Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'Esa moi riaka dodoto ma Jo'oungu ma Dutu 'awi jamati 'o Korintus ma kotaka, de 'awi 'umati 'iodumu 'o Akhaya ma daeraaka gee nio'ahu moteke ma Jo'oungu ma Dutu 'awi mau. Ngoi 'o Paulus ma Jou Yesus Kristus 'awi su-suloko gee woiiriki moteke ma Jo'oungu ma Dutu 'awi mau, ngoi de nanga 'esa moi 'o Timotius,

² mioga'asoko la tanu ma Jo'oungu ma Dutu de ma Kristus Yesus nikula 'o co-catu de 'o sanangi.

³ Nou ngone powisiarene ma Jo'oungu ma Dutu nanga Jou Yesus Kristus 'awi Dea. 'Una 'o Dea gee 'awi singina posironga 'isureka, de 'unau ge'ena 'o nyawa nanga singina wosikua-kuata.

⁴ 'Una wosikuata to ngomi 'amia singina gee ngomi 'o sangisara ma sigoronaka, la de 'o singina ma guata gee miamakeno ma Jo'oungu ma Dutuoka, ngomi mita 'idadi miakisikuata 'o nyawa 'iodumu gee 'o sangisara ma sigoronaka.

⁵ 'O sagala sangisara gee ma Kristus widutu-dutuku, ngomi mita 'o gudaiou midutuku sababu mimarimoi de de 'una. De ma ngekomo mimarimoi de de 'una mita, ma Jo'oungu ma Dutu miriwo mia singina posironga wosikuatoka.

⁶ Ngomi miosangisara, ge'ena ma dumutu to ngini nia singina 'isikuata, de ma ngale to ngini nia laha. To ngomi mia singina ma Jo'oungu ma Dutu wosikuata, la ngomi mita minisikuata so ngini 'idadi nia'akunu naga 'o sagala sangisaraka 'isoka gee ngomi midutu-dutukokau mita.

⁷ Ma ngale ngini 'Esa moi, ngomi tatapu miningaku 'ato ngini niotongosono. Sababu ngaro ngini mita niosangisarakau de de ngomi sababu pomarimoi de ma Kristus, ma ngini mita ma rai nia singina 'isikuata de de ngomi.

⁸ 'Esa moi riaka dodoto! Ngomi miomau ngini nianako 'o sangisara gee ngomi midutuku 'o Asia ma daeraaka. 'O sangisara gee ngomi miamoku-moku, ge'ena kaifoloi 'itubuso, so ngomi komiomanganonuawau 'ato mio'ahuosi.

⁹ Ngomi miamao 'isoka kogee midubutusokau mihukumu miso-songene. Duga koge'ena 'idadi la ngomi 'uwa mimasidutuku ka to ngomi ma sirete mia guatika. Ma 'ena ma Jo'oungu ma Dutuka gee wosimomi-momiki 'o nyawa yosonge-songene.

¹⁰ 'Unau ge'ena misipidilokau ngomi 'o bahaya ma amokoka, de 'unau mita 'asa misilaha ngomi 'o 'orasi ma du'uruoka. Sababu 'unakau ngomi mimasinganono,

¹¹ 'ato 'una 'asa misipidiloli 'o bahayaka sababu ngini niolahidoa, so ma Jo'oungu ma Dutu 'asa misipidiloli 'o bahayaka. Ma Jo'oungu ma Dutu mikula 'o co-catu ngomino ge'ena sababu ngini niolahidoa, de ma sababu ge'ena 'o nyawa manga gudai 'asa yo'amalaha ma Jo'oungu ma Dutuka.

¹² Ngomi miomorene de mionako 'itiai, sababu to ngomiou ma sirete 'amia singina ma dodaka mianakokau 'amia 'ahu 'o duniaka ne'ena. 'Ifoloiosi ge'ena la 'amia gokoie de mia gogeruku nginika 'Esa moi miadiaiokau de mia singina 'itebi-tebini. Ngomi miadiai ge'ena, ko de 'o nyawawa ma barija, ma de 'o singina ma sure ma Jo'oungu ma Dutuno.

¹³ Gee tatuli-tulisuku 'ai suratioka nginika, ge'ena duga ka gee 'okia naga ngini 'idadi niabaca de niasahe. Ne'ena ngini kominisahe 'itiaiwasi ngomino, ma ngoi toga'asoko ngini dua 'asa ma gou-goungu minisahe ngomi. La dua gee ma 'orasi ma Jou Yesus woboali, ngini 'asa nia singina 'imorene sababu ngomi, 'isoka ngomioli mita mia singina 'imorene sababu ngini.

¹⁴ (1:13)

¹⁵ Sababu ge'enau tanako so ma rai ma di-disiraka ngoi 'ai singinaka tinidoboa nginika ma modidi la ngini niamake 'o co-catu ma modidi.

¹⁶ Ngoi 'ai singinaka taika nginika gee totagi 'o Makedoniaka, de gee tolio de totuluoli, la ngini 'idadi niriwo togila-gila 'o Yudeaka.

¹⁷ Ma 'ai singinaka tadiai koge'ena gee tangaliokau; duga ge'ena ko ma ngalewa 'ato 'ai di-dibangi koiriiduwa. Gee ma 'orasi tatiba-tibangi tomau tadiai koge'ena, ge'ena 'uwa niongose 'ato ka to ngoi ma sirete 'ai mau so tongose 'ato, "Koge'enau" ma de tongose 'ato, "Koge'enawa" so bika ge'ena ma ngale 'ai di-dibangi koiriiduwa?

¹⁸ Ma sakisii ma Jo'oungu ma Dutu gee powingaku-ngaku, 'ai jaji nginika ge'ena koposirongawa "Koge'enau" de "Koge'enawa" kage'ena ma 'orasi.

¹⁹ Sababu ma Yesus Kristus, ma Jo'oungu ma Dutu wi Ngowaka gee ngoi, 'o Silas, de 'o Timotius miositota-totarokau 'awi habari nginika, 'una ge'ena 'awi dibangi koingali-ngaliwa. 'Una koidadiwa wongose 'ato, "Koge'enau" de ka ma 'orasi ge'ena de wongose mita, "Koge'enawa". Ma gee wongose 'ato, "Koge'enau" ge'ena ma ngale ma Jo'oungu ma Dutuno.

²⁰ Sababu ma ngekomo ma Yesus Kristus, ma Jo'oungu ma Dutu wongosekau, "Koge'enau" 'awi jaji 'iodumoka, ma ngale 'awi jaji ge'ena 'itotomokau ma ngekomo 'o Yesus. Ma titi ge'enau so ngone potesongo "'Amin! Koge'enau" ma Jo'oungu ma Dutuka sababu pomarimoi de ma Yesus Kristus. De ge'enau so ma Jo'oungu ma Dutu wisiarene.

²¹ Ma Jo'oungu ma Dutu ma sirete wodiai ngomi de ngini pokua-kuata pomarimoi de ma Kristus Yesus, 'unau mita wonairiki ma ngale powileleani ka 'una duga.

²² Ma ngale ge'enau ma Jo'oungu ma Dutu wositatapuokau ngone podadi to 'una 'awi rongamoi de wokula 'awi Ngomasa 'Itebi-tebini nanga singinaka 'imadadi nanga singina nganono 'ato 'una 'asa wonakula 'iodumu gee wojajiokau.

²³ Ngoi koidadiwasi totagi 'o Korintusika, sababu ngoi tooluku todiai 'ania singina 'isusa, ge'ena 'ai sakisii ma Jo'oungu ma Dutu. Sababu 'una wanako 'ai singina ma dodaka.

²⁴ Ngoi kotomasuka-sukawa de kotiniparetawa ma ngale 'okia naga niadiai 'ania ngo-ngakuoka. Ngoi duga katomau pomasidamanarama de de ngini la ngini 'ifoloiosi niosanangi ngano ngini niongaku ma sala ma Yesus Kristusika.

2 Korintus

Video 2 Korintus 1

Ikuti Kami:

KONTAK | PARTISIPASI | DONASI