Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tapi anggo pasal panorangni atap musimni, nasiam sanina, seng pala suratonnami bani nasiam.
2 Ai ibotoh nasiam sandiri do torang, paboa songon panangko borngin do parroh ni Ari ni Tuhan in.
3 Anggo ihatahon halak, “Damei do anjaha sonang,” jadi sompong ma roh hamagouan ai bani sidea, songon pangarouan bani na boratan rumah, anjaha seng dong haporusan.
4 Tapi nasiam sanina, seng ibagas na golap nasiam, ulang ma hasiangan nasiam songon panangko.
5 Ai haganup do nasiam anak ni na lihar anjaha anak arian, seng borngin atap na golap simada hita.
6 Ase ulang ma hita tarpodom songon halak na legan, tapi puho ma hita anjaha torang maruhur.
7 Ai borngin do modom na modom in, anjaha borngin do mabuk na mabuk in.
8 Tapi, halani humbani na siang hita, torang ma uhurta, anjaha pakei hita ma baju bosi haporsayaon ampa haholongan ampa tangkuluk pangarapan bani haluahon.
9 Ai seng, ase sigilaan hita itotapkon Naibata, tapi ase jumpahan hagoluhan do marhitei Tuhanta Jesus Kristus,
10 na dob matei mangkopkop hita, ase barang na puho hita, barang na modom, manggoluh hita rap pakon-Si.
11 Halani ai marsipodahan ma nasiam anjaha marsipauli-ulian, songon na binahen nasiam.
12 Tapi ielek-elek hanami ma nasiam sanina, “Hormat ma bani na mangkalojahon nasiam, bani na mambobahon nasiam ibagas Tuhan in,” bani na mamodahi nasiam,
13 anjaha sangap tumang ma bahen nasiam sidea ibagas holong halani horja ni sidea. Mardamei ma nasiam samah nasiam.
14 Anjaha iojur hanami do nasiam sanina, palumba nasiam ma halak na so torsa marparlahou, apohi nasiam siotik uhur, anju bani na galek, marlumbang ni uhur dompak haganup.
15 Jaga ma nasiam, ase ulang adong mambalaskon na jahat balas ni na jahat, tapi na madear ma parayak nasiam tongtong samah nasiam, age bani haganup halak.
16 Tongtong ma nasiam marmalas ni uhur,
17 totap martonggo,
18 martarima kasih pasal haganup, ai in do na pinindo ni Naibata humbani nasiam marhitei Kristus Jesus.
19 Ulang ma intopi nasiam Tonduy in,
20 ulang ma marhampung ni uhur pasal panjahaion,
21 tapi uji nasiam haganup, jolom nasiam ma na madear,
22 anjaha simbili nasiam ma sagala masam ni na masambor.
23 Naibata Sipardamei in ma mambahen tang pansing nasiam, anjaha Ia ma manramotkon tonduy, uhur ampa daging nasiam, ase pansing, seng panurakon bani parroh ni Tuhanta Jesus Kristus!
24 Hatengeran ni uhur do Ia, na mandilo nasiam, anjaha pasaudon-Ni do in.
25 Nasiam sanina, tonggohon nasiam ma hanami.
26 Padas nasiam ma tabi bani haganup sanina in marhitei summah na mapansing.
27 Hupindo ma bani nasiam halani Tuhan in, pabasahon nasiam surat on bani haganup sanina.
28 Idop ni uhur ni Tuhanta Jesus Kristus ma mangkasomani nasiam!
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA