Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Utatku mita jama'at i Allah inta kong Korintus bo bayongan intau inta aim pinilií i Allah kon Akhaya. Aku'oi, ki Paulus, rasul i Kristus Yesus, inta aim binalií i Allah rasul-Nya takin ki utat naton ki Timotius,
2 mopo'igum makow doaí simbaí ki Allah ki Amaí naton bo ki Tuhan Yesus Kristus umuran mobogoi im barakat bo kobiagan motompia ko'i monimu komintan.
3 Dinayo-dayowdon ki Allah, inta ki Amaí i Yesus Kristus, Tuhan naton. Sia tua in Amaí inta totok mopia ing gina, bo inta tantuí moginyopot kong gina im bayongan intau.
4 Sia in tantuí moginyopot kong gina nami kon wakutu ing kami kinoaíntugan in yoyiga, sahingga in nokosanggup doman ing kami noginyopot kong gina im bayongan intau inta kinoaíntugan yoyiga.
5 Yoyiga inta kinorasa'an i Kristus nobayong domandon ing kinorasa'an nami. Lantaran ki Kristus tua, daí gina nami nobaliídon noropot.
6 Tuamai aka kami bo mokorasa kon yoyiga, yo tua im mangalenya moginyopotbií kong gina monimu, simbaí mosaḷamat im mo'ikow. Aka gina nami bo moropot, yo mo'ikow im moropotbií doman, sahingga mokotahang domandon im mo'ikow wakutu ing koaíntugan bayongan in yoyiga naí inta kinorasa'an nami.
7 Kami in tantuíbií moyakin bo diaíbií molia-liau ing gina nami ko'i monimu, sing kinota'auan bidon nami kom mo'ikow nion im mo'ibogbií moyoyiga takin nami. Manangka intua mo'ikow in iyigonan doman takin nami.
8 Utat mita! Ibogon nami im baí kota'auan doman monimu naíonda in yoyiga inta kinorasa'an nami wakutu ing kon Asia. Mobogat totok in yoyiga no'iantug ko'inami kon tua, sahingga in diaí bidon pinononggina makow nami kom mobiagpa ing kami;
9 Sin naídon onda bo pinopoḷabuían in hukuman matoi. Tongaí tua nobalií mita simbaí kami diaí mopongata in ropot nami tontanií, ta'e umandoḷbií ko'i Allah inta nobogoi ing kobiagan kon intau.
10 Ki Allahbií tua in noposaḷamat ko'inami nongkon yoyiga inta mokopatoi tua. Bo inta moposaḷamat ko'inami kon singgai mo'iduduimai na'a, sin tongaíbií Sia im binalií nami oaíndoḷan. Kami im moyakin bidon kon sambayang mita monimu ko'inami indongoganbií i Allah, sahingga im posaḷamaton-Nyabií ing kami nongkon bayongan inta mokobodito ko'i nami. Ki Allah umuranbií nobogoi im barakat ko'inami sin umuran monimu sinambayangan. Tuamai nobayongdon totok in intau mosukur ko'i Allah.
11 (1:10)
12 Noḷunganga totok ing gina nami, sin noyakin bidon ing kami kong kobobiag nami kon dunia na'a -- apapa doman hubungan nami takin monimu -- tantuíbií nami sinompia takin gina motulid bo nobayag. Tua komintan inaidan nami, de'emanbií pinodoyon kong kapandoian raian in intau, ta'e pinodoyonbií kong kakuatan inta pinonotabi i Allah.
13 Kami tongaíbií nomais kon onu im mota'au baca'an bo inta komangalean monimu. Tana'a makow in diaípabií totok komangalean monimu, ta'e haraponku makow ko'onggotannya komangaleandon monimu totu-totu'u ing kami. Daí aka kon wakutu mo'iangoidon ing ki Tuhan Yesus, yo ḷunganga ing gina monimu ko'inami diaíbií im poliuan, natua doman ing kami.
14 (1:13)
15 Lantaranbií koyakinanku tatua, daí oyuíon roncanaku mamangoi mokipodungkuḷ ko'i monimu tungkuḷ intua, simbaí modugang moaíntoí im barakat mo'ulií monimu.
16 Roncanaku tua in wakutu aku'oi mayak im Makedonia yo mongandupa muna in aku'oi ko'i monimu, naí doman tua in aka mobuidon. Simbaí mota'aupa in aku'oi mokituḷung ko'i monimu, aka aku'oi mayak in Yudea.
17 Ta'e roncanaku tatua nobaḷui; degaí soaáḷ tana'a nobalií tanda kon diaí motantuí in raianku? Ta'au degaí, wakutu in aku'oi noroncana, tongaíbií pinodudui kon ibogku tontanií, sahingga in topií-topií, "O,o", topií-topií doman "Diaí"?
18 Totu'u ule! Podoyon ko'i Allah inta mota'au pirisaya'an, dandiku ko'i monimu de'emanbií soaáḷ "O, o" andeka "Diaí".
19 Sing ki Yesus Kristus, ki Adií i Allah inta aim pinohabarku bo pinohabar i Silas, bo i Timotius ko'i monimu, de'emanbií intau inta topií-topií moguman "O, o" bo topií-topií doman moguman "Diaí". Sia tua aka modandi yo totu-totu'ubií mobalií.
20 Sing ki Allah nopototu'u in dandi-Nya pinongin i Yesus. Tuabií in nobalií dodoyonan sahingga intau moguman "Amin" ko'i Allah sing ki Yesus Kristus. Tua in inaidan nami simbaí dayowon ing ki Allah.
21 Sing ki Allahbií in tantuí nobogoi ing kakuatan ko'inami bo ko'i monimu, sahingga in tantuí notobatuí i Kristus; bo Siabií doman tua inta nomilií ko'i naton mobalií umat inta kinotabi-Nya.
22 Tuamai totu-totu'u bidon binalií-Nya umat-Nya ing kita poḷat inogoian-Nya in Roho, pinogonuí kong gina naton saḷaku jaminan kon totu-totu'bií ogoi-Nya onu inta aim pinodandi-Nya.
23 Ki Allahbií tontanií in nobalií saksiku -- bo inta nonota'au kong ginaku -- kon aku'oi in diaí nobalií namangoi ing Korintus sin aku'oi in doiíbií mopoyoyigamai kong gina monimu.
24 Aku'oi in diaíbií momakisa ko'i monimu kon soaáḷ onu inta musti pirisaya'an monimu, sin mo'ikow totokdon nopirisaya ko'i Kristus. Aku'oi in tongaíbií mogaid moyotakin monimu simbaí modugang pia ing gina monimu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA