Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mangkin mengenai keloran saq teaturang tipaq berhale. Mule kenaq maraq basen dengan bahwe, "Ite selapuq sampun bedowẽ penenaoq." Kepinteran miaq dengan jari sombong, laguq kasih pesolah dengan.

² Dengan saq beranggepan bahwe ie bedowẽ sopoq penenaoq, setetune ndẽqman nenaoq sedalem-dalemne.

³ Laguq dengan saq tetu-tetu ngasihin Allah, ie tekenal siq Allah.

⁴ Mengenai masalah ngelor keloran saq sampun teaturang tipaq berhale, ite nenaoq bahwe ndẽq araq berhale lẽq dunie. Dait ite nenaoq ẽndah bahwe Allah cume sopoq; ndẽq araq saq lain.

⁵ Mule luwẽq ẽndah napi saq tesebut dẽwe; saq araq lẽq langit dait saq araq lẽq gumi.

⁶ Laguq bagi ite, Allah cume sopoq. Ie Bapa saq cipteang selapuq-lapuqne, dait ite idup umaq Ie. Dait Tuhan cume sopoq ẽndah, nike Deside Isa Almasih. Langan Ie selapuq hal tecipteang, dait lantaran Ie make ite idup.

⁷ Timaq maraq nike, ndẽqne selapuq dengan nenaoq hal nike. Araq dengan saq lantaran masih terus nyembah berhale, ngelor keloran nike sebagẽ keloran saq sampun teaturang tipaq berhale. Sehingge atẽ nurani ie pade saq lemah merase jari kotor.

⁸ Setetune keloran nike ndẽqne miaq hubungante kance Allah jari sayan rapet. Lamun ite ngelor keloran nike, ite ndẽq mauq keuntungan napi-napi. Sebalikne lamun ite ndẽq ngelor keloran nike, ite ẽndah ndẽq rugi napi-napi.

⁹ Laguq, onyaq-onyaq! Ndaq jangke telaksane bahwe dengan lain jari bedose -- lantaran keyakinanne ndẽqman kuat -- sẽngaq side pade bẽbas ngelaksaneang napi juaq.

¹⁰ Maksut tiang maraq niki: Misalne side pade, saq bedowẽ penenaoq saq kuat, kenyeke tokol bekelor lẽq kuil berhale. Beterus araq sopoq dengan serioq side pade tokol bekelor lẽq derike. Lamun keyakinan dengan nike ndẽq kuat, make side pade gen miaq dengan nike bani ẽndah ngelor keloran saq sampun teaturang tipaq berhale nike.

¹¹ Dait lantaran nike, make penenaoq side pade miaq dengan saq keyakinanne ndẽq kuat jari sesat. Padahal Almasih ninggal umaq dengan nike ẽndah.

¹² Dait lamun side pade piaq dose maraq nike tipaq semeton-semetonde -- artine side pade nyẽdaq keyakinan ie pade saq lemah -- make side pade bedose tipaq Almasih.

¹³ Keranaq nike, lamun keloran jari penyebap semeton tiang bedose, make tiang ndẽq gen mẽlẽ gati ngelorang daging selaẽq-laẽqne. Sẽngaq ndaq-ndaq semeton tiang bedose lantaran tiang.

1 Korintus

Video 1 Korintus 8

Ikuti Kami:

KONTAK | PARTISIPASI | DONASI