Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Me no aefa da'õ ba so samõsa moroi ba mala'ika si dafitu andrõ si no mololohe mako si fitu, i'ondrasi ndra'o imane khõgu, "Tabu, da uforoma'õ khõu hewisa wanguhuku sabõlõ wohorõ andrõ, ya'ia mbanua sebua andrõ ni'otomosi ba zinga nungo nidanõ misa.

² Ira razo ba gulidanõ lalau mohorõ khõnia, ba tobali mabu zowanua ba gulidanõ bõrõ wamadu agu wohorõnia andrõ."

³ Aefa da'õ Ifatõrõ ndra'o Eheha Lowalangi, ba i'ohe ndra'o ba danõ si mate mala'ika andrõ. Ba da'õ u'ila samõsa ndra alawe si dadao yaw̃a ba hulu gurifõ soyo si holahola, ba afõnu sinura tõitõi fango'aya Lowalangi. Fitu hõgõ ba fulu rozi dandru gurifõ andrõ.

⁴ No ifake ira alawe andrõ nukha sobowo doru ba soroyoroyo awõ wa no mufogamagama ngawalõ gamagama ana'a, ba kara sebua bõli, ba manimani. No so ba dangania sambua mako ana'a safõnu ngawalõ zi lõ sõkhi ba si ta'unõ, bua wohorõnia andrõ.

⁵ Ba gangangonia no musura dõi si lõ aboto ba dõdõ niha eluaha. Tõi andrõ ya'ia da'õ, "Babilonia Sebua andrõ, ina zohorõ fefu awõ niha si lõ sõkhi amuata ba gulidanõ."

⁶ Ba u'ila wa mabu ndra alawe andrõ ba ndro mbanua Lowalangi, awõ ndro niha nibunu andrõ bõrõ me lõ farõi ira khõ Yesu. Ba me u'ila ndra alawe andrõ, ba ahõlihõli sibai dõdõgu.

⁷ Ba muhede khõgu mala'ika andrõ, "Hadia mbõrõ wa ahõlihõli dõdõu? Da u'ombakha'õ khõu zi tobini ba ndra alawe andrõ awõ zi tobini ba gurifõ andrõ si fakudo ya'ia, urifõ andrõ si fitu hõgõ ba si fulu rozi tandru.

⁸ No irai auri fõna gurifõ andrõ, ba lõ sa'ae ya'ia iada'e. Ba lõ ara tõ ba so ia dania i'otarai mbawa danõ wa'amate ba isaw̃a wa'atekiko. Ba niha sauri ba gulidanõ, si lõ musura tõi (fõna wombõi ulidanõ) ba Mbuku Niha Sauri andrõ, ba ahõlihõli sibai dõdõra dania na la'ila gurifõ andrõ. Bõrõ me no irai auri fõna gurifõ andrõ. Ba lõ sa'ae ya'ia iada'e, ba ifuli zui so ia dania.

⁹ Ba da'e moguna so wa'atuatua ba fa'aboto ba dõdõ. Hõgõ andrõ si fitu ya'ia hili andrõ si fitu; ya'ia hili naha ba zi dadao ira alawe andrõ. Ba hõgõ andrõ si fitu ba no gõi dafitu razo:

¹⁰ lima moroi ba gotaluara no adudu, ba samõsa tõ nasa zi lõ tebulõ mamatõrõ, ba si samõsa ba lõ nasa si so. Na so ia dania, ba lõ tola lõ mamatõrõ ia ba lõ arara.

¹¹ Ba urifõ si no irai auri andrõ fõna, ba si lõ iada'e, no razo numero w̃alu. No samõsa ia gõi moroi ba zi dafitu razo andrõ, sanaw̃a fa'atekiko iada'e.

¹² Ba tandru andrõ si fulu rozi ni'ilau ba no razo si dafulu andrõ si lõ nasa mamõrõgõ famatõrõ. Ba tebe'e dania khõra wa'abõlõ ba wamatõrõ si mane razo, awõ fao ba gurifõ andrõ, sambua za wa'ara.

¹³ Razo si dafulu andre ha sambua gohitõ dõdõra fefu; ba labe'e wa'abe'era ba fa'abõlõra fefu ba gurifõ andrõ.

¹⁴ Ya'ira dania zi fasuwõ ba wolaw̃a Ono Mbiribiri andrõ. Ba Ono Mbiribiri andrõ awõ zi fao khõ-Nia si lõ farõi, si no Ikaoni ba si no Ituyu andrõ zangalani razo andrõ fefu dania, bõrõ me Ya'ia Zo'aya sokhõ fefu, ba Razo yaw̃a razo."

¹⁵ Iw̃a'õ gõi mala'ika andrõ, "Idanõ andrõ ni'ilau, naha ba zi dadao sohorõ andrõ, ya'ia ngawalõ soi fefu, niha mbanua, ngawalõ mado fefu awõ ngawalõ li.

¹⁶ Tandru andrõ si fulu rozi ni'ilau awõ gurifõ andrõ ba fatiu dõdõra dania ba zohorõ andrõ. Larabu dania fefu hadia ia zi so khõnia, ba labali'õ ia si lõ nukha. Ba la'a dania nagolenia awõ wa lafakiko ia ba galitõ.

¹⁷ Bõrõ me Lowalangi zi no mango'ou tõdõra ba wamalua nikhoi dõdõ Lowalangi. Lowalangi zangosara'õ tõdõra ba wame'e amatõrõw̃a ba gurifõ andrõ, ena'õ mamatõrõ gurifõ andrõ irugi alua dania niw̃a'õ Lowalangi andrõ.

¹⁸ Ira alawe andrõ ni'ilau ba ya'ia mbanua sebua andrõ, samatõrõ razo ba gulidanõ."

Wahyu

Video Wahyu 17

Ikuti Kami:

KONTAK | PARTISIPASI | DONASI