Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Manga anạ u sěmbaụ jamạat'u Tesalonika, nakoạ umat u Mawu Ruata i Amang, dingangu Mawu Yesus Kristus: I kami těllu, i Paulus, Silas dingangi Timotius mẹ̌lẹ̌harapẹ̌ u mal᷊owọko Mawu e měngonggọu al᷊amatẹ̌ dingangu karal᷊unsemahẹ̌ si kamene kěbị.
2 I kami e mang taghal᷊ẹ̌ makịtarimakasẹ su Mawu Ruata ual᷊ingu i kamene kěbị. Suapan pẹ̌kakal᷊iomaneng i kami su Ruata ringangu i Amang i kitẹ e, ute mang tawẹ pontode mẹ̌tahěndung si kamene. I kami e měngkate hanesẹ̌ mẹ̌kẹ̌kal᷊iomaneng i kamene. I kami mẹ̌tẹ̌tahěndung kereapa i kamene měnodẹu munaram pangangimang i kamene si Kristus, karadiahangu kakěndag'i kamene su taumata wal᷊ine kụ mẹ̌tangkiang si sire, ringangu kereapa katoghasu pělaharap'i kamene su Mawung kitẹ Yesus Kristus.
3 (1:2)
4 I kami masingkạ, manga anạ u sěmbaụ u Ruata e kụkěndag'i kamene ringangu seng němile si kamene nakoạ tataghuanenge těntani.
5 Batụu i kami e mělẹ̌habaru Injilẹ̌ si kamene wal᷊inewe tumbạu ringangu wawera e, kaiso mal᷊aing ual᷊ingu kawasa ringangu Rohkẹ̌ u Ruata. Dingangu i kami e maiaking kahěngang su katul᷊id'u injilẹ̌ e. I kamene hala masingkạu kereapa pẹ̌bawiah'i kami e gunang kamene piạ i kamie ene sutal᷊oarang kamene.
6 I kamene tụtol᷊ewe laahạ i kami ringangu laahạ u Mawu. Maningbe i kamene e tumanịu masigěsạ kai i kamene mamben něnarimạu naung mal᷊uasẹ̌ habarẹ̌ ipẹ̌paul᷊ị i kami e si kamene. Dal᷊uasẹ̌ ene ute kai nịlaonggọ u Rohkẹ̌ u Ruata.
7 Ual᷊ingu ene ute i kamene kai nakoạ kakakěllaěng'u kěbị taumatan Sahani su Makedonia ringangu Akaya.
8 Batụu nanětạ bo'i kamene, habar'u mạul᷊ịu Mawu e seng nakeke sol᷊ong Makedonia ringangu Akaya. Dingangu wal᷊inewe kětạu ene samatang; maal᷊ạ katewe habaru mạanung kereapa pangangimang i kamene su Mawu Ruata e seng nakeke suapan tampạ, hakịu i kami e sen tawahal᷊uasu lai mẹ̌berang manga apa.
9 Kěbị taumata ene mẹ̌bẹ̌bisarang kereapa pěnanarimạ i kamene piạ i kami e nạung kal᷊imona e riměnta su anung kamene. I sire měbẹ̌bisarang kereapa i kamene naněntangu kal᷊awọu mahan duata kụ diměnta su anun Mawu wiahẹ̌ mang sěmbaụ mědeạu mẹ̌těngkasatia si Sie.
10 I sire mal᷊aing mạhumbisara měnsang kereapa i kamene mělẹ̌harap'u rarěntan Ahus'u Ruata wọu sorga, kụ i Yesus, seng niapẹ̌biahẹ̌ kapia wọu kapapohonge. I Yesus ene mal᷊aing něngambang si kitẹ bọu ral᷊angehu Ruata e sarung.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA