Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali to tao-tao kami napobuuka ntau to papolaong i ngKerisitu. Pasi kami nasarumakaka i mPue Allah mampakarebaka karebaNya to tawa nansani ntau boros.
2 Wali tau to nasarumakaka nsa’e mangika palaonginya, tau etu taa maya taa mangika palaonginya etu see miyala resi sa’e ia maya kojo rasarumaka.
3 Wali wimba aku, bara maya rasarumaka? Ane komi mangabotus lengkongku manganto’o bara matao bara taa, taa mawei resi aku. Pasi bara i sema to pobotus nto lino to mangabotus aku, taa mawei resi aku. Pasiwa aku seja, aku taa mangabotus palaongingku bara matao bara taa.
4 Apa rayangku taa mangepe sala ri tango i mPue Allah, pei si’a rayangku etu to manganto’o aku tare dosangku. I Pue semo to pobotusngku.
5 Wali ne’emo mangabotus lengko nsa’e bara matao bara taa apa tawa rata temponya to napilis i mPue Allah rapangabotus. Peas kama’i i mPue apa Ia semo to damampaporaoka anu to taa miyala. Ia semo to damampaponsanika samparia songka to re’e ri raya ntau. Wali ri tempo etu i Pue Allah damangabarong kita samba’a pei samba’a ane re’e palaong ngkita to masipato rabarong.
6 Wali a’i-a’i, samparia anu to aku room manganto’o etu kono seja kami dua i Apolos. Wali aku mangampake kami dua ewa tondong resi komi see yako tondong etu komi maya mawali manasa batuanginya gombo to ratulis to manganto’o, “Ne’e raliunaka anu to ratulis.” Apa ane komi manasa mangkonong to ratulis, etu semo ri raya ntuntu i mPue, ane ewa see komi tare to damangei pasi damanganto’o, “Aku mangalulu tau to si’i pei korom ojo mangalulu tau to etu.”
7 Wali gete komi to manganto’o ewa wetu, sema nangokotaka komi mawali to bae batuanginya? Kesaa to re’e resi komi to si’a i Pue Allah nangawai? Tare. Samparia anu to re’e resi komi paka i Pue semo mangawaika. Wali maka pei komi tabaro ewa tau to mangarata kasugi yako ri palaong to si iaja?
8 Wali komi samparia mampobuuka gana anu to re’e resi komi. Pasi komi mampobuuka komi sugi kojo ane mangkonong sora to yako resi i Nosa Mapasing. Komi mampobuuka seja komi roomo mawali makole-makole pei kami tawa. Gete, ane monso pu’u komi mawali makole, matao kojo, apa ane ewa see kami mawali seja makole sindarandara pei komi.
9 Pei ane ewa pampobuuka to si aku, i Pue Allah room mangika kami to rato’oka pomakau i mPue Yesu see kami mawali kodi kojo angga ri pangkita nto lino. Kami ewa tau to room rahuku damate ri tango ntau boros, apa samparia anu to re’e ri lino mangalo’a-lo’aka kami, etu semo to lino pasi pomakau i mPue Allah to mangalo’aka.
10 Wali kami napobuuka nto lino tau bea apa kami mampakarebaka kareba mangkonong i Kerisitu. Pei komi mampobuuka komi pande kojo apa samba’a pei i Kerisitu. Pasi kami taa maroso ane ri pangkita nto lino, pei komi mampobuuka komi maroso. Pasi kami taa na’angga ntau pei komi ra’angga.
11 Rataka ri tempo si’i kami taa gana pangkoni, taa gana anu to rainu pasi pake mami taa seja gana. Kami sangkani rasesai pasi tare tampa to rakaroo.
12 Pasi kami mandasai mapalaong damangarata anu to darapake. Wali ane re’e tau to mangarowis kami, kami ojo mamporapika resi i Pue see Ia mangansawang tau etu. Pasi ane kami nasesai ntau, kami ojo mampakainso raya mami.
13 Ane kami nato’o maja’a ntau, kami ojo mangabalas gombo to manoto. Pei rataka ri tempo si’i kami ewa wusu ri pangkita nto lino. Pasi kami nato’o nto lino makarika.
14 Wali a’i-a’i naka pei aku mangantulisika komi gombo to si’i si’a damampakamea komi. Naka pei aku magombo ewa si’i mangampatiendoka komi apa aku mangepe komi ewa nganangku to kuporayang.
15 Apa komi nempo sampuyu nsowu tau to mampotundeka komi mangkonong i Kerisitu, komi taa malagi to ewa pa’a ngkomi. Apa aku semo to mawali ewa pa’a ngkomi. Apa aku semo to mampakarebaka komi kareba matao mangkonong i Kerisitu Yesu seore pasi mampaponsanika komi jaya see komi mawali samba’a pei Ia.
16 Wali see naka aku mamporapika resi komi mangaluluka ewa wimba lengko to si aku.
17 Wali etu sabanya naka pei aku mangampokau i Timotius yau resi komi. I Timotius etu aku mangepe ewa ana ngkorongku anu kuporayang kojo apa ia mangaya seja i Pue sewaju pei aku. Pasi ia maya rasarumaka mangika palaong i mPue. Wali tempo ia darata resi komi ia damampatiendoka komi mangkonong ewa wimba lengko ngkatuwu to aku mangika mangalulu i Kerisitu Yesu. Apa lengko ngkatuwu to etu singkonong pei anu to kupotundeka samparia tau to mangaya nja’u pontoponto lipu.
18 Wali re’e komi to mangei, mampobuuka, “I Paulus naka pei tamo ma’i apa meka rayanya mampotango kami.”
19 Pei ane singkonong pei pamporani i mPue aku tamo masae dayau resi komi. Pasi tempo aku rata resi komi aku dasimparata resi tau to mangei etu. Wali tempo etu aku damampakanasa ane bara re’e kuasa to nawaika i Nosa Mapasing sira bara ojo gombonya to maroso.
20 Apa tempo i Pue Allah mawali Makole nto lino, tempo etu si’a gombo ntau to bae batuanginya. To bae batuanginya etu semo kuasa i Nosa Mapasing to nakurang mangawali lengko ntau.
21 Wali to imba to komi rani tempo aku rata resi komi? Bara komi rani aku mangika matao resi komi manganseko komi yako ri pamporayangingku, bara aku mansaka mangahuku komi?
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA