Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ La misangakan kumua tompangjamankan Almaseh, sanga nasuakan Almaseh mpangpeissenanni to akkatta-Na Puang Allataala to te'dapa naissenni to totangnturu' Puang.

² Ia to kaminang parallu lako to todisua, iamo to kumua la tatta'i mpugaukki to apa nasuanni puangna.

³ Iamo joo te'da naciapa ke mitongananni ba'tu mipasalai to jamanku'. Te'da naciapa moi inda mpugaukki joo. Moi aku' te'da kutonganan ba'tu mpasala kaleku'.

⁴ Ia ke aku' te'da caccaku' moi ci'di', apa te'da na ia joo la menjaji butti kumua tomelona'. Puangra ia to la mparessana' anna tongananna' ba'tu napasalana'.

⁵ Iamo joo danggi' mimadoi' bang mpasala tau kumua tokasalan, ba'tu ntongananni kumua tomelo, sanga te'dapa nadete'i wattunna. Tajanni karatuan-Na pole' Puang, sanga Ia la nnarrangngi to apa membuni. Ia too la mpapajanni to akkattana tolino to nabunianan lan penawanna. Ia joo wattu mane'ri napuji Puang Allataala to tau, to tosipato' dipuji.

⁶ Ee, tomala'bihku'! Ia tee mangka kupau nena' nakannana' sola Apolos. Mpakekan kaleki' la mialai palelean mata to la mipumelona ammipahangngi tee kada to kumua, "Turu'i to atoran denmo". Ia ke mipahangmi joo, te'damo mimatampo na te'da too mipasilaenanni to tompangjaman Puang, battuananna te'da mikita majaoi mesa' mikita majiongngi to laenna.

⁷ Te'da kamu' matande na ia to tolaen. Sininna to apa miampui mitarima jio ngasan mai Puang Allataala. Jaji, ciapari mimatampo susi to misangai kumua sininna to apa miampui te'da napole jio mai Puang Allataala!

⁸ Misangaraka kumua te'damo apa miparallui, sanga sugihmo kamu'! Misangaraka kumua menjajimo kamu' raja na te'da kami'na! Gaja sannangkan ke la tonganna kamu' menjaji raja, antaraja sola!

⁹ Ia to passanganku', ia tee kami' rasulu' napileanmokan Puang Allataala to torroan kaminang majiong, sanga susikan to mangkamo dipapassanni pangsessa kamatean, nasikita-kitaikan sininna apa lan lino, la malaeka', la tolino.

¹⁰ Ia tee kami' rasulu' nasangakan tau tobango', sanga mpangpeissenankan karebanna Almaseh! Na ia to kamu' misanga kumua tomaccamo kamu', sanga memmesa' penawamo kamu' sola Almaseh! Ia tee kami' totangpakullekan, apa ia to kamu' misanga kumua topakulle kamu'! Ia tee kami' te'da nataratte'kan tau, apa ia to kamu' nataratte' kamu' tau!

¹¹ Ratu lako too allo den kitangbarah na mawakke tookan. Ia to pakeanki', ia mandamo to kipakena. Nasessakan tau, na te'da to kinii mari'pih.

¹² Kipengkullei tongan nnangahhi to la kikandena. Ianna tampakkikan ropu tau, kibarakka'i. Ianna sessakan, sabbara'kan.

¹³ Ianna pau gaja'kan tau, kipangkadai meloi. Te'da silaenanki' to burauk lan tee lino. Ratu lako too allo nasanga unapakan tau to ncarepai lino.

¹⁴ Ia tee kuukiran kamu', te'dara kukua ammimasiri', apa kupangngingaranra kamu' susi anak jajianku'.

¹⁵ Nasaba' moi na buda gajamo gurummi nnajahhi kamu' karebanna Almaseh, apa aku'mo mikita ambe'. Sanga aku'mo mpangpeissenan Kareba Kasalamatan lako kamu' ammimemmatappa' lako Puang Isa Almaseh.

¹⁶ Iamo joo kupangngingaran kamu' dikua anna aku' miala palelean mata.

¹⁷ Na kusuami mati' to Timotius, to kupakamoja'. Ia to Timotius susi anak tonganku', natatta' mpugauk jaman-Na Puang. Iamo la mpangngingaran kamu' matumba caraku' nturu' Almaseh, susi to kupangpangngajaran lako sininna jamaa la umbo-umbo nanii.

¹⁸ Den ba'tu pira-pira tau lan tangnga-tangngami memmatampo, nasaba' nasangai te'da kulamale mati'.

¹⁹ Apa ia ke napuelohhi Puang, la madoi'na' male mati'. Ratupa' mati', kuissenni kuasa pole jioraka mai Roh Allataala ba'tu kadanna bangri merambu-rambu tuu mati' tomatampo!

²⁰ Nasaba' ianna kuasaii Puang Allataala to tau, la napabutti lan panggaukanna, tangngia kadanna manda.

²¹ Jaji, umbonnara mikabudai? La kusessara kamu'ka, ba'tu la kupakitanra kamu'ka pangpakamoja'ku' angkupangkadai rampa' kamu'?

1 Korintus

Video 1 Korintus 4

Ikuti Kami:

KONTAK | PARTISIPASI | DONASI