Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ale kam Sasaraina, sapaamian Tessalonika, sibailiu sapaamian Ukkui Taikamanua, samba Tuhan Jesus Kristus. Kai telumai néné, iaté aku si Paulus, si Silas sambat si Timoteus, bulat kukaroni kai baga, bulé ipanukani samba ibujai kam Taikamanua.
2 Sarat masikua surá ka tubut Taikamanua lé kai, kalulumui sangamberimui. Sarat kurepdem lé kai kam, ka bagat paniddogatmai ka tubut Ukkuita Taikamanua. Bulat tá muaari kutiddouaké kai kam ka tubut Ukkui. Sarat kurepdem lé kai kipangan putotonem bagamui ka tubut Kristus ka sipatoilámui ka sigalaiakenenmui, samba kipangan punununtut bagamui, ka tubudda saaleimui sirimanua; pat oi nupasikeli kam sia, samba kipangan puroron pukakaronanmui baga, ka tubut Tuhan Jesus Kristus.
3 (1:2)
4 Tubut ai lé kuaagai kai, ale kam Sasaraina, pukakatekina kam baga Taikamanua, samba pipiliyna kam, bailiu bakkatnia sikokoiakenen nia.
5 Aipoí akupakakra kai Katuareman Simaerú ka tubumui, tá sarat nga-nga, tápoi sialei gege samba Ketsat Sipunenan. Oto bulat matonem bagamai pububulat sibulatnia Katuareman Simaerú néné. Bulat siagaiatmuian leú, kipa galai tubumai mugalai kalulumui, ka tetret ai peilé kai mukukuddu, ka talagamui.
6 Anuului kam paraboatmai samba galai tubut Tuhan. Kenanen mabesí tubumui mangorik, tápoi mariu-riu lé angkat bagamui masisiló Katuareman Simaerú, sisegéakenenmai, ka tubumui. Amasipagora bagamui, iaté Ketsat Sipunenan.
7 Oto aibailiuan kam uluiet, ka tai Kariten sikukuddu ka Makedonia samba ka Akaya.
8 Aipoí sibara ka kam, mararatnangan Katuareman Simaerú pagalaiat Tuhan, pat aili ka Makedonia samba ka Akaya. Ialeú et tá sarat nenda, tápoi beri leú et pagalaiat putotonem bagamui ka tubut Taikamanua, amaarep'an ka senen laggai, bailiu táan leú anai lulunia kukua kai ka kai, apa pá.
9 Arapungu-nguan'akéan sangamberidda, kipa anuperú kam, aioi anusiló kam kaooimai, ka tetret akuoi kai siburú, ka talagamui. Ratiboi kipa anupaerú kam, anugalak'aké kam arat sabulungan, anuei kam kam ka tubut Taikamanua sibulatnia, sipuririmanua bulé nupaniddogi kam nia.
10 Samba leú et bagei arapungu-nguan'aké, kipa riu-riunia nukaroni kam baga, kaoijanan Togat Taikamanua sibara ka manua, iaté sipuoni Jesus, sisuruakenen Taikamanua, ka simamatei. Oto Jesus néné leú te masisasakkeri sita, ka golut Taikamanua, ka gogoi sibabara.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA