Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'Esa moi riaka dodoto 'o Tesalonika ma jamati, gee niodadi nanga Dea ma Jo'oungu ma Dutu 'awi kawasa de to ma Jou Yesus Kristus 'awi kawasa. Ngomi ge'ena la 'o Paulus, 'o Silas de 'o Timotius mioga'asoko la tanu ma Jo'oungu ma Dutu winikula 'o barakati de 'o sanangi.

² Ngomi kaitaurika mio'amalaha ma Jo'oungu ma Dutuka, sababu ngini 'Esa moi 'ania gokoie de nia gogeruku yaowa. Miolahidoa ma Jo'oungu ma Dutuka nanga Dea gu'una, ka ma noimi kaminingano-nganono so kaitaurika minisilahidoa ngini. Ngomi kamiongano-nganono kokia ngini niosidumutu 'ania manaramoka 'ato ngini niongaku ma Kristusika, kokia ngini niakidora 'o nyawa 'ireguka sigado niakileleani, de kokia ngini nimasinganono ma gou-goungu ma Yesus Kristusika to ngone nanga Jou.

³ (1:2)

⁴ 'Esa moi riaka dodoto ma Jo'oungu ma Dutu winisiboso-bosono, ngomi mianako ngini ge'ena ma Jo'oungu ma Dutu winiiriokau la winileleani.

⁵ Sababu ngomi miositotara 'o Habari ma Owa nginika, duga ka de mia demo-demowa ma de 'o Ngomasa 'Itebi-tebini ma kuasa. De ngomi posironga miongakuoka 'ato 'o Habari ma Owa ge'ena ma gou-goungu 'itiai. Ngini nianako kokia ngomi mio'ahu ma ngale miniriwo ngini, ma 'orasi ngomi mio'ahu nia sigoronaka.

⁶ Ngini niamotekokau kokia naga to ngomi mia 'ahu de mita kokia naga ma Jou wi 'ahu. Ngaro ngini posironga nihalebiruoka de posironga niosangisaraka, ma ngini kaniomore-morene niadawongo 'o Habari ma Owa gee ngomi miositotara nginika. 'O morene ge'ena 'o Ngomasa 'Itebi-tebinino.

⁷ De ge'enau so 'o nyawa yongaku-ngaku 'o Makedoniaka de 'o Akhayaka yoodumu yomaduru nginioka.

⁸ Sababu nginiou so 'o habari ma ngale ma Jou 'itotarokau sigado 'o Makedoniaka de 'o Akhayaka. De kage'enawa duga; so 'ena 'o habari ma ngale kokia ngini niongaku ma Jo'oungu ma Dutuka ge'ena 'o nyawa kiaka naga bato yakokinakokau, sigado ngomi koiparaluuwau miangosesi ge'ena.

⁹ 'O nyawa go'ona yoodumu yobi-bicara ma ngale kokia ngini minidawongo ngomi gee ma sira ngomi mioboa nginino. 'Ona yobi-bicara ma ngale kokia ngini niamada 'o barahala de nioboa ma Jo'oungu ma Dutuka gee wowango-wango ma ngale winileleani 'una.

¹⁰ 'Ona yabi-bicara mita ma ngale kokia ngini nioda-damaau ma Jo'oungu ma Dutu 'awi Ngowaka woboali daku 'o sorogaaka de wauku, ge'ena la 'o Yesus gee ma Jo'oungu ma Dutu wisimomikokau ngaro wosongenukou ma. 'O Yesus gu'unau mita gee wonasipidi-pidili ma Jo'oungu ma Dutu 'awi gorosauoka gee dua 'iboa.

1 Tesalonika

Video 1 Tesalonika 1

Ikuti Kami:

KONTAK | PARTISIPASI | DONASI