Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali re’e to aku rani manganto’o mangkonong nae to roomo rapampueka resi tau-tau. Wali monso pu’u samparia kita manasa ri raya ngkita mangkonong nae to etu. Pei apa saba manasa kita mangkonong nae etu see naka re’e tau to mawali mangei. Wali to baebae batuanginya kita mamporayang sa’e. Apa kanasa mangkonong nae etu ojo mangampakabae dada ntau, pei pamporayang mampakaroso raya ntau.
2 Wali re’e tau to mampobuuka, “Boros to manasa resi aku”, wali kamonsonya tau etu tawa mangansani ewa wimba raika mangarata kanasa.
3 Pei tau to mamporayang i Pue Allah, tau etu nansani i mPue Allah.
4 Wali ane mangkonong nae to roomo rapampueka resi tau-tau etu, wimba, kita bara matao mangkoni? Kita mangansani tau-tau tare batuanginya ri lino si’i, pasi i Pue Allah Ia samba’aja, tare pue kasimbalinya yako Ia.
5 Kamonsonya re’e to nato’oka ntau “allah”. Boros kojo to ndate yangi pasi to ri wawo lino to nato’oka ntau “allah” pasi “pue”.
6 Pei nempo ewa see, ane resi kita samba’aja i Pue Allah, Pa’a. Ia semo pu’unya samparia anu to re’e. Pasi naka pei kita tuwu see kita damawali Ia Puenya. Pasi samba’aja seja i Pue, etu semo i Yesu Kerisitu. Wali Ia semo to nawaika i mPue Allah mampapowali samparia anu to re’e, pasi yako resi Ia semo naka pei kita re’e katuwunta.
7 Pei taa samparia tau mangansani anu to aku owo room manganto’o etu. Re’e tau to tempo ruyu mananya mampue resi tau-tau pasi rataka ri tempo si’i ane sira mangkita nae to roomo rapampueka resi tau-tau etu, wali sira mampobuuka, “Nae etu tau-tau puenya.” Wali ane sira mangkoni nae etu sira mangepe sala apa raya nsira tawa maroso pangayanya.
8 Pei kamonsonya pangkoni taa mangkeni kita ri awe i mPue Allah. Nempo kita taa mangkoni pangkoni etu, kita taa rugi. Pasi nempo kita mangkoni, kita tare tidugang karasinta ri pangkita i mPue Allah.
9 Pei pakatao kojo komi to taa mangepe sala ri rayamu mangkoni pangkoni etu, see komi taa mawali ewa watu to rakatisumpul resi tau to tawa maroso pangayanya.
10 Wali batuanginya ewa si’i. Rapanya re’e komi to manasa ewamo nae to rapampueka resi tau-tau, nae etu ojo nae biasa semo. Wali see naka komi yau mangkoni nae etu nja’u banua to napampueka ntau resi tau-tau. Panewa tempo komi mangika palaong etu komi nakita ntau to tawa maroso pangayanya, wali komi ojo mampakaroso raya ntau etu see ia damangkoni seja nae etu.
11 Pei apa saba tau etu tawa manasanya mangkonong nae etu si’a kamonsonya tau-tau puenya, see naka ia mangepe madosa mangkoni nae etu apa ia tawa maroso pangayanya. Wali ane ewa see, anu to manasa resi komi ojo mampakaja’aka yau pangaya nu a’i ngkomi to roomo seja nakapateka i ngKerisitu ia.
12 Wali ane komi mampakaja’a pangaya nu a’i ngkomi ewa wetu, batuanginya komi mangika dosa resi ia. Pasi ane ewa see kamonsonya komi mangika dosa resi i Kerisitu.
13 Wali see naka kuto’oka komi, ane aku mangkoni nae to roomo rapampueka resi tau-tau, panewa palaong etu mawali ewa watu to rakatisumpul resi pua’ingku to samba’a pangaya naka pei sira mangika dosa, ane ewa see aku tamo kojo damangkoni nae etu. Apa aku taa rani pua’ingku mangika dosa apa saba palaong to nikangku.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA