Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nonowe Yesus Kristus ubam wenggel haruk hinap nori. Hiren Nonowe lehoma werehon ino fam wenggel haruk lit ap tu suwon, tu toron ulug onorohole yami enebuk fug.
2 Hit wene uruk ambeg ap suwon misig inggik selehetma ili ruruk angge kilaboho sum fanowon wan toho kuhumu ap misig eke anggengge elehon asum siyahon wan toho kuhu halug hiren nungge uruk lamuhup?
3 Hiren sum fanowon wan teg ahun ino fahet henele fano roho hi ruruk lit, "Ninikni, hur atuk angge fanowon tu fam hur amin," uhupteg anggengge eleg ahun ino fam, "Selma unduhuk lamin," uhup ano? "Nit nunuyug apma kinangma hur amin," uhup ano? Nori, ari roho uhup lit teg.
4 Hiren ari roho uruk lit ap tu siyahon, tu fanowon hunundaman peruk lahep. Hunundaman siyag peruk lahep ane ariyen ap onorohole yami eneptuk lahep.
5 Nori, an hit nindi henesug lahiyonen nele iminon tu holeg lamok. Ap kinangmonen enenggengge eleg inap tuma peruk angge famen Allahn An nolohotma enenggengge anggolo amag ulug mumal eneptisi. It arimanowen An inindi Nasug inap ulug sali imbibahon hikit toho Allah wereg ambeg ngi roho welamuhup.
6 Ari roho wereg angge famen ap enenggengge elehon arimano hiren apmayap eneptuk lahep. Ap enenggengge werehon arimanowen hit apmayap heneptuk lit unggum kong turuk ambeg hininggik lisoho hunumbaharuk eleg ano?
7 An numalikisi amag ulug unuk fanowon suwal heneptisiyon it arimanowen apmayap turuk eleg ano?
8 Komo eneptuk ane Allah wene tamon fam haharoho imbibahon mondabi palimu werehon tu, "Hinggareg hindi reg lahen hag toho hori winon oho hindi enesug laruhun." Wene haharehon aru hikit toho turuk lamuhup halug fano ane turuk lamuhup.
9 Hiren ap tu fanowon, tu siyahon ulug onorohole yami eneptuk lamuhup halug hiren siyag ane turuk lamuhup. Allahn komo enepfag ane hiren apmayap turuk lahep ulug wene aru famen seleg atuk.
10 Ap san komo enepfag ane obog toho timin peruk angge famen we il misig pisan isaruk halug at inowen winon obog toho apmayap turuk.
11 Allahn ap komo eneptuk lit, "Ap unuhesi pal ta fug," ibahon inowen, "Ap pinggi unusuk fug," ibag. Hiren ap unuhesi paluhup fug angge famen ap pinggi unusuhup halug komo enepfag ane ino apmayap turuk lahep.
12 Allahn alem hunubam umbuhu rohon henembilik fam fano ane hiyag isaruk lit hininggik fam oho turuk lamuhup. Allahn komo enepfahon holtuk inaben turuk hag toho turuk lamuhup. Allahn komo enepfag ane inowen ap ininggik hele warehon lol eneptuk.
13 Aben onori winon inindi enesug elehon arimano Allahn alem unubam werehon kong tuhu sambil ino Indi enesug laruhu fug. Ari reg angge famen ap inindi enesug ane mondabi palimu rehen alem kong turuk ane apma reg.
14 Nori, ap misihen, "An Allah fam nindi fano peruk lahi," uruk angge famen inggik fam turuk ane fano turuk eleg halug nangginoho welam teg? At ino indi fam eneg wenggel haruk ane inowen nangginoho fano am teg?
15 Honori ap ano hiyap ano sum wan turukon men likiya hupmu naruk angge men mondabi eleg angge famen
16 hit welahebon misihen hiyag utuk lit, "Sum wan talug suburu namihinteg lamihin," elepteg wan turuk angge men naruk angge men og etlep fug halug at ino nangginoho telep?
17 Allah fam wenggel haruk ane ari hag toho peruk lamok: Indi fam wenggel haruk angge famen inggik fam turuk ane fano turuk eleg halug wenggeltuk ane oho siyag atuk.
18 Hit welahebon aruma misihen te, "Ap ekeyen indi fam fano wenggel haruk, ap ekeyen inggik fam fano ane turuk," uhu lit teg. Ari uhuwon fahet anden hebeloho hiyag utuk lit, "Hinggik fam turuk ane eleg angge hindi fam wenggeltuk ane eneg hiyag nimin," ulug heng tuhuk. Ari ulug heng tuhukteg, "Anden ninggik fam turuk lahi ane ariyen nindi fam wenggel haruk lahi ane inamap timin," uhuk.
19 Haren Allah we misig wereg ulug hindimu wenggel haruk lahen ane ari fano. Fano wenggeltuk lahen angge famen setan siyahonen oho ari hag toho wenggel haruk lit unuwag elek turuk.
20 Nare, hat hindi sohu roho welahenonen hinggik fam turuk ane eleg angge hindi fam wenggeltuk ane eneg mondabi siyag ulug hindi anggar atmisi?
21 Nunumba Abraham inowen inggik famen turuk lit amloho Ishak waroho Allah fahet hubu lahapmin ulug tibag ane fahet Allahn fano pibag fug ano?
22 Ininggik fam turuk ane men inindi fam wenggel haruk ane men alem misig teg ulug hinindi anggar aha. Ininggik fam turuk ane ariyen inindi fam wenggel haruk ane fano atuk.
23 Ari roho turuk lahep ane ariyen wene tamon fam haharoho imbibag ane ino teko laruk. Haharoho imbibahon te, "Abraham inowen Allahn tem toho uruk ulug wenggel hibag ane ariyen Allahn at fahet fano pibag." Alem ari fahet Abraham ino Allah are hag toho wereg uruk latfag.
24 Aben inindi wenggel haruk ane fahet eneg Allahn fano peruk eleg, ininggik fam turuk ane fahet oho Allahn fano peruk ane ari hinindi anggar amag.
25 Rahab yaying turuk latfag hiyap inowen tibag ane eke wenggel hemek. Yerikho inap aluwar enebik lalihip ulug mon enepfag inap itano hiyap inowen ibam hondoko kilap enepfareg hirag enepfareg kebunggalem winon hirag-hirag lalihip ulug ler enepfag. Hiyap inowen inggik fam tibag ane fahet Allahn fano pibag.
26 Ebe weregma sat eleg halug war am hag toho ininggik fam turuk ane elegma wenggel haruk ane eneg wereg halug war am teg.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA