Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ratnan Paulus, rasul Kristus Yésus dengan pian Allah, idi ratnan Timotius kinanak tau— Kuan sidang Allah déi' Korintus idi kuan amung lun manu aput bawang Akaya:
2 Do' katu Allah temurun kuan muyuh idi awang ratnan Allah Taman tau, idi Tuhan Yésus Keristus.
3 Do' tau ngubur Allah Taman Tuhan tau Yésus Keristus, ieh ineh Taman luk lawa amung éi' idi Allah luk lawa amung ubuk!
4 Ieh ngubuk netau bang amung-amung dereh tau, pad tau miak ngubuk lemulun luk bang susa' anun-anun pana', dengan ubuk ratnan Allah luk nengubuk nekai ini.
5 Mepad kudeng tau ngalap babpat dereh Keristus luk mula' ineh, kudeng ineh teh bang Keristus tau ngalap pedenganNeh luk rayeh.
6 Kudeng kai medereh, ieh ineh pad muyuh miak uen ngedengan idi uen ngulun, idi teh kudeng kai uen ngedengan, muyuh pana' uen ngedengan, pad muyuh ngalap tueh idi ulai niat, pelé muyuh tuman kareb muyuh medereh mepad kudeng kai teh.
7 Idi rapet kai nemuyuh pangeh lutep. Kai kali', idi mepad kudeng muyuh ngalap babpat bang dereh kai, kudeng ineh teh muyuh ngalap pedengan luk lapen kai ineh.
8 Kai pian nemuyuh ngerawé, O kinanak-kinanakku, ratnan dereh luk pangeh nekali' kai déi' Asia. Dereh kai ineh pelaba berat, meluun ratnan tueh kai, pad kai na merapet miak mulun teh.
9 Kai sebuleng pangeh nekali' bang burur kai ukum maté, pad kai na merapet inan burur kai sebuleng, iamo' inan Allah luk nui nelan naté.
10 Ieh nengulun nekai ratnan até luk kudeng ineh rayeh, idi Ieh luk sikal ngulun nekai teh. Kai merapet Neneh miak ngulun nekai teh,
11 kudeng muyuh nengan nekai dengan sembayang muyuh. Dengan luk kudeng ineh putuh lemulun luk mula' ineh miak uen ngua', pad Allah miak ngeperuan nekai, idi mula' lemulun miak maré ubur kuan Allah ngaceku kai.
12 Kai mawang niat ngaceku teruayen niat kai ngelio kuan kai ratnan ulun kai bang tana' ini, meluun teh ratnan rurum kai dengan muyuh luk pangeh isa' dengan kuu' idi siri niat ngaceku lalud katu Allah, idi baken ngaceku ileh lemulun.
13 Luk kai ngayud kuan muyuh na baken ratnan luk miak ruen muyuh maca' idi kali' ilungneh. Idi ui merapet nemuyuh miak kali' dengan meriput, anun-anun luk na kali' muyuh nekini dengan meriput, pad kareb Aco Tuhan Yésus, muyuh miak mawang niat nekai, mepad kudeng kai pana' mawang niat nemuyuh.
14 (1:13)
15 Idi ngaceku ui pangeh merapet kudeng ini, pianku sikal macing nemuyuh atun, pad muyuh ngalap peruan luk kedueh kua'.
16 Atun ui pian amé' nemuyuh kareb maya' dalan amé' Makedonia idi rat Makedonia lemubed amé' nemuyuh teh, pad muyuh ngedengan negku bang lawéku amé' Yudia.
17 Kareb ui nengerawé kudeng ineh, perapid niatkuké? Inanké ui ngerawé maya' pianku sebuleng, pad "Mo" idi "Na" ineh mepad kuanku?
18 Dengan ngadan Allah luk lutep maya' jani', idi balaku nemuyuh ineh baken "Mo'" idi "Na".
19 Ngaceku Yésus Keristus Anak Allah, luk bida' kai arang muyuh ieh ineh Siluanus, Timotius, idi ui, baken "Mo" idi "Na". Iamo' bang Keristus ineh inan "Mo" mo'.
20 Ngaceku Keristus, Allah pebala, "Mo" kuan amung-amung jani'Neh. Ineh punneh tau mala "Amin" teh ratnan Yésus Keristus, pad Allah uen ngerayeh.
21 Idi Allah luk ngepicet nekai dengan muyuh bang Keristus, idi Ieh pangeh nengumau nekai.
22 Ieh teh pangeh nemaré tanu' kuan tau dengan maré etu Roh semuet bang niat tau.
23 Ui nawar Allah mangun ku luk nekali' negku. Ieh kali' niatku! Ngaceku ratnan éi'ku kuan muyuh ui nateh nacing déi' Korintus.
24 Na kai mangun ku raca' pa luun anu muyuh, iamo' kai ngakem dengan muyuh sikal maré nemuyuh mawang niat, ngaceku dengan anu muyuh tuped meraben.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA