Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Semeton-semeton tiang! Sebagẽ dengan saq beriman lẽq Deside Isa Almasih, Junjungante Saq Mulie, ndaq side pade girang bẽde-bẽdeang dengan tedasarang hal-hal lahiriah.

² Sẽngaq lamun araq sopoq dengan sugih ngengadu ali-ali emas dait kelambi solah dateng ojok perkumpulande, beterus dateng ẽndah sopoq dengan miskin saq ngengadu kelambi roẽk,

³ make side pade lebih hormat lẽq dengan saq bekelambi solah nike. Side pade bebase lẽq ie, "Silaq pelungguh melinggih lẽq kursi saq paling solah niki," laguq lẽq dengan saq miskin, side pade bebase, "Nganjeng lẽq to!" atao "Tokol lẽq bawaq dẽkẽt naẽn tiang."

⁴ Siq perbuatan maraq nike, side pade miaq perbẽdean lẽq dalem angen side pade dait jari hakim siq pikiran-pikiran saq jahat.

⁵ Inget, semeton-semeton saq tiang kasihin! Dengan saq miskin lẽq dunie niki tepilẽq siq Allah adẽqne jari dengan saq sugih lẽq dalem iman dait jari ahli waris Kerajaan saq sampun tejanjiqang siq Allah tipaq dengan-dengan saq ngasihin Ie.

⁶ Laguq malahan side menghine dengan miskin, padahal dengan-dengan sugih nike saq nindes side pade dait jauq side pade ojok pengadilan!

⁷ Ie pade saq menghine pesẽngan saq paling tehormatin saq side pade terimaq lẽman Allah.

⁸ Side pade ngelaksaneang saq kenaq, lamun side pade ngelaksaneang hukum utame saq tetulis lẽq Kitab Suci niki, "Kasihin sepadende manusie, pade maraq side ngasihin diriqde mẽsaq."

⁹ Laguq lamun side pade bẽde-bẽdeang dengan tedasarang hal-hal lahiriah, make side piaq dose, dait hukum Allah nyatayang bahwe side pade ngelanggar hukum.

¹⁰ Sẽngaq sai juaq saq turut hukum nike, laguq ngerẽmẽhang sopoq bagian lẽman hukum nike, ie salaq tipaq selapuqne.

¹¹ Sẽngaq Ie saq bemanik, "Ndaq bezinah," Ie ẽndah saq bemanik, "Ndaq nyematẽq." Jari lamun side pade ndẽq bezinah, laguq nyematẽq make side pade ẽndah ngelanggar hukum.

¹² Jari side pade harus bebase dait bekelakuan maraq dengan saq gen teadilin menurut hukum Allah saq merdẽkeang manusie.

¹³ Sẽngaq bagi dengan saq ndẽq nyatayang belas kasihan, hukumanne ndẽq gen kadu belas kasihan ẽndah, laguq dengan saq bedowẽ belas kasihan ndẽq gen takut ngadepin penghakiman!

¹⁴ Semeton senamian! Napi manpaatne dengan bebase, "Tiang dengan saq bedowẽ iman," lamun ie ndẽq buktiang siq perbuatanne? Napi bau iman saq maraq nike nyelametang ie?

¹⁵ Seumpame sopoq semeton mame atao nine merluang kelambi dait ndẽq bedowẽ keloran saq cukup sebilang jelo.

¹⁶ Napi manpaatne side pade bebase lẽq ie, "Silaq lumbar, kadu kelambi saq anget dait bekelor jangke besuh!", laguq side pade ndẽq bẽng ie napi saq jari keperluan awakne?

¹⁷ Maraq nike ẽndah iman, lamun ndẽqne tenyatayang siq perbuatan, make iman nike setetune matẽ.

¹⁸ Sang araq dengan saq bebase, "Lẽq side araq iman dait lẽq tiang araq perbuatan." Tiang gen bejawab, "Petitoqang lẽq tiang imande laguq ndaq siq perbuatan, dait tiang gen petitoqang iman tiang siq perbuatan tiang."

¹⁹ Side pade percaye bahwe Allah cume sopoq? Nike solah! Laguq sẽtan-sẽtan ẽndah percaye lẽq hal nike dait ie pade ngijik siq takutne!

²⁰ Hai side pade saq bebel! Napi perlu tebuktiang lẽq side bahwe ndẽq araq manpaatne bedowẽ iman lamun ndẽq tebarengin siq perbuatan?

²¹ Serioq Ibrahim leluhurte! Ie tejariang kenaq lẽq arepan Allah lantaran perbuatanne, sewaktu ie ngaturang bijene, Ishak tipaq Allah, lẽq atas mẽje taoq kurban.

²² Dalem hal niki sampun jelas bahwe iman harus tenyatayang siq perbuatan dait siq perbuatan nike iman jari sempurne.

²³ Hal nike sesuai ayat Kitab Suci, "Ibrahim percaye lẽq Allah, dait lantaran imanne nike make ie tejariang kenaq lẽq arepan Allah." Keranaq nike Ibrahim tesebut, "Sahabat Allah."

²⁴ Mangkin sampun jelas, bahwe dengan tejariang kenaq lẽq arepan Allah, lantaran napi saq telaksaneang siq dengan nike, dait ndẽqne cume lantaran imanne doang.

²⁵ Serioq ẽndah Rahab, dengan nine pelacur nike. Ie tejariang kenaq lẽq arepan Allah lantaran perbuatanne, sewaktu ie nerimaq mate-mate Israel lẽq dalem balẽne dait nulung ie pade pelai nyelametang diriq liwat langan saq lain.

²⁶ Jari, maraq awak saq ndẽq bedowẽ roh, nike awak saq matẽ, maraq nike ẽndah iman, lamun ndẽq tebarengin siq perbuatan, iman nike matẽ.

Yakobus

Video Yakobus 2

Ikuti Kami:

KONTAK | PARTISIPASI | DONASI