Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Semeton senamian jemaah lẽq Tesalonika, saq jari dengan-dengan saq tehususang bagi Allah Bapa dait Junjungan Saq Mulie Deside Isa Almasih! Tiang pade Paulus, Silas dait Timotius beharep semoge Allah ngicanin side pade rahmat dait damẽ sejahtere.

² Tiang pade tetep besyukur tipaq Allah lantaran side pade selapuq. Sebilang tiang pade bedo'e tipaq Allah dait Bapante, tiang pade tetep inget lẽq side pade. Tiang pade tetep do'eang side pade. Tiang pade inget berembẽ perbuatan imande, usahe kasihde dait ketekunan pengharepan side tipaq Junjungante Saq Mulie Deside Isa Almasih.

³ (1:2)

⁴ Semeton senamian saq tekasihin siq Allah, tiang pade nenaoq bahwe Allah sampun milẽq side pade.

⁵ Sẽngaq tiang pade nyampẽang Kabar Solah lẽq side ndẽqne siq ucapan-ucapan doang, laguq ẽndah siq kuase dait siq Roh Suci. Dait tiang pade yakin gati lẽq kebenaran Kabar Solah nike. Side pade nenaoq berembẽ tiang pade begawẽan sewaktu tiang pade araq lẽq tengaq-tengaq side pade.

⁶ Side pade turut teladan tiang pade dait teladan Tuhan. Timaq side pade sanget menderite, side pade gembire nyambut manik saq tiang pade beriteang tipaq side. Sukecite nike teicanin siq Roh Suci.

⁷ Siq care nike side pade jari conto lẽq selapuq dengan saq percaye lẽq Deside Isa Almasih saq araq lẽq Makedonia dait Akaya.

⁸ Sẽngaq mulai lẽman side pade, manik Tuhan sampun nyebar jangke dateng Makedonia dait Akaya. Dait ndẽqne cume nike doang; malahan berite mengenai iman side pade tipaq Allah sampun nyebar ẽndah ojok mbẽ-mbẽ, sehingge tiang pade ndẽq perlu malik ngeraos napi-napi.

⁹ Selapuq dengan nike ngeraos mengenai berembẽ side pade nerimaq tiang pade sewaktu laẽq tiang pade dateng ojok side. Ie pade ngeraos mengenai berembẽ side pade bilin berhale-berhale dait dateng tipaq Allah saq idup dait kenaq jari ngabdi lẽq Ie.

¹⁰ Ie pade ngeraos ẽndah mengenai berembẽ side pade ngantih kerauhan Bije-Ne lẽman sorge, Deside Isa, saq sampun teidupang siq Allah lẽman ninggal. Deside Isa nike ẽndah saq nyelametang ite lẽman murke Allah saq gen dateng.

1 Tesalonika

Video 1 Tesalonika 1

Ikuti Kami:

KONTAK | PARTISIPASI | DONASI