Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Anggep bahwe tiang pade pelayan-pelayan Almasih, saq betanggung jawab beriteang rencane-rencane Allah saq ndẽqman tetaoq siq dunie.

² Saq pertame-tame tetuntut lẽman pelayan saq maraq nike, bahwe ie setie lẽq majikanne.

³ Bagi tiang, ndẽqne jari soal napi saq side pade -- atao sai juaq -- pikirang ẽndah mengenai diriq tiang. Malahan napi saq tiang mẽsaq pikirang mengenai diriq tiang nike ndẽqne jari soal.

⁴ Tiang ndẽq merase salaq dalem hal napi juaq, laguq nike ndẽqne bukti bahwe tiang mule ndẽq salaq. Tuhan mẽsaq saq nentuang tiang salaq atao ndẽq.

⁵ Keranaq nike, ndaq side pade becat-becat nentuang bahwe sopoq dengan salaq atao ndẽq, sẽngaq ndẽqman waktune. Antih jangke Tuhan rauh ẽraq. Ie saq gen bukaq selapuq rahasie-rahasie saq teseboq lẽq dalem peteng. Ie saq gen bungkar selapuq niat saq araq lẽq dalem atẽ manusie. Lẽq waktu nike baruq sebilang dengan nerimaq pujian lẽman Allah maraq saq patut ie terimaq.

⁶ Semeton senamian! Jari kepentingande, tiang sampun laksaneang selapuqne nike tipaq Apolos dait lẽq diriq tiang mẽsaq. Maksutne adẽq conto lẽman tiang pade nike, side pade bau berajah napi arti ucapan niki, "Pade patuh lẽq aturan saq araq", siq care nike ndẽq araq sopoq dengan juaq lẽman side pade saq kanggo bangge-banggeang sopoq dengan, terus menghine saq lain.

⁷ Sai saq jariang side lebihan lẽman dengan lain? Tekan selapuqne side terimaq lẽman Allah? Jari, kembẽq mẽlẽ nyombongang diriq, maraqne napi saq araq lẽq side nike side anggep lẽman diriqde mẽsaq?

⁸ Mule side ndẽq merluang napi-napi malik! Side pade sampun sugih! Side pade sampun jari raje! Dait tiang pade ndẽq. Mule bagus gati lamun side pade sampun jari raje, adẽq tiang pade bau mrẽntah bareng side.

⁹ Sẽngaq menurut pendapet tiang, tiang pade rasul-rasul, sampun tejariang pantoan siq Allah lẽq julun manusie dait pare malaẽkat. Tiang pade maraq dengan-dengan hine saq tehukum siq hukuman matẽ lẽq julun dengan luwẽq dait tesurak-surak siq dunie.

¹⁰ Lantaran Almasih, tiang pade niki jari dengan bodo, laguq side pade bijaksane lẽq dalem Almasih! Tiang pade lemah, laguq side pade kuat! Tiang pade tecele, dait side pade teajum-ajum!

¹¹ Jangke mangkin niki tiang pade kelapahan dait bedak; kelambi tiang pade masih saq lẽq awak doang; tiang pade tesiksaq siq dengan; tiang pade ndẽq bedowẽ taoq ndot;

¹² tiang pade gawẽq pegawẽan saq berat gati jari boyaq napkah. Lamun tiang pade tekutuk, tiang pade bales siq berkah; lamun tiang pade teaniaye, tiang pade sabar;

¹³ lamun tiang pade telengẽ-lengẽang siq dengan, tiang pade bales kadu ucapan-ucapan saq solah. Tiang pade ndẽqne lebih lẽman dedoro dunie niki; jangke mangkin tiang pade masih teanggep maraq dedoro gumi.

¹⁴ Surat niki tiang tulis tipaq side pade, ndẽqne jari miaq side pade ilaq, laguq jari peringetin side pade maraq anak-anak tiang mẽsaq.

¹⁵ Sẽngaq timaq side pade sampun bedowẽ sepulu iyu guru lẽq dalem Almasih, laguq side pade ndẽq bedowẽ luwẽq bapaq. Lẽq dalem idupde sebagẽ dengan-dengan saq araq lẽq dalem Almasih, tiang saq jari bapaqde, sẽngaq tiang saq jauq Kabar Solah mengenai Almasih tipaq side.

¹⁶ Keranaq nike sanget siq tiang tunas adẽq side pade turut teladan tiang.

¹⁷ Lẽq hal nike tiang sampun ngutus Timotius ojok side, tiang ngasihin ie maraq anak tiang mẽsaq. Ie kanak saq bau tesaduq. Laun ie gen ngingetang side pade mengenai care idup saq tiang turut sesampun percaye tipaq Almasih, care idup nike saq tiang ajahang tipaq sebilang jemaah saq araq lẽq mbẽ-mbẽ.

¹⁸ Pire dengan lẽq antare side sampun jari sombong, sẽngaq ie pade paran tiang ndẽq gen dateng ojok side.

¹⁹ Laguq lamun Tuhan ngijinang, ndẽqne ngonẽq malik tiang gen dateng ẽndah ojok side. Lẽq waktu nike, tiang gen serioq ẽndah kekuatan dengan-dengan saq sombong nike; ndẽqne cume ucapanne doang.

²⁰ Sẽngaq Kerajaan Allah ndẽqne mengenai ucapan doang, laguq ẽndah mengenai kuase.

²¹ Jari, pilẽq doang napi saq side pade melẽtang! Napi side pade mẽlẽ tiang dateng jari ngajah side pade secare keras atao secare alus dait kasih sayang?

1 Korintus

Video 1 Korintus 4

Ikuti Kami:

KONTAK | PARTISIPASI | DONASI