Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Jadi kami pakenimiu kana rarekemiu batua i Kristus. Kami hii niparasayaka nu Alatala mompatolele tesaNa anu dopa nisani ntodea ri dunia.

² Bo anu nopoko ka batua haitu, ia kana matutu mangoseaka parenta nu madikana.

³ Jadi bara maria nte komiu tona madota momparesa pokarajaa kami bo mompakatantu bara mabelo bara ledo. Tapi yaku hii, ledo kupeili bara komiu bara tona ntanina mombatangara yaku. Ledo muni kutangara karoku mboto.

⁴ Nabula raraku. Pangisaniku mboto, ledo naria anu masipato rapakasala riara nggatuvuku. Tapi ledo kabula raraku hitu mompakatantu yaku manoa ri panggita nu Alatala. Aga i Pue Yesus mamala mombabotusi bara nasala yaku bara ledo.

⁵ Jadi nee komiu masalisa mompakatantu sala ntona ane dopa nakava tempona. Popea sampe i Pue Yesus makava mpanjili ri dunia. Iamo mompakalanto pura-pura anu nitabuniaka ri kalandana sii-sii. Iamo mompakalanto mpengaya-ngaya patuju nitabuniaka riara ntai manusia. Ri tempo haitu, Alatala mombatoiya isema-sema masipato ratoiyaNa.

⁶ Sampesuvu-sampesuvuku, porapa nitesaku ri bavona nipambela ka kami bo i Apolos ala mantulungi komiu. Nialaku jonjo kami randua ala komiu mamala meguru nee meliu lako ri anu nitulisi riara Buku Gasa. Patujuku ala ledo malanga raramiu bo ledo mantoiya saito batua i Kristus bo manjalai batua ntanina.

⁷ Isema nanguli komiu nelabipa pade tona ntanina? Nuapa naria nte komiu anu ledo nidekei nTupu ka komiu? Jadi nakuya komiu mangoe-ngoe? Nisarumakamiu anu naria nte komiu asele mpoviamiu mboto?

⁸ Natantu nisarumakamiu nagana puramo nte komiu, nakalumanamo komiu riara mpengaya-ngaya. Nisarumakamiu komiu nomparenta mpo magaumo bo kami ledo. Mabelo mpuu ane makana komiu najadi magau, ala kami muni mamala momparenta mosanggani-nggani nte komiu!

⁹ Tapi kami dopa najadi magau ri dunia. Nangoseaka panggavaku, kami *suro-suro i Yesus nipajadi nu Alatala tona nelabi napakasi ri dunia. Kami nasimbayu mpo tona nikeni rahuku mate ri ngayo ntodea, apa kami nikanoto nu isi dunia pura-pura, nau manusia nau *malaeka-malaeka nTupu.

¹⁰ Kami nireke ntona todoyo sabana kami nangoseaka i Kristus. Tapi nangoseaka pekirimiu, komiumo topomparasaya nanoto! Kami nireke ntona nalente tapi nangoseaka pekirimiu, komiumo naroso! Kami nisalai ntona tapi komiu nitoiya ntona!

¹¹ Sampe sii-sii kami nasaro naara tai bo nabai tambolo. Kami nopakea nte sanjia-njia, kami niboba ntona bo ledo ria ponturo nikaroo kami.

¹² Kami nokarajaa ntamo ante pale kami mboto nangelo katuvua. Ane nipindasi ntona kami, kami nerapi Alatala mombadekei belo ka tona haitu. Ane nipandasa ntona kami, kami bate-batena nosabara.

¹³ Ane nisalai ntona kami, kami nesana ante tesa nalusu. Kami nipeinta mpo rumpu ri dunia hitu. Sampe sii-sii kami nipeinta mpo tai.

¹⁴ Sampesuvu-sampesuvuku, patujuku notulisi hitu ka komiu ledo mompakaeya komiu, tapi mompatuduki komiu mpo ana-anaku anu nipotoveku.

¹⁵ Apa nau nonjobu-njobu guru nompatuduki komiu mangoseaka i Kristus, ledo naria najadi tuamamiu. Aga yakumo najadi mpo tuamamiu sabana yaku anu paratama nanggeni Kareba Belo ka komiu bara ipia.

¹⁶ Yaku nompotove komiu mpo anaku mboto. Jadi haitu sampe yaku mpuu-mpuu merapi nte komiu, pasialamo pokaingguku.

¹⁷ Kutudu i Timotius tou nte komiu mombatulungi komiu mompasiala pokaingguku. Ia topomparasaya i Pue, bo ia mpo anaku mboto anu nipotoveku, bo ia namala raparasaya. Ia mompopatora ka komiu pokaingguku nangoseaka i Yesus Kristus, nasimbayu mpo nipatudukiku ka pura-pura topomparasaya i Yesus ri umba-umba ngata.

¹⁸ Naria bara sako-ndua komiu nalanga rara, sabana niulimiu yaku domo tou nte komiu.

¹⁹ Tapi ane rapodota nTupu, masalisa yaku tou nte komiu. Bo ane makava yaku, kupeinta mboto nuapa rapovia ntona nalanga rarana haitu. Kupeinta ira bara mpuu-mpuu nakuasa atau aga notesa nggoo.

²⁰ Apa ane tona najadi todea riara Poparenta nu Alatala, kuasa nu Alatala rakita riara nggatuvuna, ledo aga tesa-tesa nggoo.

²¹ Jadi ane yaku tou nte komiu ri situ, umbana rapokonomiu? Paraluu yaku makava mompokarau komiu apa pokainggumiu dopa nabali? Atau yaku makava ante lusu rara bo asi mata apa nibalikimiumo pokainggumiu?

1 Korintus

Video 1 Korintus 4

Ikuti Kami:

KONTAK | PARTISIPASI | DONASI