Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ya'ami ira talifusõ banua Lowalangi ba Gorindro awõ fefu mbanua Lowalangi ba zi sagõrõ Akhaya. Ya'odo, Faulo, sinenge Yesu Keriso, molo'õ somasi Lowalangi, awõ dalifusõda Timoteo.

² Matõtõna ena'õ Lowalangi Amada awõ Zo'aya Yesu Keriso zame'e khõmi howuhowu awõ wa'ohahau dõdõ.

³ Nisuno Lowalangi, Ama Zo'aya ya'ita Yesu Keriso. Ama si sõkhi sibai tõdõ Ia, ba Ya'ia zame'e fa'aro dõdõ ba niha.

⁴ I'a'aro'õ dõdõma bakha ba galangua dõdõ nitõrõma, ena'õ bõrõ wa'abõlõ nitemama moroi khõ Lowalangi andrõ, tola ma'a'aro'õ dõdõ niha fefu bakha ba galangua dõdõ.

⁵ No oya nitõrõma gõi famakao andrõ si no Itaõgõ Keriso. Da'õ mbõrõ wa khõ Keriso te'a'aro'õ sibai dõdõma.

⁶ Na matõrõ galangua dõdõ, no ba wangaro'õ tõdõmi da'õ, soguna ba wangorifi khõmi. Na te'a'aro'õ dõdõma, ba si fao ami ni'abõlõ'õ irege anau gõlõmi bakha ba galangua dõdõ si mane nitaõgõma gõi.

⁷ Lõ irai mangiwa dõdõma sanandrõsa ba wanõtõnama khõmi, bõrõ me ma'ila wa fao ami tefakao awõma. Ba bõrõ da'õ, te'abõlõ'õ gõi ami awõma.

⁸ He ya'ami ira talifusõ! Omasiga mi'ila galangua dõdõ nitaõgõma ba danõ Asia. Itambuaisi sibai ndra'aga famakao nitaõgõma andrõ, irege lõ manõtõna wa auri ndra'aga nasa;

⁹ hulõ zi no mu'etu'õ huku famunu ndra'aga worasoima. Alua zi manõ, ena'õ lõ matendro'õ wanõtõnama khõma samõsa, hiza ena'õ khõ Lowalangi, sangorifi niha si no mate.

¹⁰ Ya'ia zangefa'õ ya'aga moroi ba lumõ wa'amate sebua andrõ. Ba Ya'ia gõi zangorifi ya'aga dania ba ginõtõ si so fõna, bõrõ me no khõ-Nia manõtõna ndra'aga.

¹¹ Aro dõdõma bõrõ wangandrõmi salahima wa i'orifi zui dania ndra'aga Lowalangi moroi ba lumõ wa'amate. Ba ato niha si no mangandrõ salahima, la'andrõ saohagõlõ dania khõ Lowalangi, bõrõ me Ifondrondrongo wangandrõra ba Ifahowu'õ ndra'aga Lowalangi.

¹² Tola masuno ndra'aga bõrõ me aro wehede dõdõma sanga'aro'õ ya'aga wa fefu nilauma ba gulidanõ andre -- mendrua manõ gamakhaitama khõmi -- no mafalua si fao ohitõ dõdõ si sõkhi ba sindruhu soroi Lowalangi. Mafalua da'õ, tenga molo'õ fa'atuatuama wa'aniha, no ba wa'abõlõ nibe'e Lowalangi khõma.

¹³ Nisurama khõmi sanandrõsa ba ngawalõ zi tola mibaso ba saboto ba dõdõmi. Lõ aboto sibai ba dõdõmi ndra'aga iada'e, ba hiza manõtõna dõdõgu wa sindruhundruhu aboto ba dõdõmi dania. Ba zi manõ misuno ami bõrõ ndra'aga dania na inõtõ wa'atohare Zo'aya Yesu si mane fanunoma ya'aga bõrõ ami.

¹⁴ (1:13)

¹⁵ Bõrõ wa'aro dõdõ si manõ wa no u'era'era we'amõi khõmi ena'õ mitema dua winaeta howuhowu.

¹⁶ Omasido ufalukhaisi ami ba we'amõigu ba Makedonia, ba ufuli utõrõ na mangawulido, ena'õ tola mitolo ndra'o wanohugõ fofanõgu numalõ ba Yudea.

¹⁷ Ba hiza no uwu'ai gera'eragu andrõ; hadia, fangoroma da'õ wa lõ mo'arota wangerangeragu? Me inõtõ ufakhoi lalagu, hadia ufakhoi ia molo'õ somasi ndra'o samõsa, itaria umane "Ya'ia", ba itaria umane, "Tenga"?

¹⁸ Ba dõi Lowalangi si lõ farõi, bu'u ligu khõmi si no uw̃a'õ, tenga ha "Ya'ia" ma zui "Tenga".

¹⁹ Bõrõ me Yesu Keriso, Ono Lowalangi, nituriaigõ Zila, Timoteo ba ya'odo samõsa khõmi tenga niha si "Ya'ia" ma "Si tenga". Hiza i no fanema li soroi Lowalangi wa "Ya'ia".

²⁰ Bõrõ me khõ-Nia no Iw̃a'õ "Ya'ia" Lowalangi ba ngawalõ fefu wawu'usa li-Nia. Modanedane ba da'õ tamane "Yaduhu" khõ Lowalangi bõrõ Yesu Keriso. Malau zi manõ ena'õ tefolakhõmi Lowalangi.

²¹ Lowalangi samõsa zanga'aro'õ fa ha sambuada khõ Keriso; ba Ya'ia andrõ zamili ya'ita tana khõ-Nia.

²² No Ibe'e khõda dandra wa okhõta-Nia ita ba no Ibe'e ba dõdõda zi tobali lohelohe ba ngawalõ hadia Ia.

²³ Lowalangi sasigu -- bõrõ me I'ila nõsi dõdõgu -- wa lõ alua mõi ndra'o ba Gorindro, bõrõ me lõ omasi ndra'o na abu dõdõmi.

²⁴ Lõ omasi ndra'o ufatõrõ ami ba zi faduhu dõdõmi, bõrõ me no mamati sibai ami khõ Keriso. Omasi ndra'o falulu halõw̃õ khõmi ena'õ itugu owuawua dõdõmi.

2 Korintus

Video 2 Korintus 1

Ikuti Kami:

KONTAK | PARTISIPASI | DONASI