Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sura si’i yako resi aku, i Paulus. Aku samba’a pomakau i Yesu Kerisitu apa etu semo pamporani i mPue Allah resi aku. Pasi sura si’i yako resi i Timotius, a’i ngkita to samba’a pangaya. Wali kami dua mangantulis sura si’i resi komi to i Pue Allah Puenya to siromu nja’u kota Korintus. Pasi kami mangantulisika seja samparia tau to i Pue Allah Puenya ri juku propinsi Akhaya.
2 Wali kami makai-kai see i Pue Allah, Pa’a ngkita, pasi i Pue Yesu Kerisitu, damampaponsanika komi kanotoNya pasi mangawaika komi karodo ndaya.
3 Wali anu kita mangabarong i Pue Allah, Pa’a mPue ngkita, i Yesu Kerisitu. Ia semo Pa’a to sangkani mamporayang kita, pasi Ia semo i Allah to sangkani mampakaroso rayanta.
4 Wali Ia semo to mampakaroso raya mami ri rayanya samparia kasusa to narata mami. Apa kami mangarata seja boros kasesa ewa to narata i ngKerisitu seore. Pei ewa wimba kaborosinya kasesa to kami mangarata etu, ewa see seja kabaenya karoso ndaya to narata mami apa saba kami samba’a pei i Kerisitu. Wali naka pei i Pue Allah mangika ewa wetu see kami maya mangampake karoso ndaya to Ia mangawaika kami etu, damampakaroso raya nu yunu mami to mangarata kasusa.
5 (1:4)
6 Wali ane kami mangarata kasesa, re’e batuanginya resi komi. Apa yako kasesa to kami mangarata etu, see naka kami mangansani ewa wimba daraika tempo komi mangarata seja kasesa. Etu semo, kami mangansani ewa wimba daraika mampakaroso raya ngkomi pasi mangampalaes komi ri raya ngkatuwu ngkomi. Wali bae kojo batuanginya resi komi. Pasi ane kami napakaroso i mPue Allah raya mami, re’e seja batuanginya resi komi. Apa yako etu manasa resi komi i Pue Allah seja damampakaroso raya ngkomi. Wali see naka komi maroso rayamu mangansabaraka kasesa to sewaju ewa kasesa to narata mami.
7 Wali maroso kojo pansarumaka mami mangkonong komi. Apa kami mangansani komi mangarata seja kasesa sewaju ewa kami, see naka komi danapakaroso seja i mPue Allah raya ngkomi sewaju ewa kami.
8 Wali a’i-a’i, ane mangkonong kasesa to narata mami etu, kami rani mangansaritaka komi see komi mangansani. Wali kasesa to narata mami nja’u propinsi Asia, kasesa etu maya raporapaka ewa kalemba to mabeu kojo to taa nakoto mami mangkoyo. Taa gana karoso mami, apa mapari kojo kasesa etu. Wali see naka kami mangepe kami bara damate yau,
9 apa kami mangepe ewa roomo rahuku mate. Pei sabanya naka pei mawali ewa wetu resi kami, see kami taa damansarumaka karoso mami. Kami ojo mansarumaka i Pue Allah anu mangawangu muni tau yako ri kapatenya.
10 Ia roomo mampalaes kami seore yako ri tau to rani mampopate yau kami, pasi Ia mangampalaes kami ri tempo si’i. Pasi kami mansarumaka Ia tiroo damampalaes kami ri tempo to darata.
11 Ia damampalaes kami apa komi mangansawang seja mangampokai-kaika kami. Wali yako pokai-kai ntau boros, see naka i Pue Allah damampaponsanika kami kanotoNya pasi damangansawang kami ri tempo to darata. Wali yako palaong to danaika i mPue Allah resi kami etu, see naka boros tau to damanganto’oka Ia tarima matao.
12 Wali kami mangansani komi tiroowa re’e mampokai-kaika kami see i Pue Allah damangansawang kami apa kami matantu matao kojo lengko ngkatuwu mami ri oyo nto lino, taa manto’o ri oyo ngkomi seore. Apa kami mangika lengko ngkatuwu to masipato naika ntau to i Pue Allah Puenya, etu semo lengko to singkonong pei Ia pasi to taa manipu. Wali kami ndende kojo mampobuuka lengko mami etu pasi raya mami taa mangepe sala. Pei si’a yako kapande nto lino naka pei kami maya mangika lengko ngkatuwu to etu. Yako kanoto i mPue Allah semo.
13 Pasi ewa wetu seja sura to kami mangantulisika komi. Apa gombo mami liu sura-sura to kami mampokatu resi komi tare batuanginya to rawuni to mangantipu komi, pasi tare gombo to masuli rabasa bara masuli ransani. Pei kunsani ane tempo si’i komi tawa manasa kojo mangkonong pampobuuka mami pasi lengko mami, pei tuwu-tuwuja kanjo’u-njo’u tidugadugang komi masinsani pei kami. Apa ane ewa wetu komi damasanang mangabarong mangkonong kami sewaju ewa kami damasanang mangabarong mangkonong komi ane ratamo temponya i Pue Yesu dama’i wo’u.
14 (1:13)
15 Wali aku matantu kojo komi damangansani pampobuuka mami pasi lengko mami pei damasanang resi kami. Pasi aku matantu seja komi dasingkonong pei songkangku seore. Songkangku etu, etu semo aku daliu mandoo resi komi ri raya mpalinjangku yau ri Makedonia, pasi daliu mandoo wo’u tempo aku mawolili muni yako nja’u Makedonia etu. Apa ane ewa wetu, komi dua ngkani mangarata pansawang pasi maya seja mangansawang aku ri raya mpalinjangku yau njo’u Yudea. Pei taa mawali songkangku etu.
16 (1:15)
17 Pei nempo taa mawali songkangku etu, si’a batuanginya aku dua-dua rayangku. Pasi si’a batuanginya aku mangika songka ewa naika ntau to ojo mangaluluka yau pamporani ndaya to si sira, etu semo tau to mangika parajanji pei kamonsonya sira taa damangabanang. Ane tau to ewa wetu taa masipato rasarumaka.
18 Pei si’a ewa wetu lengkongku! I Pue Allah maya rasarumaka. Pasi ewa see seja kami, apa kami taa mangawutis komi. Kami taa mangika parajanji to kami taa damangabanang.
19 Wali naka pei kami tare mangawutis komi apa saba kami mangalulu lengko i Yesu Kerisitu, Ana i mPue Allah, to roomo napakarebaka mami togo i Silas pei i Timotius resi komi. I Yesu Kerisitu Ia masipato rasarumaka apa Ia taa seja mangika parajanji to Ia taa damangabanang. Samparia gombo to si Ia paka monso pasi Ia sangkani mangika ewa wimba to Ia roomo manganto’o.
20 Apa i Yesu Kerisitu semo to mangabanang samparia parajanji to naika i mPue Allah tempo owi. Wali apa saba Ia mangabanang parajanji etu, see naka kita manganto’o, “Monso pu’u Ia masipato rasarumaka.” Wali yako gombonta etu i Pue Allah rabarong.
21 Pei si’a ojo etu, apa i Pue Allah, Ia semo to mampakaroso pangaya mami sindarandara pei pangaya ngkomi resi i Kerisitu. Pasi Ia semo to mangampilis kita mawali Ia Puenya.
22 Pasi i Pue Allah seja to mangantondong kita see manasa kita Ia Puenya. Apa Ia roomo mangawai NosaNya maroo ri raya ngkita. Wali yako NosaNya to maroo ri rayanta etu, see naka matantu kojo kita damangarata samparia to naparajanjika i mPue Allah tauNya. Wali i Pue Allah monso pu’u mangabanang samparia parajanjiNya resi kita. Pasi ewa see seja dakuika mangabanang gombongku resi komi.
23 Wali a’i-a’i, aku damampakanasaka resi komi sabanya naka pei aku mangawali songkangku dayau resi komi. Pasi aku mamporapika resi i Pue Allah see Ia maya mawali matamanasa mangkonong gombo to dakuto’oka komi si’i apa Ia semo to mangansani rayangku. Wali kamonsonya naka pei aku tawa nayau muni resi komi njo’u Korintus apa kuporayang komi pasi taa rani rata resi komi ojo damanganseko komi to nangika sala seore.
24 Pei nempo manganseko komi, si’a batuanginya kami mampobuuka kami semo pue ngkomi pasi komi to papolaong mami. Kami taa rani mangkuasang pangaya ngkomi, apa pangaya ngkomi etu maroso yami. Pamporani mami mangansawang komi see daradugang wo’u kandende ndaya ngkomi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA