Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Mifaduhusi tõdõ wa enoni Keriso ndra'aga, sangonorogõ tõdõ wanuriaigõ ohitõ dõdõ Lowalangi si lõ aboto ba dõdõ niha gulidanõ nasa.
2 Si fõfõna sibai ni'andrõ ba genoni si manõ ya'ia wa'alõfarõi khõ zokhõ ya'ia.
3 Na ya'o, lõ faduligu gofu hadia miw̃a'õ -- ba ma zui law̃a'õ niha -- sanandrõsa khõgu. Si manõ gõi, lõ faduligu hadia uw̃a'õ zanandrõsa khõgu samõsa.
4 Uw̃a'õ tõdõgu lõ mosala ndra'o ba ngawalõ hadia ia, ba hiza tenga lohelohe da'õ wa sindruhundruhu lõ mosala ndra'o. So'aya samõsa zangahonogõi hadia fasala ndra'o ma zui lõ'õ.
5 Bõrõ da'õ, na tenga inõtõnia bõi alio sibai mihonogõi hadia fasala zi samõsa niha andrõ ba ma zui lõ'õ. Mibaloi irege tohare dania Zo'aya. Ya'ia dania zamokai ngawalõ zi tobini bakha ba zogõmigõmi. Ya'ia dania zangoroma'õ ohitõ dõdõ niha si tobini. Ba ginõtõ da'õ awena dozi niha latema moroi khõ Lowalangi wanuno sinangea latema.
6 He ya'ami ira talifusõ! No utandrõsaigõ fefu da'õ khõ Afolo ba ba khõgu samõsa bõrõ ami. Eluahania, ena'õ moroi ba dumaduma andrõ khõma, tola aboto ba dõdõmi wamahaõ sanguma'õ, "Mi'odanedane goigoi si so." Ba zi manõ samõsa lõ ba gotaluami zanunonuno si samõsa, ba sangeherai tanõ bõ'õ.
7 Haniha zombali'õ tohude ami moroi ba danõ bõ'õ? Hadia tenga moroi khõ Lowalangi mitema gofu hadia ia? Hana wa fayaw̃a ami, hulõ na tenga nibualagõ fefu zi so khõmi andrõ?
8 Duhu wa lõ moguna khõmi hadia ia sa'ae! No kayo ami! No tobali razo ami! Ba tenga si manõ ndra'aga. Ha wa'asõkhi na sindruhundruhu no tobali razo ami, ena'õ tola fao ndra'aga khõmi wamatõrõ.
9 Molo'õ era'eragu, no ibali'õ ndra'aga, ira sinenge andre Lowalangi, maimai nifaigifaigi fõna niha ba he fõna mala'ika. Hulõ niha ni'o'aya ndra'aga, ni'etu'õ huku famunu fõna zato, ba niheraherai gulidanõ.
10 Bõrõ Keriso wa no niha si bodo ndra'aga, ba ya'ami no Niha Keriso sonekhe! Si tebai ndra'aga, ba sabõlõ ami! Niherai ndra'aga ba nisunosuno ami!
11 Irugi da'e matõrõ wa'olofo ba fa'owõkhi dõdõ; nukhama ha tõ si so ba mboto; lafakao ndra'aga niha; lõ nahiama so'ahonoa;
12 ma'eregesi tõdõ wangalui soguna khõma. Na la'elifi ndra'aga, masulõni howuhowu; na lagohi ndra'aga, ebolo dõdõma;
13 na la'obousi ndra'aga, masulõni fehede si sõkhi. Lõ tõra moroi ba zasao gulidanõ ndra'aga; irugi da'e no lafaigi ndra'aga hulõ ndra'i gulidanõ.
14 Usura da'e khõmi tenga ba wangailasi ya'ami, hiza no ba wo'amenesi ya'ami si mane iraonogu samõsa.
15 Ya'odo nama ba khõmi, hew̃a'ae ba wa'aniha Keriso, no so khõmi fulu ribu guru. Ba wa ha sambuami ba khõ Keriso, ya'odo zi tobali ama khõmi, me ya'o zolohe Turia Somuso Dõdõ ba khõmi, sanandrõsa khõ Keriso andrõ.
16 Bõrõ da'õ, u'andrõ sibai ena'õ mi'o'õ dumaduma khõgu.
17 Bõrõ da'õ no ufatenge Dimoteo khõmi. Ba wolo'õ Keriso, no ubali'õ onogu samõsa ia, ni'omasi'õgu. No ono si tola mufaduhusi tõdõ ia. Ifasugi ba dõdõmi dania gamuata wa'auri nifaluagu me no faduhu dõdõgu khõ Keriso, ya'ia da'õ amuata wa'auri nifahaõgu ba zi dozi banua Niha Keriso gofu heza.
18 So õsa ba gotaluami zi fayaw̃a, bõrõ me lawalinga lõ mõi ndra'odo khõmi dania.
19 Hiza, na Itehegõ Lowalangi, lõ ara tõ ba mõi ndra'o khõmi. Ba ginõtõ da'õ dania u'ila hadia zi tola lalau niha si fayaw̃a andrõ; bõi ha li manõ khõra.
20 Bõrõ na Lowalangi zamatõrõ fa'auri niha, oroma da'õ ba wa'abõlõ wa'auri niha andrõ, tenga ha ba wehedenia.
21 Bõrõ da'õ, mifili heza zabõlõ omasi ami! Hadia omasi ami mõi ndra'o khõmi dania ba wamahaõ ya'ami faoma fa'abe'e ma zui mõi ndra'o dania wamahaõ ya'ami faoma nihaogõhaogõ ba fao fa'omasi?
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA