Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sekam nangguh jama jelma-jelma sai mimpin jemaah jak Efesus udi, raduni ninggalko tian. Raduni sekam belayar langsung mik pulau Kos; rik jemohni sekam sampai di pulau Rodos. Jak udi sekam belayar terus mik pelabuhan Patara.

² Di Patara, sekam ngehalu kapal sai haga mik Fenisia. Maka sekam cakak kapal udi raduni berangkat

³ rik belayar sampai sekam ngeliak pulau Siprus di kebelah kiri sekam; kidang sekam belayar terus nuju Siria. Sekam ngedarak di Tirus, mani di dudi kapal sai sekam tumpang udi haga ngebungkar muatanni.

⁴ Di rang udi sekam mik napol ulun-ulun sai percaya jama Isa, raduni tinggal jama tian selama seminggu. Atas petunjuk jak Ruh Allah tian ngeni petuah jama Paulus in dang mik di Yerusalem.

⁵ Kidang radu bela waktuni untuk sekam tinggal di dudi, sekam ninggalko tian rik nerusko lapahni sekam. Tian sunyinni jejama jama anak inggomni tian ngantakko sekam sampai luah kota. Di dudi di pingger pantai, sekam sunyinni belutut rik bedua.

⁶ Radu jak seno sekam besalam-salaman, raduni sekam cakak kapal rik tian pun mulang mik lamban.

⁷ Sekam belayar terus jak Tirus sampai mik Ptolemais. Di dudi sekam mik napol puari-puari sai percaya, untuk ngeni salam jama tian, raduni tinggal serani jama tian.

⁸ Jemohni sekam berangkat muneh, raduni sampai di Kaisarea. Di dudi sekam mik jama penginjil sai gelarni Filipus, raduni tinggal di lambanni. Iado salah sai jak pitu jelma sai tepilih di Yerusalem.

⁹ Epak anak mulini radu dikeni kemampuan ulih Allah untuk ngabarko kabar jak Allah.

¹⁰ Radu jak pira-pira saka sekam di dudi, ratongdo jak Yudea sai nabi sai gelarni Agabus.

¹¹ Ia ratong jama sekam raduni ngakuk ikok tengah Paulus. Jama ikok tengah ano ia ngikok cukut rik culukni tenggalan raduni cawa, "Injido sai diucakko ulih Ruh Allah: Sekedau ikok tengah inji haga diikok injuk reji di Yerusalem ulih ulun-ulun Yahudi, rik diserahko jama ulun-ulun lain Yahudi."

¹² Waktu sekam ngedengi ano, sekam rik seluruh puari sai tinggal di Kaisarea udi ngilu nihan jama Paulus in ia dang mik di Yerusalem.

¹³ Kidang ia ngejawab, "Api gunani Puari miwang injuk reji sehingga nyani hatiku hancor? Nyak radu siap lain angkah untuk ditangkok di dudi, kidang juga untuk mati sekalipun mani Tuhan Isa."

¹⁴ Paulus mak haga ngedengi sekam, maka sekam taru ngelarang ia. "Tagando kehaga Tuhan gaoh sai jadi," ani sekam.

¹⁵ Radu jak tinggal di dudi pira-pira saka, sekam nyiapko barang-barang sekam, raduni berangkat mik Yerusalem.

¹⁶ Pira-pira puari jak Kaisarea mik juga jejama jama sekam untuk ngantakko sekam mik lamban Manason, mani di lambannido sekam haga minok. (Manason yakdo sai jelma Siprus sai radu saka jadi jelma sai nutuk Isa.)

¹⁷ Waktu sekam sampai di Yerusalem, puari-puari di dudi nyambut sekam jama senang hati.

¹⁸ Jemohni Paulus mik jama-jama sekam napol Yakobus; seluruh jelma sai mimpin jemaah wat di dudi muneh.

¹⁹ Radu jak ngeni salam jama tian, Paulus nyeritako jama tian sunyin hal sai radu dilakuko Allah liwat ia di hantara jelma-jelma lain Yahudi.

²⁰ Radu jak ngedengi cerita Paulus udi, tian sunyinni memuji Allah. Raduni tian cawa jama Paulus, "Puari Paulus! Puari harus pandai bahwa radu beribu-ribu jelma Yahudi sai percaya jama Isa. Tian sunyinni yakdo jelma-jelma sai setia ngenaati hukum Musa.

²¹ Rik tano tian ngedengi bahwa Puari ngajar sunyinni ulun Yahudi sai tinggal di hantara bangsa bareh, in ngelepasko hukum Musa. Puari ngeni petuah jama tian in tian mak nyunati anak-anak tian atau nutuk adat istiadat Yahudi.

²² Tano ulun-ulun Yahudi sai radu percaya udi tantu haga ngedengi bahwa Puari wat di dija. Jadi, injuk repa tano?

²³ Sehelauni tutukdo petuah sekam. Wat epak jelma di dija sai radu nyani janji jama Tuhan.

²⁴ Nah, helauni Puari mik ngadako upacara penyucian diri jejama jama tian, rik tanggungdo biaya tian in buok tian dapok dicukor. Injuk reno haga nyata jama sunyinni jelma bahwa api sai tian dengi tentang Puari mak benor, mani Puari tenggalan pun ngejalanko hukum Musa.

²⁵ Kidang mengenai jelma sai lain Yahudi sai radu percaya jama Isa, sekam radu ngirim surat jama tian tentang keputusan sekam bahwa tian mak ngasi nganik kanikan sai radu dipersembahko jama berhala, mak ngasi nganik rah, atau nganik binatang sai mati dicekik; rik mak ngasi ngelakuko perbuatan-perbuatan sai hajor."

²⁶ Maka Paulus mik jama keepak ulun udi raduni ngadako upacara penyucian diri jejama jama tian jemoh ranini. Raduni tian kuruk mik Lamban Ibadah untuk ngeni pandai pira rani lagi ampai upacara penyucian diri udi selesai rik kurban untuk tian masing-masing dipersembahko.

²⁷ Ketika jangka waktu pitu rani udi hamper berakher, pira-pira ulun Yahudi jak Asia ngeliak Paulus di delom Lamban Ibadah. Raduni tian ngehasut ulun lamon, kak raduni nyating Paulus

²⁸ sambil mekik-mekik, "Hui jelma Israel, tulung! Injido jelmani sai mik dipa-dipa ngajar jama sunyinni jelma ajaran-ajaran sai nantang bangsa Israel, nantang hukum Musa rik nantang Lamban Ibadah inji. Rik tano ia malah ngusung ulun-ulun lain Yahudi kuruk mik delom Lamban Ibadah rik nyani najis di rang sai suci inji!"

²⁹ (Tian cawa injuk reno mani tian radu ngeliak Trofimus ulun Efesus udi di kota jejama jama Paulus; rik tian nyangko Paulus radu ngusung ia mik delom Lamban Ibadah.)

³⁰ Sunyin kota jadi kacau balau, rik sunyinni jelma tegar-tegar bekerumun. Tian nangkok Paulus rik nyiret ia luah jak Lamban Ibadah. Waktu seno juga rangok Lamban Ibadah disalok.

³¹ Sementara pengacau-pengacau udi berusaha ngebunuh Paulus, jelma ngeni pandai jama komandan pasukan Roma bahwa seluruh Yerusalem sedang ribut.

³² Langsung komandan udi ngakuk pira-pira perwira rik prajurit raduni geluk-geluk mik jama tian mik rang keributan udi. Pada waktu ulun lamon ngeliak komandan udi jama pasukanni, tian taru mukul Paulus.

³³ Komandan udi mik jama Paulus raduni nangkokni, rik ngayun ulun ngikok ia. Kak raduni komandan udi betanya mengenai sapa Paulus udi rik api sai dilakukoni.

³⁴ Sebagian jak ulun lamon udi ngejawab injuk reji rik sebagian lagi ngejawab injuk seno. Keadaan injuk reno kacau hingga komandan udi mak dapok pandai api sebenorni sai radu tejadi. Ulihni seno ia memerintahko in Paulus diusung mik markas.

³⁵ Waktu tian ngusung ia sampai di jan, pengacau-pengacau udi ngamuk hibat hingga Paulus harus ditandu ulih prajurit-prajurit.

³⁶ Tian ditutuk jak kudan ulih gerombolan pengacau-pengacau udi sambil mekik-mekik, "Bunuh ia!"

³⁷ Waktu haga kuruk mik delom markas, Paulus cawa jama komandan udi, "Ngasi mak nyak ngicik serebok jama Tuan?" "Api niku pandai bahasa Yunani?" tanya komandan udi.

³⁸ "Kik injuk reno, niku lain ulun Mesir udi sai tumbai ngadako pemberuntakan raduni ngusung tegar epak ribu jelma pengacau pakai senjata kuruk padang gurun?"

³⁹ Paulus ngejawab, "Nyak jelma Yahudi; nyak warga kota Tarsus, kota sai penting di Kilikia. Tulung izinko nyak cawa jama ulun-ulun udi."

⁴⁰ Maka seraduni Paulus dikeni izin cawa, Paulus cecok di jan, raduni ngeni isyarat jama culukni. Sunyinni jelma jadi tenang. Kak raduni Paulus cawa jama tian di delom bahasa Ibrani. Paulus cawa,

Kisah Para Rasul

Video Kisah Para Rasul 21

Ikuti Kami:

KONTAK | PARTISIPASI | DONASI