Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ane ikami, tadulakomi, agina niuli hawi peangkai, lawi hawinangkai Kerisitu au moharungangkai moanti bambari hangko i Pue Ala au bara mani raisa tauna i dunia.

² Au paraluu i tauna au raparenta, hangangaa moula liliuhe hawana toiwongkonda.

³ Mewali, ane arakau au mampeinao mokakabosaina ba mosalai pobagongku, bara kupailalu. Nodo wori ane arahe tauna ntanina au mosalai pobagongku, bara ina kupailalu. Bara wori kupakanoto ba maroa pobagongku ba bara.

⁴ Kuisa kabulana lalungku, agayana bara iti au mopakanotona. Pueri au ina moparesa lalungku ba manoto ba bara.

⁵ Ido hai kuuli, ineekau mosalai pobagonda hangka rangami. Nipegia hampai kahawena hule Pue. Iami au ina mobungkahi ope-ope au tewuniangi mani i lalu kamakaindiana. Ia au ina mopatongawa ope-ope tunggaianda tauna au rawoli i lalunda. I tempo itimi, hadua-hadua tauna ina molambi petoya hangko i Pue Ala moula kahintotoana.

⁶ Halalu, apa au kuuli inona, mokanai Apolo hai watangku haduduangku. Ikami rodua kupopandiri, bona kupagurukau moula parenta au manguli: "Ineekau moliungi apa au teuki." Tunggaiaku, bona datikau ara au mampemahile anti peulami i hadua tadulakomi. Ineekau motoya hadua tadulakomi hai mopakoi tohaduana.

⁷ Ba niuli maroa lalumi hangko i rangami? Apa pae au ara irikamu au bara nitarima hangko i Pue Ala? Moapari hai mampemahilekau ane ope-ope au ara irikamu naweikau Pue Ala?

⁸ Ba nipehangu barapi ara kamakurami? Ba nipehangu handa mpuu kamarohona pepoinalaimi i Pue? Ba niuli moparentamokau nodo datu, hai ikami surona Pue Yesu barapi niparaluu? Kemaroa mpuu halalu ane mewalikau datu, bona moparenta worikau hihimbela hai ikami.

⁹ Agayana bara maningkai mewali datu i dunia. Moula polambiaku, ikami surona Pue Yesu napopewalimongkai Pue Ala tauna au meahi-ahi tuwona hangko i ope-ope tauna. Ikami rapahimbela tauna au ina rahuku mate i lindonda tauna bosa. Tepaiwoi tuwongki i lindona manusia hai malaeka.

¹⁰ Ikami raimbangkai tontuli lawi mopahawengkai bambari kana i Kerisitu, agayana niuliri kaikamuna to Sarani au mapande! Ikami, maledengkai, agayana niuliri maroho pepoinalaimi! Ikamu raadai tauna i dunia, agayana ikami, rakakabosaingkai!

¹¹ Duuna ide-ide, bara handa paandeki, bara handa paenungki, bara handa hampiki. Rapopeahi-ahi liliungkai. Bara ara paidaangki au maroa.

¹² Mobago mantimingkai hai tayengki haduduangki. Ane arahe au motunda-tundangkai, kihurungihe hai pewati. Ane arahe au mampopeahi-ahingkai, mantahangkai.

¹³ Ane arahe au motatarahungkai, kihanaihe hai lolita au maalusu. Duuna ide-ide ikami raimba nodo pupu hai dai dunia.

¹⁴ Halalu! Bara tunggaiaku ide bona mopakaeakau. Lolitangku ide, mopaturokau, lawi kuimbakau anangku au kupokaahi.

¹⁵ Lawi kehapi ba i sabuna gurumi au moninikau i peulami i Kerisitu, iko pea au nipouma, lawi iko au nguru-nguruna moanti Ngkora Marasa irikamu, alana mepoinalaikau i Kerisitu Yesu.

¹⁶ Ido hai kuperapi ntepuu, halalu, bona nipeulai babehiangku.

¹⁷ Mewali, ina kutudu Timotiu lao mampohidupaakau. Timotiu iti mampopolumao liliu bagona Pue, hai kuimba nodo anangku au kupokaahi. Ane hawe irikamu, ia ina mampopaingaakau noumba peulangku i Kerisitu moula paturongku au kupahawe i ope-ope to Sarani i boea-boeana.

¹⁸ Arakau au mampemahile, lawi nipehangu barana ina lao mampohidupaakau.

¹⁹ Agayana ina lao mpuuna mosondakikau. Barapi mahae ina hawena ane napokana Pue. I tempo iti, ina kuita apa au rababehi tauna au mampemahile iti. Ina kuita ba ara kuasana Pue Ala irihira, ba i lolitanda pea.

²⁰ Lawi ane Pue Ala mewali Datunta, hangangaa moulake peundeaNa, bara pea i lolitanta agayana i babehianta lawi ara kuasa au tahumba hangko Iria.

²¹ Mewali, umba au niunde: lawi ane hawena mopaturokau hai bara mani nikabaha babehiami au kadake, ina makasara pololitangku. Agayana ane tebaliki babehiami, ina maalusu lolitangku hai maahi lalungku.

1 Korintus

Video 1 Korintus 4

Ikuti Kami:

KONTAK | PARTISIPASI | DONASI