Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ge'ena 'ipasa de 'o mala'ekati ngai tumudiingi ya'ao-'ao 'o sawoko ngai tumudiingi gee, 'o ngai moi 'iboa ngoino de kaingosekau, "Nou, ngoi 'asa tonisidumutu kokia 'o ngeweka mimoi gee 'ami roese mowuku-wukunu ma sala 'asa mihukumu, ge'ena la 'o kota 'iamo-amoko gee 'isigoko 'o 'akere 'iku-kudai ma datekoka.

² 'O koa-koana 'o duniaka yosongou de de muna, de 'o dunia ma nyawa yaki'eto sababu ya'okere 'ami nyafisuu ma dorou ma daluku."

³ Ge'enaka de ngoi 'o Ngomasa 'Itebi-tebini 'iparetano, de 'o mala'ekati ge'ena 'i'asa 'o tonaka 'ika-kakasaka gee komoiwa yogogere ge'enaka. Ge'enaka doka ngoi tomimake 'o ngeweka mimoi mogogeruku 'o haewani moi ma dekuoka gee ma nikoto 'itereboko 'isi'osa-'osaka de ya'omanguku 'isilefoka wisiti-tingoono ma Jo'oungu ma Dutu. 'O haewani ge'ena ma saeke ngai tumudiingoka de ma taduku ngai mogiookoka.

⁴ 'O ngeweka gumuna momasinoaku 'o baju ya'ungu-'ungu de 'ite-tereboko 'isi'osa-'osaka, de mosinoaka 'o guraci, 'o permata, de 'o mustika. 'Ami giamoka ma'aono 'o sawoko 'o guraci ngai moi ya'oma-'omanga 'o hali 'ito-torou de 'imedi-mediri, to muna 'ami nyafisuu ma dorou ma hasili.

⁵ 'Ami mengaka 'isilefoka 'o ronga moi gee ma ngale komoiwa yasahe. 'Isilefoka konee, "Ngoi ne'ena 'o Babel gee topa-pareta, 'o Sagala Nyafisuu ma Dorou de 'o Sagala Dorou 'o Duniaka ma 'Esa."

⁶ Ge'enaka de tomimake 'o ngeweka gumuna mosigeto ma Jo'oungu ma Dutu 'awi nyawa manga 'aunu, ge'ena la 'o nyawa-nyawa gee yakito'oma sababu tatapu yomoteke de 'o Yesus. Gee ngoi tomimake 'o ngeweka gumuna, ngoi posironga toherangioka.

⁷ Ge'enaka de 'o mala'ekati ge'ena kaingosekau ngoino, "'Ido'oa so ngona noherangi? Ngoi 'asa tonisidemo la nasahe kokia 'o ngeweka gumuna, de kokia 'o haewani gee mobare-barenuku, ge'ena la 'o haewani gee ma saeke 'o ngai tumudiingoka de ma taduku ngai mogiookoka.

⁸ 'O haewani gee namake-makekau ge'ena ma sira 'i'ahuokau, ma ne'ena naga 'isongenokau. 'Ena dua 'isupu 'o ngomasa ma dorou ma ngiide dau de ma Jo'oungu ma Dutu 'asa wato'oma. 'O nyawa yo'ahu-'ahu 'o duniaka gee manga ronga koisilefokuwa 'o nyawa yo'ahu-'ahu ma Bukuoka ka 'o dunia ma koisidadiwasi, 'asa yoherangi nako yamake 'o haewani ge'ena. Sababu 'o haewani ge'ena ma sira 'i'ahuokau de ma 'orasi ne'ena 'ena koi'ahuwau, ma dua 'asa 'iboali.

⁹ Ge'enau so salingou de niabarija la niosikanako 'iodumu ge'ena. 'O saeke ngai tumudiingi ge'ena ma ngale 'o diko ngai tumudiingi ge'ena la 'o diko-diko gee 'o ngeweka gumuna mopa-pareta ma ngii. De 'o saeke ngai tumudiingi ge'ena ma ngale 'o koana yatumudiingi.

¹⁰ Yamotoa yosongenokau, wimoi kawoparetasi, de wimoiosi kowoboawasi. Gee 'una dua woboa, 'una salingou wopareta ka tai-taitoka.

¹¹ De 'o haewani gee ma sira 'i'ahuokau ma ne'ena ko'uwau, ge'ena la 'o koana gee yatumudiingi yokoana 'iduanga de 'unali. 'Una ge'ena gee 'o koana yatumudiingino go'ona, gee ma 'orasi ne'ena naga ma Jo'oungu ma Dutu wibinasau.

¹² Ma taduku ngai mogiooko gee namake-make ge'ena la 'o koana yamogiooko gee koyoparetawasi. Ma 'ona 'asa yakikula 'o kuasa ma ngale yopareta de 'o haewani ge'ena ka 'o 'orasi moi.

¹³ 'O koana yamogiooko go'ona yoodumu ka 'o singina moi yosarakani manga guata de manga kuasa 'o haewanika ge'ena.

¹⁴ 'Ona 'asa yoparangi widaari 'o Domba ma Ngowaka gu'una. Ma 'o Domba ma Ngowaka de 'awi do-domoteke tatapu yosingou-ngounu gee waki'asokokau de wakiirikokau go'ona 'asa yakisikala 'o koa-koana go'ona. Sababu 'o Domba ma Ngowaka to 'una 'ifoloi 'awi kuasa 'iamoko so 'o sagala tuangi de 'o koa-koana yoodumu 'una wakikuasano."

¹⁵ 'O mala'ekati ge'ena kaingosekau mita, "'O 'akere gee nakokimake-make, gee kiaka naga 'ami roese mowuku-wukunu mogoge-gogere, ge'ena la 'o sagala suku, 'o sagala kawasa, 'o sagala negara de 'o nyawa-nyawa gee manga demo moi-moi yopake-pake.

¹⁶ Ma taduku ngai mogiooko namake-make ge'ena, de 'o haewani ge'ena, 'asa komisanangiwa munaka gee mi roese mowuku-wukunika gumuna. 'Ona 'asa ya'ora 'ami kia sonaa 'iodumu, de mi baju ya'aiki so kamiwatonokau. 'Ona 'asa ya'odomo 'ami akeme, de yatuuku.

¹⁷ 'O koana yamogiooko go'ona ma Jo'oungu ma Dutu wagarakiokau to 'ona manga singina ma ngale yosidagi ma Jo'oungu ma Dutu 'awi mau. So ma rai 'ona ka 'o singina moi yosarakani manga kuasa 'o haewanika ge'ena, la 'o haewani ge'ena 'ipareta, sigado 'idadi 'okia naga gee ma Jo'oungu ma Dutu wongosekau.

¹⁸ 'O ngeweka gee monimake-make gumuna, ge'ena la 'o kota ma amoko gee yapareta 'o koa-koana 'o duniaka."

Wahyu

Video Wahyu 17

Ikuti Kami:

KONTAK | PARTISIPASI | DONASI