Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Salingou nianako 'ato ngomi ne'ena ma Kristus mile-leleani, 'amia manarama ge'ena la miositotara ma Jo'oungu ma Dutu 'awi du-duaka gee 'o nyawa koyanakowasi.

² 'O nyawa gee yakisimanarama koge'ena, ge'ena 'isira-sira salingou yaki'isene manga tuangika.

³ Nako ngoi ge'ena kotokalesanguwa ngini bolo nago'ona bato 'ilega ma diai. Ma 'ifoloiosi 'okia naga gee ngoi tatiba-tibangi ma ngale ngoi ma sirete, ge'ena kotakalesanguwa.

⁴ 'Ai manarama ma sigoronaka ngoi toma-maoku ka ma eta ma 'ai sala koi'iwa naga 'o sagala moi-moioka. Ma ge'ena ko ma nyo-nyatawa 'ato ngoi 'ai sala koi'iwa. Ma Jou ma sirete wositantuu ngoi 'ai sala de ma 'ena bolo ko'uwa.

⁵ Ge'enau so ma 'orasi koya'adonikawasi ge'ena 'uwa niosijai-jai niositantuu 'ato moi de manga sowonoka bolo ko'uwa. Niodamaa sigado dua ma Jou woboa. 'Unau 'asa wosisupu 'iodumu gee koisupu-supuwasi 'isigi-gi'iunino 'o darusoka. 'Unau 'asa wosisupu 'o sagala niati gee 'isigi'iunino 'o nyawa ma singinaka. Ma 'orasi ge'ena 'asa de 'o nyawa 'iodumu yadawongo 'o siarene gee yadaene yomadadawongo ma Jo'oungu ma Dutuno.

⁶ 'Esa moi riaka dodoto ka 'o ngo-ngaku moi! Ma ngale nginiou so tosidumutokau 'iodumu ge'ena 'o Apolosoka de ngoi ma sireteka la nimaduru ngomioka ma ngale nimadotoko 'okia ma ngale 'o demo naneda: "Tatapu nimasiga-gao ma Jo'oungu ma Dutu 'awi besesongika gee 'isilefo-lefoku 'o Buku 'Itebi-tebinoka. De 'uwa niadogo." Ma ngekomo ge'ena ngini 'asa koniakisie-iewa moikani de koniakisito-torouwa 'iregu-regu.

⁷ Komoiwa yongose 'ato ngini niofoloide de 'o nyawa 'iregu! 'O sagala moi-moi 'iodumu ka ma Jo'oungu ma Dutuoka niadawongino. De 'ido'oa so niomau nimadaduie 'isoka kogee 'o kianikia nginioka naga ge'ena ko ma Jounowa.

⁸ Bari gee ngini kokiawau nisidukurangi, ngini niokoragokou nia ngo-ngakuoka, nako ko ngomiwa, ngini niodadi matero ka 'o koanou! 'Ifoloi yaowa nako ngini ma gou-goungu niokoanukou, la pomasidapareta.

⁹ Sababu moteke to ngoi 'ai di-dibangi, ngomi 'o su-suloko ge'ena ma Jo'oungu ma Dutu midiaiokau 'ifoloi miotingoono naga 'o jamatioka. 'O nyawa de 'o mala'ekati ma ako 'ipoa ka ngomino, sababu ngomi mimakeno 'isoka 'o nyawa koiba-baragunawa gee yahukumu yakiso-songene 'o kawasa ma bionoka de 'o dunia ma nyawa yakido-dogorese.

¹⁰ Ngomi mileleani ma Kristus, minimakeno miohaga-haga, ma ngini niongaku-ngaku ma Kristusika nima-maoku niobarija! Ngomi komiokuatuwa, ngini niokuata! Ngomi misela-sela, ngini kanisiare-arene!

¹¹ Sigado ne'ena ngomi 'ijaga misawini, mia kibiti 'idudungu, de 'amia pakeangi ka ma dorouou ka mia roesokau. 'O nyawa misikisaa, de kamiodagi-dagi kokiakawa mimasido-dogumu.

¹² Ngomi mimariwo ma sala miomanarama ma ngale mia ngodomo miononu. Nako ngomi misibobeto, ngomi miakidaga'asoko 'o barakati; nako ngomi mihalebiru, ngomi miosabari;

¹³ nako ngomi misito-torou, ngomi miosango mimasidi-diai de 'o demo 'isure-sure. Ngomi ne'ena 'o nyawa 'o duniaka midiai matero ka 'o gauru; sigado ne'ena ngomi mimakeno 'isoka 'o mediri.

¹⁴ Ge'enau tinidutulisi, ge'ena kotinisimae-maekuwa, ma 'ena tinidongose 'isoka to ngoi 'ai ngowa-ngowaka ma sirete.

¹⁵ Ngini gee niomote-motekokau de ma Kristus, ge'ena ngaro nia guru yocaanoka, duga matero ka 'ania dea ge'ena ka ngoi duga, sababu ngoiou tinisitotara 'o Habari ma Owa ma ngale ma Kristus.

¹⁶ Sababu ge'ena ngoi toga'asoko tosigou-gounguku, la ngini niamoteke 'isoka gee ngoi todiaiokau.

¹⁷ Ge'enau so ngoi towisulokokau 'o Timotius wotagi nginika. 'Una towisibosono kaimatero de to ngoi 'ai ngowaka ma dutu, sababu ngone po'ahu de ma Kristus. 'O ngowaka gu'una ge'ena 'idadi powingaku, dua 'una 'asa winidongose 'o gokoie de 'o gogeruku gee ngoi tadi-diaiokau ma 'orasi tongakuokau ma Yesus Kristusika, ge'ena la 'o 'ahu ma lugo gee tosidotoika 'o jamati 'isinoimika kiaka naga bato.

¹⁸ Nginioka yamuruo naga yoma'edengokau, sababu 'ona yongose ngoi dua kotaikawau nginika.

¹⁹ Ma ngoi dua tacobou totagi nginika nako ma Jou woisidabi. Dua ma 'orasi ge'ena 'asa de tanako yoma'ede-'edenge go'ona manga guata, so ka manga demo-demokawa duga.

²⁰ Sababu nako ma Jo'oungu ma Dutu wapareta 'o nyawa moi manga 'ahu, ge'ena 'isinyata 'o nyawa go'ona manga di-diaioka, so ka manga demo-demokawa duga.

²¹ So kaniairiki 'okia naga gee nioduaka! Niomau ngoi taika nginika tinidotoko tinikua-kuata, bolo tinisidi-diai ma de tinidora?

1 Korintus

Video 1 Korintus 4

Ikuti Kami:

KONTAK | PARTISIPASI | DONASI