Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali a’i-a’ingku, Pue ngkita, i Yesu Kerisitu, Ia semo Pue to bae kojo kayawaNya. Wali apa saba kita mangaya Ia, see naka taa matao ane kita mampasisala tau.
2 Rapanya, re’e dua mba’a tau to rata seja tempo komi siromu. Samba’a tau etu mangampake sinsi weyawa pasi pakenya magaya kojo. Pei tau to yusa masiasi, wali pake to si ia magenta.
3 Wali rapanya komi mangantabea tau to magaya pakenya etu pasi manganto’oka ia, “O Pa’a, patunda ri gadera to matao kojo si’i.” Wali ewa wetu gombo ngkomi resi tau sugi etu. Pei tau to masiasi, komi manganto’oka ia, “Pakore nja’uture,” bara komi manganto’oka, “Patunda ri wawo njuya ri awe mbitingku si’i.”
4 Wali ane ewa wetu nuika ngkomi batuanginya komi mawali ewa to pobotus to maja’a pampobuukanya, apa komi mampasisala tau.
5 Wali a’i-a’ingku to kuporayang, padongeka gombongku si’i pei pobuuka mangkonong ewa wimba nuika ngkomi mampasisala tau to sugi pasi tau to masiasi. Apa kamonsonya tau to masiasi ri pangkita nu mata nto lino, tau etu semo to i Pue Allah mangampilis damawali maroso pangayanya. Wali sira maya rato’oka sugi ane mangkonong pangaya nsira. Pasi i Pue Allah mangampilis sira damangarata seja anu to matao to rawaika resi tau to Ia Makolenya. Wali anu to matao etu semo to Ia roomo mamparajanjika tau to mamporayang Ia.
6 Pei ane komi, komi ojo mangarowis tau to masiasi. Pei kamonsonya si’a sira to mampakasusa komi. Tau sugi semo to mampakasusa komi pasi mangangkeni komi ri tango nto pobotus.
7 Pasi tau sugi seja to manganto’o maja’a sanga i Yesu Kerisitu to masipato ra’angga pasi to nululu ngkomi.
8 Wali re’e porenta nu Makole ngkita to ratulis ri raya ntuntu i mPue Allah, Ia manganto’o, “Porayang yunumu ewa wimba nuika mamporayang koromu.” Wali ane komi mangalulu porenta etu, matao kojo.
9 Pei ane komi mampasisala tau, batuanginya komi mangika dosa. Pasi yako porenta i mPue Allah to taa nalulu ngkomi etu, see naka miyala komi tau to mangewa samparia porenta.
10 Apa nempo samba’aja porenta i Musa to taa nalulu ntau, ewamo porenta mangkonong mamporayang yunu etu, ane ewa see batuanginya tau etu sewaju ewa mangewa samparia porenta etu.
11 Apa i Pue Allah to manganto’o, “Ne’e masala,” Ia semo to manganto’o seja, “Ne’e mampopate sa’e.” Wali nempo komi taa masala ane komi re’e mampopate sa’e, batuanginya komi roomo mawali tau to mangewa porenta i mPue Allah.
12 Wali kita to mangaya, kita darabotus singkonong pei porenta to nawai i mPue Allah, porenta to roomo mangalapa kita yako samparia to ewa mampowatua raya ngkita. Wali see naka to tao-tao kita mangajagai kojo samparia gombonta pasi lengkonta.
13 Apa i sema-sema tau to taa mamporayang sa’e, tau etu taa seja daraporayang ane ratamo temponya darapangabotus. Tau etu darahuku. Pei tau to mamporayang sa’e, nempo masipato rahuku ia taa darahuku. Wali ane ewa see, pamporayang i mPue Allah resi tau etu damanganangi huku to masipato ia mangarata. See naka matao kojo ane kita taa mampasisala tau.
14 Wali a’i-a’ingku, kesaa batuanginya ane tau manganto’o ia mangaya, pei tare lengko mpangayanya etu? Wimba pangayanya etu bara maya mangansawang ia ane ia rani mampakanasaka yununya ia tau to mangaya? Taa kojo!
15 Rapanya re’e a’i ngkita to samba’a pangaya, bara to langkai bara to we’a, pei tau etu taa gana pakenya pasi taa seja gana pangkoninya.
16 Pasi rapanya re’e kita to manganto’oka tau etu, “Pakasanang! Tuwu-tuwuja korom damangarata pake to gana see korom taa daloto nuepe. Pasi tuwu-tuwuja korom damangarata pangkonimu to gana kojo see korom taa damoro.” Wali ane kita manganto’o ewa wetu pei tare to kita mangawaika tau etu damangansawang ia, gombo ngkita etu taa kojo re’e batuanginya.
17 Pasi ewa see seja pangayanta. Apa ane tare palaong to inikanta mangampolengkoka pangayanta etu, ane ewa see pangayanta etu taa seja re’e batuanginya. Pangayanta etu raporapaka ewa tau to matem.
18 Pei ane re’e tau to damangabanta gombongku etu, manganto’o, “Malagi njaya pampobuuka ntau mangkonong pangaya. Apa samba’a tau ojo pangaya to re’e resi ia, pei ane tau to yusa, ojo palaong to matao to re’e resi ia.” Wali ane bara re’e tau to manganto’o ewa wetu, si’i semo sonongku. Aku damanganto’oka ia, “Ane ojo pangaya to re’e resi korom, wimba danuika mampakanasaka resi sa’e mangkonong pangayamu etu? Pei ane aku, aku damangika palaong to matao see damampakanasaka resi sa’e mangkonong pangayangku.
19 Wali wimba, korom bara mangaya i Pue Allah Ia samba’aja? Matao kojo ane ewa see. Pei tawa gana ane kita ojo mangaya ewa wetu apa measa mangaya seja i Pue Allah Ia samba’aja pasi karongko-rongko sira mampobuuka Ia, pei sira taa mampolaika Ia. Wali manasa tawa gana ane korom ojo mangaya pei tare lengkomu to mampakanasaka sa’e mangkonong pangayamu etu.”
20 Pasi aku manganto’oka wo’u tau etu, “O tau bea! Wimba, korom bara rani aku mampakanasaka korom monso pu’u pangaya ntau tare batuanginya ane taa rapolengkoka? Pangaya ntau etu raporapaka ewa tau to matem.
21 Pobuuka i Abraham, bue ngkita tempo owi. I Abraham etu nampampueka ananya, i Ishak, resi i Pue Allah ri wawo mpalampa watu. Wali yako palaong to inikanya etu, see naka miyala i Abraham ia tau to singkonong pei i Pue Allah.
22 Wali manasa resi korom pangaya i Abraham pasi palaong to inikanya masisawang. Pasi palaong to inikanya etu mampakaroso pangayanya.
23 Pasi tibanang gombo to ratulis ri raya ntuntu i mPue Allah, to manganto’o, “I Abraham ia mangaya i Pue Allah, wali yako pangayanya etu see naka i Pue Allah manganto’o ia tare dosanya.” Ewa wetu gombo to ratulis to tibanangimo. Pasi i Abraham rato’oka galung to masingkatao kojo pei i Pue Allah.
24 Wali see naka kita mangansani naka pei tau rato’oka tau to matao saba yako palaong to ia mangika, si’a ojo yako pangayanya.
25 Wali ewa see seja i Rahab to lonte tempo owi. Ia rato’oka tau to matao apa saba palaong to inikanya. Apa ia masanang mangantima tau to napokau i Yosua. Pasi ia mangansawang sira see masuwu muni yako ri lipu etu mangalulu jaya to yusa see taa danasoko nu bali nsira.
26 Wali aku mamporapaka ewa si’i, koro ntau ane tamo la’u nosanya, batuanginya koro etu matemo, tamore lengkonya. Pasi ewa see seja pangaya ngkita. Ane tare palaong to taika mampolengkoka pangayanta, ane ewa see, pangayanta etu ewa lemba ntau mate apa tare mangika bara kesaa. Wali anu kita mampolengkoka pangaya ngkita samba’a pei samba’a.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA