Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nori, ihi ane ari nosambil teko lahu peruk lit hit honoluk toho welahepma haharoho umbuk fug teg lahi.
2 Nonowe waruhu sambil ino yoholiyangge waruk inap hikanggo laruk hag toho waruhu ulug tem toho honoluk.
3 Aben nunusuk fug angge yuwag toho welahe uruk angge famen it arimano enepelegma siyahon unubam aruhu. Hiyaben malik foroho lit apeleg toho wereg angge famen malik indag tik oho lit ouk ubam atuk hag toho it arimano siyahon unubam aruhumu seleg toho wilip amuhup fug.
4 Nori, hit hik tegma welahep fugmu At waruhu sambil ino yoholiyangge waruk inap waharuk hag toho hit hunubam aruhu fug.
5 Hit obog toho sakan tegma wereg lit seleg toho welahep. Nit hubanggo laruk lit hik teg ambeg hag toho welahe fug.
6 Ari roho welahe fureg ap winon nohoruk hag toho nit nohuk fug angge ninil wirik toho wereg lit yet teg lamuhuk.
7 Noho fahet wenggeltuk inap hubanggo nohoruk. Ik olokon nalug nenek turuk inap hubanggo nenek turuk.
8 Nit seleg tegma welaheyon ninil wirik toho wereg lit sing wan turuk latusa hag toho Allah fam wenggel haruk lit nonori ninindi enesug lamuhuk. Ununggul asum wan turuk latusa hag toho nit Allahn fanowap nenebuhu ulug Ubam tem toho wenggel haruk lamuhuk.
9 Allahn Nolok toho pet eneptuk lit siyahap enebuhuk ulug mumal neneptisi fug. Nonowe Yesus Kristus fam fanowap henebuhuk ulug mumal neneptisi.
10 Nit nonoluk welaheyon ano, war amuhukteg welamuhukon ano At men ambiyeg nonoluk fano welamuhuk ulug At nit fahet war atfag.
11 Nit fahet war atfagma hit-hit komo-komo atuk lit ketiya turuk lahep hag toho honori men let-ler atuk lamuhup.
12 Nori, hit sehelimu yabuk inine roho wituk lit Nonowe Yesus unuk fam hiniknisi roho wereg lit komo heneptukon arimano hi eneptuk lamuhup ulug heng heneptuk lahe.
13 Iren yabuk turuk ane fahet hinindi anggolo enesug lamuhup. Likiya hupmu hit-hit honori men hili roho welam fug angge mangno roho welamuhup.
14 Nori, niren hit hunubam tot komo henebulon tu: Tuk fug ane turuk inap komo eneptuk lamuhup, inindi piren toho wenggeltuk inap inindi misihap eneptuk lamuhup. Ap inine elehon inibil atuk lamuhup. Ap obog tohowen hunubam nungge-nungge tul puhup ane fahet hinindi hondo reberuk lamuhup.
15 Aben siyag ane hunubam turukmu hiren oho hebeloho ayeg wabul fug ulug hinindi wenggel haruk lamuhup. Hininggareg faher oho ap winon faher oho fanowon eneg yami ruruk lamuhup.
16 Likiya hupmu hinindimu henehiyeg toho wereg lit
17 sembahyang uruk lamuhup.
18 Mun angge man angge Allahn og nisaruk ulug Ninikni uruk lit wel turuk lamuhup. Ari uruk lit wel turuk lamuhupmu Allahn hit Yesus Kristus men mangno roho wereg lit fano welamuhup perisi ane hikit toho turuk lamuhup.
19 Allah hime fanowon il umbagpag turukon hondo rubusuk fug.
20 Fobik aruhu ane fahet hiyag hisaruk halug hiren apmayap tul peruk lamuhup fug.
21 Mun angge man angge siyahon ano fanowon ano ulug wal hahupteg fanowon eneg senetuk lamuhup.
22 Siyahon eke hag eke hag werehon henembol fil embeseruk lamuhup.
23 Allahn ap seliyon men mangnowap heneptuk Ahun inowen hit henebe abir angge hinindi men henehime fanowon men hunubam usanduk singon tag teg eleg angge weregma kul heneptuk laruhu. Kul heneptuk lit weregman eneg Nonowe Yesus Kristus ino waruhu.
24 At wol heneptisiyon inowen sali pisan tuk fug angge emberisiyon hikit toho tuhu.
25 Nori, nit fahet sembahyang uruk lamuhup.
26 Nonori obog toho hit nim werehon fahet nit nununuk uruk lit mako pug toho hi eneptuk lamuhup.
27 Nonori obog toho enelukeman suwesingga aru uruk lamuhuben Nonowe unuk fam nele ine roho heng heneptuk lahi.
28 Nonowe Yesus Kristus inowen Indi henesug laruhu ulug sembahyang uruk lahi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA