Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali a’i-a’i, taa parlu ratulisika komi mangkonong ewa wimba kasaenya panewa ratamo temponya i Pue mula maporenta ri lino. Apa komi mangansani kojo seja ane tempo to etu, karatanya raporapaka ewa to palima to rata ri raya mburi. Apa taa nansani ntau tempo danakarata etu.
2 (5:1)
3 Wali tempo etu tau tongonya manganto’o, “Kita tuwu masanang pasi tare to damampakaja’a kita.” Ewa wetu nato’o ntau, pei tempo etu semo kodi majoli sira darapakaja’aka yau pasi sira tare jaya mampiyaika palaong to etu. Palaong etu raporapaka ewa tau we’a to damoana, apa ane tau we’a etu kodi majoli ia mangepe makiki komponya pasi taa seja re’e jaya mampiyaika ntidanya etu.
4 Pei a’i-a’i, komi si’a ewa tau to maroo ri raya ngkawuri, to kayopo naika nto palima to rata resi sira. Apa komi taa dakayopo ane ratamo temponya i Pue mula maporenta ri lino.
5 Apa komi samparia paka ewa tau to maroo ri kareme pasi bae eo apa ane kita to mangaya, kita paka ana i mPue Allah pasi Ia reme semo. Kita si’a ana ngkawuri.
6 Wali ane ewa see, ne’e kita mangika ewa tau to yusa to raporapaka ewa tau to ojo yore-yore. Anu kita mangika ewa tau to manaa pasi to nakurang manganta’amaka rayanya.
7 Apa tau to yore, ri raya mburi semo nakayore. Pasi tau to kayangu naika ntule, ri raya mburi seja nakakayangu.
8 Pei kita si’a raporapaka ewa tau to maroo ri raya ngkawuri etu. Kita raporapaka ewa tau to maroo ri bae eo. Wali anu kita manta’amaka rayanta. Pasi anu kita mangampake pangayanta pasi pamporayanginta damangajagai koro ngkita, ewa naika ntentara mangampake baju besi mangajagai dadanya. Pasi kita mansarumaka i Pue damampalaes kita. Wali anu kita mangampake pansarumakanta etu damangajagai pampobuuka ngkita ewa naika ntentara mangampake songko besi mangajagai wo’onya.
9 Wali kita taa moru mampobuuka kama’i i ngKerisitu, apa si’a songka i mPue Allah kita darahuku. SongkaNya kita darapalaes saba yako palaong to naika i Yesu Kerisitu, Pue ngkita.
10 Apa i Yesu Kerisitu roomo mangkapateka kita see kita maya tuwu sindara-ndara pei Ia. Nempo kita tiroo tuwu tempo Ia ma’i, pasi nempo kita roomo namate yau, tare pasisalanya. Kita paka datuwu sindara-ndara pei Ia.
11 Wali apa saba ewa wetu mawali resi kita, see naka pakapolas palaong to komi mangika si’i-si’i, etu semo masipakaroso raya ngkomi pasi masipakaroso seja pangaya ngkomi.
12 Wali a’i-a’i, kami mamporapika resi komi see komi manga’angga penatua-penatua to maroso palaonginya mangansawang komi. Apa sira semo to napilis i mPue mampasilonga komi pasi sira semo to mampaposiaka komi.
13 Wali angga kojo sira pasi porayang sira apa saba palaong to naika nsira. Pasi tuwu masingkatao.
14 Pasi a’i-a’i, re’e wo’u to kami mamporapika kojo resi komi. Etu semo, patiendoka tau to bo’onya mapalaong, pakaroso raya ntau to meka-meka rayanya, sawang tau to mayu’u pangayanya, pasi pakabae sabara resi tau samparia.
15 Pasi jagai kojo see tare komi to mansawa ane re’e tau to mangika maja’a resi komi. Pei sangkani liwu jaya mangika anu to manoto ri oyo ngkomi pasi resi tau samparia.
16 Wali nempo bara kesaa to mawali, pakandende raya ngkomi.
17 Pasi ne’e mandoo makai-kai resi i Pue Allah.
18 Pasi nempo bara kesaa to mawali, to’oka i Pue Allah tarima matao, apa etu semo pamporani i mPue Allah resi kita to samba’a pei i Kerisitu Yesu.
19 Kasimbalinya yako etu, ne’e manta’amaka palaong i Nosa Mapasing.
20 Pasi ne’e seja mangkaengas gombo nto pantuntu tuntu i mPue Allah.
21 Pei paresa samparia gombo to nato’o ntau to mampotunde komi see mampakanasa bara singkonong pei tuntu i mPue Allah bara taa. Panewa pake anu to bae batuanginya,
22 pei pakalongko yako ponto ngayanya to maja’a.
23 Wali kami makai-kai resi i Pue Allah to mangawaika kita kasanang see Ia mampasilonga komi see kanjo’u-njo’u kaboro-boros komi mangika lengko to masipato naika ntau to Ia Puenya. Pasi kami makaikai seja see Ia mangararamaka komi see tonii ngkomi, raya ngkomi, pasi koro ngkomi, samparia paka tare to maya rato’o sala ane ratamo temponya danakama’i i Yesu Kerisitu, Pue ngkita.
24 Wali i Pue Allah, to mampokio komi, Ia damangika kojo palaong to etu, apa Ia masipato rasarumaka.
25 Wali a’i-a’i, kami mamporapika resi komi pokai-kaika kami.
26 Pasi to’oka samparia pua’i to samba’a pangaya kami taa mangkalingan sira. Pasi tempo komi manganto’oka sira etu, manganengu sira apa kita sintua’i ri raya mpangaya.
27 Wali aku re’e patuu yako resi i Pue to dakuto’oka komi, etu semo basaka sura mami si’i resi samparia pua’i to i Pue Allah Puenya.
28 Wali kami makai-kai resi i Yesu Kerisitu, Pue ngkita, see Ia mampaponsanika komi kanotoNya. Amin. Ungkanyamo ruyu gombongku si’i.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA