tuhan in!”
15 Ase dob salpu ari ai, marugas ma hanami, laho tangkog hu Jerusalem.
16 Anjaha dihut do deba susian na hun Kesarea mangkasomani hanami, anjaha ibobai do hanami tondok hubani si Manason, na hun Kiprus, ai ma sada halak na dob dokah gabe susian.
17 Das honsi hanami i Jerusalem, malas do uhur ni sanina-sanina ai manjalo hanami.
18 Anjaha patarni ai laho ma si Paulus rap pakon hanami marayak si Jakobus, anjaha roh do ganup sintua-sintua.
19 Jadi dob ipadas tabini bani sidea, ipajojor ma na binahen ni Naibata bani halak sipajuh begu-begu marhitei horjani.
20 Mambogei ai ipasangap sidea ma Naibata. Dob ai ihatahon sidea ma bani, “Ididah ham do sanina, marribu-ribu do halak Jahudi na dob porsaya, anjaha haganup do sidea mampongutkon titah in.
21 Ibogei sidea, ipodahi ham do halak Jahudi, na i tongah-tongah ni sipajuh begu-begu, ase itadingkon si Musa, anjaha ihatahon ham bani sidea, seng pala be sunaton anak ni sidea atap dalankonon adat-adat in.
22 Ai pe sonaha ma? Tontu ibogei do na dob roh ham.
23 Halani ai bahen ma songon na hinatahonnami on bamu! Adong do bannami ompat halak, na marutang bagah-bagah.
24 Arahkon ma sidea, uras ma dirimu rap pakon sidea, anjaha harugihon ma papangkaskon jambulan ni sidea, gabe botohon ni haganup halak ma, na so tongon do hape barita pasal ham ai, anjaha na dihut do homa ham mangkorjahon titah in.
25 Ia sipajuh begu-begu, na dob gabe porsaya, domma iputuskon hita anjaha na parentahkon, ase ijaga bei dirini dompak galangan bani sisombah-sombahon, daroh, na matei seng sinayat ampa parriah-riahon.”
26 Jadi patarni ai iarahkon si Paulus ma halak ondi, anjaha dob iuras dirini rap pakon sidea, laho ma sidea hu rumah panumbahan, laho patugahkon sadihari marujung panorang pangurason ai, anjaha sadihari padason galangan ni sidea bei.
27 Tapi sanggah na laho marujung sipitu ari ai, ididah halak Jahudi na hun Asia ma ia i rumah panumbahan, jadi ipajobu-jobu sidea ma haganup halak na mabuei ai, itangkap ma ia,
28 lanjar idilo-dilohon, “Nasiam halak Israel, urupi nasiam ma hanami on! On ma halak ia, na mangajar-ajari halak ija-ija pe manlawan bangsanta, ampa titah in ronsi ianan on. Ambahni ai dihut do halak Gorik iarahkon hu rumah panumbahan on, anjaha ibutaki do ianan na pansing on!”
29 Ai ididah sidea do si Tropimus, na hun huta Epesus rap pakonsi i huta ai, gabe iagan na dob iarahkon si Paulus do ia hu rumah panumbahan ai.
30 Jadi lutu ma ganup huta ai, anjaha martumpu ma ganup halak na mabuei ai; itangkap sidea ma si Paulus, isarad ma ia hu darat ni rumah panumbahan ai, anjaha mintor itutup ma sagala labah.
31 Anjaha sanggah na sihol bunuhon ni sidea ia, das ma hata hubani kapiten, na dob lutu do huta ai.
32 Jadi mintor iarahkon ma tentara ampa letnan, laho mandorab sidea; dob ididah sidea kapiten ai ampa tentarani, iparontihon sidea ma mambalbali si Paulus.
33 Laho ma kapiten ai hujai, itangkap ma si Paulus, anjaha ihatahon ma garion ia bani dua gari; ai ipareksa ma atap parja do ia ampa aha do na binahenni.
34 Tapi marsihatahon hatani do na mabuei ai; anjaha halani seng jumpahsi hatorangan na sintong, halani na lutu ai, ihatahon ma boanon ia hu tangsi.
35 Anjaha dob das ia bani andar ai, tentara ai mando mangusungsi, halani parurup ni halak na mabuei ai,
36 ai sai mangihut do halak na mabuei ai, lanjar dilo-dilo, “Bunuh ia!”
37 Sanggah na sihol arahkonon ni sidea ia hubagas tangsi ai, ihatahon ma hubani kapiten ai, “Boi do ahu manluar bamu?” Gabe nini ma, “Ibotoh ho do hape hata Gorik?
38 Sedo ho hape halak Masir ai, na manlutui baru-baru on anjaha na mangarahkon ompat ribu halak gerombolan hu halimisan?”
39 Jadi nini si Paulus ma, “Halak Jahudi do ahu, marasal hun Tarsus na i nagori Silisia, warga kota na tarbarita ai. Hupindo atap na boi do ahu marsahap hubani halak na mabuei in!”
40 Jadi halani ilopas do, jongjong ma si Paulus bani andar ai, anjaha ihilaphon ma tanganni bani halak na mabuei ai. Jadi dob sip bei, marsahap ma ia bani sidea ibagas hata Heber, nini ma,
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA