Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Do' muyuh ngerawé nekai mepad kudeng demulun Keristus luk litep ngasa' bada' Allah luk inalum.

² Idi luk petulu kuan lun ngasa', do' ieh lutep inan tuanneh.

³ Iamo' ratnan ui, na mekudeh kudeng ui kumin muyuh idi idé-idé pana'. Ui sebuleng pana' na ngukum bururku

⁴ Ngaceku sebuleng pana' na ui kali' sala'ku sebuleng, iamo ratnan kudeng ineh ui nateh inau' matu peh, iamo' luk ngukum negku ineh Tuhan

⁵ Ngaceku ineh aleg muyuh ngukum idé-idé pana' kareb nateh karebneh, ieh ineh kareb nateh Tuhan macing. Ieh miak ngegala' anun-anun luk inapung bang dacem, idi Ieh ngelio amung-amung pinian niat lemulun. Anid-anid burur miak ngalap ubur ratnan Allah.

⁶ Ngaceku muyuh, O kinanak-kinanakku, ui pangeh nengalap luk pinginud kuan Apolos idi bururku sebuleng, pad muyuh miak sibada' ratnan lawé kai, kudeng apeh ilung bala ini, "Aleg ngelaba luk inayud." Aleg seburur rat arang muyuh ngedita' seburur lemulun idi ngebeneh seburur lun baken.

⁷ Ngaceku idéké luk nganau' namu meluun do' rat nelun baken? Idi anunké inan namu luk baken ilapmu? Idi kudeng iko pangeh nengalap ineh anunké punneh iko ngedita' bururmu kudeng ayuneh luk ilapmu ineh baken aceh baré?

⁸ Kali' rungen muyuh mebor! Kali' rungen muyuh lun do'! Muyuh pangeh mangun ku raca'-raca', iamo' kai nateh! Setuneh ui pian ku muyuh mangun ku raca'-raca', pad kai miak mangun ku raca'-raca' dengan muyuh!

⁹ Ngaceku ui ngerawé idi Allah pangeh nenganau' nekai mangun ku rasul-rasul luk pa beneh tu-tu, mepad kudeng lemulun luk inukum maté pa kiung lun mula' mangun ku aceh luk siren melaikat idi lemulun pana'.

¹⁰ Ngaceku Keristus kai ini mangun mebacé, iamo' muyuh mileh bang Keristus! Kai ini melaya', iamo' muyuh metueh! Kai ini pidat, iamo' muyuh rinayeh!

¹¹ Macing nekini kai kali' melau, idi meparing, lubpa, idi bebalen, idi na ruma' inan tudo,

¹² kai merur ngakem dengan ticu' kai sebuleng. Kareb kai uen ngediman, kai ngua' dengan peruan; kareb kai uen ngedereh, kai tuman teh;

¹³ kareb kai uen ngadu', kai ngua' dengan bala luk do'. Kai mepad kudeng arap bang tana' ini idi luk melutak siren lemulun.

¹⁴ Ui ngayud ini baken pad ngigu' nemuyuh, iamo' pad mada' nemuyuh mepad kudeng anak-anak luk inanku mawa.

¹⁵ Ngaceku sagan pana' muyuh inan pulu' ngeribu guru bang Keristus, iamo' muyuh na mula' taman. Ngaceku bang Keristus Yésus ui ini pangeh nenganak nemuyuh dengan Bala luk Do' ineh.

¹⁶ Ngaceku ineh ui mutuh nemuyuh maya' lawéku.

¹⁷ Idi ini punneh ui nengecuk Timotius amé' nemuyuh, ieh ineh anakku luk inanku mawa idi luk lutep bang Tuhan. Ieh miak mada' nemuyuh ratnan amung-amung dalanku bang Keristus, mepad kudeng luk bida'ku iapeh-iapeh pana' bang anid-anid sidang.

¹⁸ Inan tuda'-tuda' lemulun luk medita' niat, terawédeh na ui mekuu' macing nemuyuh.

¹⁹ Iamo' kudeng pian Tuhan, ui sikal macing nemuyuh dengan mesaget. Idi ui miak kali' luk miak ruen lemulun luk medita' niat ineh, baken luk miak beléndeh mo'.

²⁰ Ngaceku Imet Allah ineh baken ratnan bala mo', iamo' ratnan lalud.

²¹ Anunké pian muyuh? Do'ké ui macing nemuyuh dengan nguit ué', kian dengan awa idi niat luk mebeneh lek?

1 Korintus

Video 1 Korintus 4

Ikuti Kami:

KONTAK | PARTISIPASI | DONASI