Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'Esa moi riaka dodoto gee niongaku-ngaku ma Jou Yesus Kristusika, ma Jou gee posironga de wokumatioka, 'uwa nioiri-iriki 'o nyawa sababu ka 'o harataa!

² Sababu nako kogee yokaya-kaya moi yoboa nia lo-lomuno yomasinoaku manga baju 'isure-sure de yoma'ali-'alino manga 'ali-'ali 'o guraci, de moioli yoboa yosusa-susa manga baju 'irebe-rebete,

³ ge'ena ngini 'ifoloi niakalesangi ka gee manga baju 'isure-sure. De ngini niongose, "Bereki, nou nogogerino ningino 'o go-gogere 'isure-sureku." Ma gee yosusa-susaka kaniongosekau, "Tagi noma'oko-'oko doka ngoka," bolo "Nogogeruku nongokau dau 'o tonaoka."

⁴ Nako koge'ena niodi-diai ge'ena niosikakairiki 'o nyawa, de niakilega moteke nia di-dibangi 'ito-torou.

⁵ 'Esa moi riaka dodoto tinisiboso-bosono, niongano-nganono! 'O nyawa yosusa-susa 'o duniaka ne'ena, ma Jo'oungu ma Dutu wakiiriki yodadi kaya ma ngale manga ngo-ngaku 'ifoloi 'ikuata. 'O nyawa go'ona 'asa yodadi ma Jo'oungu ma Dutu 'awi kawasa, 'isoka gee ma Jo'oungu ma Dutu wojajiokau 'o nyawa-nyawaka gee wisiboso-bosono.

⁶ Ma ngini kaniakisela-sela 'o nyawa yosusa-susa, 'ena momongo yokaya-kayau go'ona nidoko-doko de nisihakimi.

⁷ 'Onau ge'ena yosito-torou 'o ronga 'isure-sure gee niadawongino ma Jo'oungu ma Dutuoka!

⁸ Ngini niadiai 'iti-tiai, ge'ena salingou niamoteke 'o besesongo ma dekuoka gee 'isilefoku 'o Buku 'Itebi-tebini ma no-noimoka ne'ena ge'ena la, "Nimasikabosono moi de moi 'isoka to ngini ma sirete nia roese niosibosono."

⁹ Ma nako ngini nioiri-iriki 'o nyawa sababu 'o harataa, ge'ena ngini niodiai 'o sowono, de ma Jo'oungu ma Dutu 'awi besesongo 'isidumutu 'ato ngini ge'ena 'o besesongo niapare-parene.

¹⁰ Nago'ona ma Jo'oungu ma Dutu 'awi besesongo ge'ena yaparene 'o ngai moioni, ge'ena ma ngale 'iodumu yakokiparenokau.

¹¹ Sababu 'enau 'ingose 'ato, "'Uwa niosongou," mita 'enau 'ingose 'ato, "'Uwa nioto'oma." So ngaro koniosongouwa ma nako nioto'oma, ngini ge'ena niapare-parene ma Jo'oungu ma Dutu 'awi besesongo.

¹² Niobicara de niadiai ge'ena salingou 'isoka 'o nyawa gee dua yakilega ma diai moteke ma Jou wi besesongo gee 'o nyawa yakisipidi-pidili 'o sowonoka ma ngale yakisilaha.

¹³ Sababu ma Jo'oungu ma Dutu dua kowakisimara'aiwa gee 'o nyawa kayanakowa yosimara'ai. Duga ma Jo'oungu ma Dutu 'awi dora 'ifoloi 'ikuata ngaro de 'o hukumani ma.

¹⁴ 'Esa moi riaka dodoto, 'okia ma faedaa moi yongose 'ato, "Ngoi ne'ena tongaku-ngaku," ma nako koyosidumutuwa manga 'ahu ma sigoronaka, manga ngo-ngaku koge'ena yakisilahaka?

¹⁵ Nako naga nanga nyawa wimoi bolo mimoi 'o baju yoparaluu de manga 'inomo koyakidugawa 'o wange 'isinoi-noimi,

¹⁶ de kaniongose 'ato, "Kasamaowa niomasinoa 'o baju 'isau-sauku de kasamaowa nio'odomou!" 'Ena koniakikulawa gee 'okia naa yoparaluu ma ngale manga 'ahu, 'okia ma faedaa ge'ena?

¹⁷ Koge'enali mita 'o ngo-ngaku. Nako koniosidumutuwa de nia manarama, ge'ena ma faedaa koi'iwa.

¹⁸ Ma poilia naga munuka yongose, "'O nyawa munuka yomasiga-gao 'o ngo-ngakuka, de munuka 'o manaramika." Ngoi 'asa tosango, "Bika niosidumutino ngoino kokia 'o nyawa de manga ngo-ngakuoka ma ma sowoko koi'iwa de ngoi 'asa tosidumutu de ma sowoko, ma ngale ngoi de 'ai ngo-ngaku."

¹⁹ Ngini niongaku ma Jo'oungu ma Dutu kawomatengoka. 'O tokata mita 'ingaku de yakokimodongo kaiti-tirine.

²⁰ Ngini posironga niohaga-hagaka! Bolo salingou nisidumutosi 'ato 'o nyawa gee yongaku-ngaku ma koyadiaiwa gee yaowa-owa, ge'ena ma faedaa koi'iwa?

²¹ Bika niosi-singina 'o Abraham to ngone nanga edete gu'una. 'Una ma Jo'oungu ma Dutu wongose 'ato woloa sababu wamoteke ma Jo'oungu ma Dutu 'awi mau ge'ena la ma 'orasi 'awi ngowaka 'o Ishak wisisuba ma Jo'oungu ma Dutuka 'o su-suba 'idu-dutuuku ma dekuoka.

²² Ne'enaka 'iwai-waiti monga 'ato 'o ngo-ngaku salingou 'imakamoteke de 'o manarama la 'itotomo.

²³ Ge'ena 'imakadaene de naneda 'o Buku 'Itebi-tebini ma no-noimoka, "'O Abraham wongaku ma Jo'oungu ma Dutuka, so de wi ngo-ngaku ge'ena so ma Jo'oungu ma Dutu widawongo wodadi 'o nyawa gee ma Jo'oungu ma Dutu 'awi mau wamote-moteke." Ge'enau so 'o Abraham widiai ma Jo'oungu ma Dutu wi manai.

²⁴ Ne'ena 'iwaitokau 'ato 'o nyawa gee ma Jo'oungu ma Dutu wongose 'ato yolo-loa, ge'ena sababu manga di-diai yaowa-owa, so duga ka manga ngo-ngakuwa.

²⁵ Niamake mita 'o ngo Rahab gee 'o nauru makipake kamo'itimaronga. Muna ma Jo'oungu ma Dutu midawongo sababu 'ami manarama, ge'ena la makisidabino mi woano 'o Israeloka manga mata-mata de makisingekomo yoowara.

²⁶ So 'isoka ngoneli, nako la kopoomasuawau, ge'ena posongenokau. Koge'enali mita de nanga ngo-ngaku ma kopadiaiwa. Nanga ngo-ngaku ge'ena ka ma songene.

Yakobus

Video Yakobus 2

Ikuti Kami:

KONTAK | PARTISIPASI | DONASI