Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ihira jolma in ma hanami juakjuak ni Kristus anjaha sijolom anakkunsi ni rusia ni Naibata.
2 Na parlobei ipindo humbani sijolom anakkunsi, ai ma ase haposan sidea jumpah.
3 Anggo bangku, parkara na hampung do ai, ia iuhumi nasiam pe ahu, atap pangadilan ni jolma pe, tapi ahu pe, seng huuhumi diringku.
4 Ai seng dong salahku, anggo na hubotoh, tapi seng pintor ahu halani ai, Tuhan in do na manguhumi ahu.
5 Halani ai ulang ma nasiam manguhumi i lobei ni panorangni, i lobei ni parroh ni Tuhan in, na manondangi sagala na ponop ibagas na golap, anjaha na patalarhon sagala sura-sura ni uhur. Jadi ganup ma bani panorang ai dapotan puji-pujian humbani Naibata.
6 Tapi hu bangku ampa hubani si Apollos do, nasiam sanina, hutarik hata ai, halani nasiam, ase marhitei hanami iguruhon nasiam, ulang ma nalobihi na tarsurat in: Ulang ma adong humbani nasiam na pabanggal dirini mangkasomani na sada, laho mangimbang na sada nari.
7 Ai ise mambahen marhasurungan ham? Ai aha na adong bamu, na so jinalomu? Anggo na manjalo do, mase ma mangenjeng ham songon na so manjalo?
8 Domma bosur nasiam, domma bayak. Domma gabe raja nasiam, hanami lape. Ambit ma namin gabe raja nasiam, ase dihut hanami raja rap pakon nasiam!
9 Ai ninuhurhu, na dob ibahen Naibata do hanami apostel, gabe sitoruhan, songon na dob ipadas hu hamatean; gabe sitontonan do hanami bani dunia on, bani malekat ampa jolma.
10 Na oto do hanami halani Kristus, tapi nasiam, na pentar do ibagas Krisdo ibagas Kristus. Hanami na galek, tapi nasiam na gogoh. Hanami na dorun, tapi nasiam na sangap.
11 Ronsi panorang on loheian anjaha horahan do hanami, hurang bani parhiouan, hona bogbogan anjaha seng marianan na totap,
12 loja marhorja marhitei tangannami sandiri. Anggo hona parpahiri, mamasu-masu do hanami, anggo hona parburu, sabar do hanami,
13 anggo ipahata-hata, basar do hanami. Gabe songon tompoh-tompoh ni dunia on do hanami, songon apus-apus ni nahei ni haganup halak ronsi sonari.
14 Sedo na laho pailahon nasiam ase husurat on, laho paingat nasiam do songon anak na hinaholongan.
15 Ai age pe adong salaksa pangajari bani nasiam marhitei Kristus, seng piga anggo bapa, ai ahu do manubuhkon nasiam ibagas Kristus Jesus, marhitei Ambilan Na Madear.
16 Halani ai huojur ma nasiam, gabe sitiru ahu ma nasiam!
17 Halani ai do ase husuruh bani nasiam si Timoteus, ai ma anak bangku, na hinaholongan anjaha hatengeran ni uhur ibagas Tuhan, ase ia ma paingatkon nasiam pasal dalanku ibagas Kristus Jesus, songon na huajarhon ija-ija pe bani haganup kuria in.
18 Adong do deba na pabanggal-banggal dirini, songon na so roh be ahu bani nasiam.
19 Tapi podas do ahu roh marayak nasiam, anggo marosuh Tuhan, anjaha botohonku ma ijin gogoh ni na pabanggal-banggal dirini, sedo hata ni sidea.
20 Ai sedo ibagas hata Harajaon ni Naibata, tapi ibagas hagogohon do.
21 Aha do ipangindo uhur nasiam? Marlonsing-lonsing do ahu roh bani nasiam, barang ibagas holong atap lamlam ni uhur do?
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA