Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sesampun nike salaq sopoq lẽman kepituq malaẽkat saq negel pituq cawan nike dateng ojok tiang dait bebase lẽq tiang, "Silaq, tiang gen petitoqang side berembẽ pelacur saq belẽq nike gen tehukum, nike kote belẽq saq tepiaq lẽq dẽkẽt kokoq-kokoq.

² Raje-raje dunie gawẽq perbuatan saq cabul kance ie, dait penghuni gumi jari bowos lantaran nginem anggur perbuatanne saq cabul."

³ Terus Roh Allah nguasein tiang, dait malaẽkat nike jauq tiang ojok padang gurun, lẽq derike tiang serioq sopoq dengan nine tokol lẽq atas sopoq binatang saq bẽaq toaq warnene, dait saq penoq tetulis siq aran-aran saq menghine Allah. Binatang nike bedowẽ pituq otak dait sepulu tanggẽq.

⁴ Dengan nine nike kadu kelambi saq bewarne lempok lomaq dait bẽaq toaq, dait tepayas siq periasan-periasan emas, permate-permate, dait mutiare. Lẽq imene ie negel sopoq cawan emas saq penoq siq hal-hal saq najis dait kotor, hasil lẽman perbuatanne saq cabul.

⁵ Lẽq telakarne tetulis sopoq aran saq bedowẽ arti rahasie. Aran nike "Babel Saq Belẽq, inen selapuq pelacur dait dengan bejat lẽq dunie."

⁶ Terus tiang serioq bahwe dengan nine nike bowos siq daraq dengan-dengan saq tehususang bagi Allah dait daraq dengan-dengan saq tematẽq lantaran setie lẽq Deside Isa. Sewaktu tiang serioq dengan nine nike, tiang jari bengaq gati.

⁷ Terus malaẽkat nike bebase lẽq tiang, "Kembẽq side bengaq? Gen tiang badaq side rahasie dengan nine nike dait rahasie binatang saq ie tunggang nike, nike binatang saq bedowẽ pituq otak dait sepulu tanggẽq.

⁸ Binatang nike laẽq sampun side serioq, laguq mangkin sampun ndẽq araq malik. Karing semendaq malik ie gen sugul lẽman jurang maut dait tame ojok dalem kebinasean. Dengan-dengan saq idup lẽq gumi, saq aranne ndẽq tetulis lẽq kitab kehidupan lẽman sendẽqman dunie tecipteang gen bengaq lamun serioq binatang nike. Sẽngaq laẽq binatang nike sampun araq, mangkin ie ndẽq araq malik, laguq ie gen dateng malik.

⁹ Dalem hal niki perlu araq hikmat dait pengertian. Pituq otak nike pituq gunung; nike gunung-gunung taoq dengan nine nike tokol.

¹⁰ Dait pituq otak nike ẽndah pituq raje: Lime lẽman ie pade sampun teancurang, sopoq masih mrẽntah, dait saq sopoqne malik ndẽqman dateng. Lamun ie dateng ẽraq ie gen mrẽntah semendaq doang.

¹¹ Dait binatang saq laẽq sampun araq, laguq mangkin ndẽq araq malik, nike raje saq kebaluq. Ie ẽndah salaq sopoq lẽman kepituq raje nike, saq mangkin nuju kebinasean.

¹² Sepulu tanggẽq saq side serioq, nike sepulu raje saq ndẽqman mulai mrẽntah. Laguq ie pade gen teicanin kuase jari mrẽntah jari raje bareng-bareng kance binatang nike sejam ngonẽqne.

¹³ Kesepulu raje niki selapuqne bedowẽ tujuan saq pade; ie pade selapuqne nyerahang kekuatan dait kekuasean ie pade tipaq binatang nike.

¹⁴ Ie pade gen perang ngelawan Anak Dombe nike. Laguq Anak Dombe nike kance pengiring-pengiring-Ne saq setie saq sampun Ie manikang dait Ie pilẽq nike gen ngalahang raje-raje nike, sẽngaq Ie Tuan selapuq tuan, dait Raje selapuq raje."

¹⁵ Malaẽkat nike ẽndah bebase, "Aiq saq side serioq nike, taoq pelacur nike tokol, nike bangse-bangse, rakyat-rakyat, kaum dait base.

¹⁶ Sepulu tanggẽq saq side serioq dait binatang nike gen meriq lẽq pelacur nike. Ie pade gen ngerampas selapuq saq ie ẽpẽang, dait miaq ie jari bekelombas. Ie pade gen kelor dagingne dait binaseangne kadu api.

¹⁷ Sẽngaq Allah sampun noloq lẽq atẽ ie pade kemẽlẽq jari ngelaksaneang pekayunan-Ne. Allah miaq ie pade sepakat jari nyerahang kekuasean ie pade tipaq binatang nike, adẽq binatang nike mrẽntah, jangke selapuq Manik Allah telaksane.

¹⁸ Dengan nine saq side serioq nike, kote belẽq, saq mrẽntah raje-raje lẽq gumi."

Wahyu

Video Wahyu 17

Ikuti Kami:

KONTAK | PARTISIPASI | DONASI