Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'Esa moi riaka dodoto, koiparaluuwa ngomi miolefosi nginika ma ngale muruoka de kokia ma 'orasi ma Jou Yesus 'asa woboali.

² Sababu ngini ma sirete nianako 'iti-tiai 'ato ma Jou Yesus woboali ma 'orasi ya'adono, 'isoka yotosi-tosiki yoboa 'o obiri ma doda so komoiwa yosidongoo.

³ Gee 'o nyawa dua yongose 'ato, "'Iodumu kai'ama-'amani de kaisa-sanangi," de ge'enau ma 'orasi dua kayasorogano 'ona posironga yosangisaraka, matero kamimoi mokasiri gee momaku'arenou. De 'ona 'asa koya'akunuwa yomasimada 'o sangisaraka ge'ena.

⁴ Ma ngini ge'ena nio'ahu ka 'o darusokawa ma ngale wininako ma Jo'oungu ma Dutu, so ngini konitodokanuwa gee ma Jou wi bo-boa ma 'orasi ge'ena ya'adono 'isoka yotosi-tosiki yoboa.

⁵ Sababu ngini nioodumu nio'ahu 'isoka 'o darangioka ma ngale nia 'ahu 'isure de 'itebini. Ngini ge'ena to ma Kristus 'awi nyawa de nio'ahu matero ka 'o darangioka. Ngone nanga 'ahu koimaterowa de 'o nyawa gee 'o dorou yodi-diai so yo'ahu matero ka 'o darusoka.

⁶ Ge'enau so ngone 'uwa 'isoka 'o nyawa 'iregu la kayoma'idu-'idu ma ngale koyomadudu-duanguwa. Ngone salingou pomadudu-duanga de pomanako-nako la 'o Yesus woboali 'ena ngone pomadudu-duanga.

⁷ 'O nyawa gee kayoma'idu-'idu 'o obiruku de 'o nyawa gee kayaki'eto-'eto 'o obiruku ma ngale koya'akunuwa manga nyafisuu 'ena koma'iwa yomadudu-duanga.

⁸ Duga ngone po'ahu 'isoka 'o wange ma ginitaroka ma ngale nanga 'ahu yaowa de 'itebini. De ngone salingou pomasitiari la pa'akunu papareta nanga nyafisuu de nanga roese. Ngone salingou tatapu powingaku ma Jou de pakidora 'o nyawa 'iregu, de pongano-nganonou 'ato ma Jo'oungu ma Dutu dua wonasilaha. Ge'enau 'imadadi to ngone nanga sawaunu palawani 'o darusu ma pareta.

⁹ Sababu ma Jo'oungu ma Dutu wona'asoko ngone ge'ena ma dumutu kowonahukumuwa, ma 'ena wonasilaha ma ngekomo ma Yesus Kristus to ngone nanga Jou.

¹⁰ 'Una wosongenokau sababu wonariwo ngone, la dua ngaro woboali 'ena ngone kapowango-wangosi bolo posongenokau ma ngone 'asa po'ahu de de 'una.

¹¹ Ge'enau so salingou kaitaurika nimasikababata de nimasikakuata nia singina de nia ngo-ngaku 'isoka ma 'orasi ne'ena naga niadi-diai.

¹² 'Esa moi riaka dodoto, ngomi mioga'asoko la ngini niakihoromati 'o nyawa gee yoma-manarama naga nginioka ma ngale niriwo de nisidotoko ma Jou wi demo; ge'ena la 'ona gee ma Jou wakiirikokau ma ngale nisibalusu de nidongose.

¹³ De salingou posironga niakikalesangioka de niakidora sababu 'o sagala moi-moi gee yadi-diai. Salingou 'uwa niomaogo-ogoro niomaka'asa yaowa-owa.

¹⁴ 'Esa moi riaka dodoto! Ngomi mioga'asoko mita la niakitawanono 'o nyawa gee yakite-tebeturu, de niakiriwo niakisikuata 'o nyawa gee yakimodo-modongo, niakiriwo 'o nyawa gee salingou niakiriwo, de niosabari 'o nyawa 'iodumika.

¹⁵ Niomajaga la 'uwa sigado naga 'o nyawa 'o dorou yodiai nginika de niosibalasi ka 'o dorouoli. Salingou kaitaurika niodiai yaowa-owa moi de moika naga nginioka, de mita 'o nyawa 'iodumika.

¹⁶ Salingou kaniomore-morene,

¹⁷ de kaitaurika niolahidoa.

¹⁸ Ngini salingou kaitaurika nio'amalaha ma Jo'oungu ma Dutuka ngaro 'okia naga bato 'idadi ma, sababu ge'enau ma Jo'oungu ma Dutu woduaka niadiai nia 'ahu ma sigoronaka ngini gee nimari-rimoi de ma Kristus Yesus.

¹⁹ 'Uwa niatatoko 'o Ngomasa 'Itebi-tebini,

²⁰ de 'uwa niositi-tingoono 'o habari gee yongose 'ato 'o Ngomasa 'Itebi-tebinino.

²¹ Ma 'o demo-demo 'iodumu ge'ena salingou niatibangi niosidi-diai. La nako ma Jo'oungu ma Dutuno ge'ena niamoteke.

²² 'Iso de 'o dorouou ge'ena salingou nimasiresene niakurutika.

²³ Tanu ma Jo'oungu ma Dutu gee wonakula-kulakau 'o sanangi, winidiai 'ania singina 'itebini 'isoka to 'unali. Tanu ma Jo'oungu ma Dutu wapaliara nia 'ahu, nia singina de nia roese la ma 'orasi ma Yesus Kristus to ngone nanga Jou woboali 'ena to ngini 'ania sala koi'iwa.

²⁴ Ma Jo'oungu ma Dutu gee wini'aso-'asokokau ngini, 'una 'asa wadiai koge'ena sababu 'una kowoelu-elukuwa so 'okia naga wojajiokau ge'ena dua 'idadi.

²⁵ 'Esa moi riaka dodoto! Mioga'asoko la ngini mita minisilahidoa ngomi.

²⁶ Nimakatabea de nia dora ngini nioodumu gee niongaku-ngaku 'o Yesusika.

²⁷ De ma Jou Yesus 'awi kuasa, ngoi toga'asoko tosidemogaroku la ma surati ne'ena niakidabaca 'o nyawa yongaku-ngaku yoodumika.

²⁸ Ngoi toga'asoko tanu ma Yesus Kristus to ngone nanga Jou winisibarakati. Ngoi 'o Paulus, tinitabea!

1 Tesalonika

Video 1 Tesalonika 5

Ikuti Kami:

KONTAK | PARTISIPASI | DONASI