Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Semeton senamian jemaah Allah lẽq Korintus dait selapuq dengan-dengan saq tehususang bagi Allah lẽq selapuq wilayah Akaya. Tiang, Paulus, rasul Deside Isa Almasih, saq teangkat siq pekayunan Allah, bareng-bareng kance semetonte Timotius,

² beharep semoge Allah Bapante dait Junjungan Saq Mulie, Deside Isa Almasih ngicanin rahmat dait damẽ sejahtere tipaq side pade.

³ Puji syukur tipaq Allah, Bapa lẽman Junjungante Saq Mulie, Deside Isa Almasih. Ie Bapa saq penoq siq belas kasihan, dait Allah sumber selapuq penghiburan.

⁴ Ie hibur tiang pade lẽq sebilang penderitean saq tiang pade alamin, adẽq siq penghiburan saq tiang pade terimaq lẽman Allah nike, tiang pade bau ẽndah hibur selapuq dengan saq dalem penderitean.

⁵ Kesengsarean-kesengsarean saq tealamin siq Almasih sampun luwẽq tiang pade alamin ẽndah. Dait langan Almasih ẽndah, tiang pade nerimaq penghiburan saq melimpah.

⁶ Lamun tiang pade ngalamin penderitean, nike setetune jari penghiburan dait keselametan side pade. Lamun tiang pade nerimaq penghiburan, make side pade milu ẽndah nerimaq penghiburan sehingge side pade mauq kekuatan adẽq tabah dalem kesengsarean-kesengsarean maraq saq tiang pade alamin ẽndah.

⁷ Tiang pade tetep yakin dait ndẽq uwah ragu-ragu mengenai side pade, sẽngaq tiang pade nenaoq bahwe side pade milu menderite kance tiang pade. Dait lantaran nike side pade milu ẽndah nerimaq penghiburan bareng kance tiang pade.

⁸ Semeton senamian! Tiang pade mẽlẽ side pade nenaoq mengenai penderitean saq tiang pade alamin lẽq wilayah Asia Kodẽq. Penderitean saq tiang pade tanggung nike berat gati sehingge tiang pade ndẽq beharep malik gen idup;

⁹ idapne maraq sampun tehukum siq hukuman matẽ doang. Laguq hal nike telaksane adẽq tiang pade ndaq beharep lẽq kekuatan mẽsaq, laguq lẽq Allah saq ngidupang dengan ninggal.

¹⁰ Ie saq sampun nyelametang tiang pade lẽman bahaye kematẽan saq belẽq nike. Dait Ie ẽndah saq gen nyelametang tiang pade ẽraq lẽq jelo-jelo saq gen dateng, sẽngaq tipaq Ie tiang pade beharep.

¹¹ Tiang pade yakin bahwe side pade do'eang tiang pade, adẽq luwẽq dengan ngucapang syukur tipaq Allah lantaran paice saq tiang pade terimaq sẽngaq luwẽqne do'e ie pade umaq tiang pade.

¹² Tiang pade bangge, sẽngaq atẽ nurani tiang pade ngebẽng kesaksian tipaq tiang pade bahwe idup tiang pade lẽq dunie niki -- terutame hubungan tiang pade kance side pade sampun tiang pade laksaneang secare ihlas dait murni. Tiang pade ngelaksaneang hal nike, ndẽqne siq kebijaksanean manusie, laguq siq rahmat Allah.

¹³ Saq tiang pade tulis tipaq side pade nike cume mengenai hal-hal saq side pade bau bace dait ngerti. Tiang beharep side pade tetu-tetu ngerti lẽq tiang pade. Siq care nike, lẽq jelo kerauhan Junjungan Saq Mulie Deside Isa ẽraq, side pade gen bangge lẽq tiang pade, maraq tiang pade ẽndah bangge lẽq side pade.

¹⁴ (1:13)

¹⁵ Lantaran keyakinan nike lẽq penembẽqne tiang ngerencaneang jari jangoq side pade adẽq side pade mauq rahmat saq kedue kaline.

¹⁶ Tiang bedowẽ maksut jangoq side pade lẽq kelampan tiang ojok Makedonia, dait selaloq malik lẽq side sewaktu tiang tulak, adẽq side pade bau tulung tiang ngelanjutang kelampan ojok Yudea.

¹⁷ Laguq tiang sampun ngerobah niat tiang nike; nah, napi nike artine pendirian tiang ndẽq tetep? Sewaktu miaq rencane, napi tiang miaq rencane menurut kemẽlẽq tiang mẽsaq, semendaq ngeraos, "Enggih" dait karing semendaqne "Ndẽq"?

¹⁸ Demi Allah saq setie, janji tiang lẽq side ndẽqne "Enggih" dait "Ndẽq".

¹⁹ Sẽngaq Deside Isa Almasih, Bije saq asalne lẽman Allah, saq teberiteang tipaq side siq Silwanus, Timotius, dait siq tiang mẽsaq ndẽqne "Enggih" atao "Ndẽq". Laguq sebalikne lẽq dalem Deside Isa Almasih cume araq "Enggih".

²⁰ Sẽngaq Almasih nike "Enggih" bagi selapuq janji Allah. Siq dasar nike ite ngucapang "Amin" jari mulieang Allah.

²¹ Sẽngaq Ie saq sampun neguqang tiang pade bareng-bareng kance side lẽq dalem Almasih, nike Allah saq sampun nyuciang dait ngesahang ite.

²² Keranaq nike Allah sampun ngesahang ite jari dowẽ-Ne, dait ngicanin Roh Suci lẽq dalem atẽnte sebagẽ jaminan bahwe Ie gen ngicanin ite selapuq saq Ie janjiqang.

²³ Allah jari saksi tiang -- sẽngaq Ie wikan angen tiang -- bahwe tiang burung lumbar ojok Korintus, sẽngaq tiang ngasihin side pade.

²⁴ Tiang ndẽq maksaq side pade mengenai napi saq harus side pade percaye, sẽngaq side pade sampun tetu-tetu percaye lẽq Almasih. Tiang cume begawẽan bareng-bareng kance side pade adẽq side pade sayan bahagie.

2 Korintus

Video 2 Korintus 1

Ikuti Kami:

KONTAK | PARTISIPASI | DONASI