Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ratnan amung-amung karebneh, O kinanak-kinanakku, na ulek ruen ngayud kuan muyuh.
2 Ngaceku muyuh sebuleng pangeh kali' dengan megala' idi Aco Tuhan ineh macing mepad kudeng lun mano kareb medacem.
3 Kareb lemulun pebala, "Pelaba do' ali idi do' udeng," idi denak-denak até macing kuandeh, mepad kudeng luk mét nenganak kuan seburur decur luk mali'. Idi na tu-tu ideh miak muit bururdeh.
4 Iamo' muyuh ini, O kinanak-kinanakku, na muyuh ineh tudo bang dacem, pad aco ineh macing nemuyuh mepad kudeng lun mano.
5 Amung-amung muyuh anak-anak acang idi anak-anak aco. Tau ini baken ratnan malem idi ratnan medacem.
6 Ngaceku ineh, do' tau na rudap mepad kudeng lun baken, iamo' do' tau matar idi ngerawé-ngerawé.
7 Lemulun rudap kareb medacem, idi lemulun mabuk kareb medacem teh.
8 Iamo' tau ini luk ratnan aco. Do' tau kulat idi ngayung ku kuyu' belawan, ieh ineh anu idi awa, idi ngayung ku tupi, ieh ine rapet miak ngalap ulun.
9 Ngaceku Allah nemili' netau baken pad tau medereh ku usehNeh, iamo' pad tau miak ngalap ulun ratnan Tuhan tau Yésus Keristus,
10 luk naté ngaceku tau, pad kareb tau mulun idi maté pana', tau mulun pad-pad denganNeh.
11 Ngaceku ineh, ngubuk seburur dengan seburur idi ngepicet seburur dengan seburur, mepad kudeng luk inau' muyuh teh.
12 O kinanak-kinanakku, kai mutuh nemuyuh ngerawé lemulun luk merur ngakem arang muyuh, idi luk nguyut nemuyuh bang Tuhan, idi luk mada' nemuyuh.
13 Do' muyuh ngedita' nedeh tu-tu dengan awa ngaceku ratnan kekamendeh. Idi do' muyuh pedo' seburur dengan seburur.
14 O kinanak-kinanakku, kai mutuh nemuyuh mada' lemulun luk mekupé, ngetueh lemulun luk metalang niat, ngubuk lemulun luk melaya', idi mulai niat kuan amung-amung lemulun.
15 Matar do'-do'! Aleg seburur pana' ngua' luk dat dengan luk dat kuan seburur lemulun pana', iamo' megéi' nakap luk do' seburur kuan seburur idi kuan amung-amung lemulun.
16 Do' muyuh megéi' mawang niat,
17 idi sembayang dengan na melawa',
18 idi maré ubur ratnan luk amung-amung, ngaceku ini pian Allah bang Keristus Yésus kuan muyuh.
19 Aleg ngilep Roh ineh,
20 idi aleg ngebeneh bada' luk biré Tuhan.
21 Do' muyuh ngiti luk amung-amung, idi luk do' miak itin muyuh;
22 ngado burur muyuh ratnan amung-amung ayu luk dat.
23 Idi do' Allah, luk lawa awang ineh, ngeligan nemuyuh dengan petap; idi do' roh idi ulun idi burur muyuh uen ngasa' dengan petap idi na mesala', kareb acing Tuhan tau Yésus Keristus.
24 Allah luk nenawar nemuyuh miak nganau' amung ineh ngaceku Ieh lutep maya' jani'.
25 O kinanak-kinanakku, sembayang kuan kai.
26 Tabi' kuan amung-amung kinanak dengan pebuen luk meligan.
27 Ui mutuh tu-tu nemuyuh dengan ngadan Tuhan, pad surat ini uen maca' kuan amung kinanak luk manu.
28 Do' katu Tuhan tau Yésus Keristus ngedengan nemuyuh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA