Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bọu e sěngkatau wọu tal᷊oarang malạekatẹ̌ pitu mạngumpaedẹ̌ bokorẹ̌ pitu e himaung su anuku ringangu nẹ̌bera, "Boete, iạ e sarung měnodẹ si kau kereapa tahapẹ̌sundal᷊ẹ̌ gẹ̌guwạ ěndaị e sarung ihukung, mangal᷊ene soa ghẹ̌guwạ ěndaị e kụ nipětị su rěduhu manga sal᷊ụ.
2 Mararatun dunia e němpẹ̌sundal᷊ẹ̌ dingange, kụ dal᷊ohon dunia e něngkiwukang ual᷊ingu němpanginung anggoru pẹ̌sasundal᷊e!"
3 Mase Rohkẹ̌ u Ruata e limohọ e su watangengku, kụ malạekatẹ̌ e nẹ̌bawa si siạ sol᷊ong kěhu l᷊inggi. Paise iạ nakasilo tau wawine sěngkatau mạiang su wowom binatang sěmbaụ awạe mahamụ maghurang, kụ napěpidu wohẹ u areng u tatongkeang su Mawu Ruata. Binatang ene e těmbọe pitu ringangu sungene mapul᷊o.
4 Tau wawine ene něluhen lakụ e kamumụ dingangu mahamụ maghurang, mase lai nilẹ̌gaheng u manga ral᷊ěgahẹ̌ bul᷊aeng, paramata, ringangu mutiara. Limane ipělẹ̌hěgo lainumang bul᷊aeng sěmběka napenẹ u katatingkaị dingangu karal᷊amuhụ, ual᷊ing pẹ̌sasasundal᷊e.
5 Su rěhụ e piạ kạbawohẹ areng sěmbaụ kụ mangal᷊ene ute kai rahasia. Areng ene ute, "Babel Masěllahẹ̌, inangu kěbị apan tahapẹ̌sundal᷊ẹ̌ dingangu taumata apan dal᷊akisẹ̌ su dunia."
6 Mase iạ nakasilo tau wawine ene niwukangu rahan taumata nipate ual᷊ingu masatia su Mawu Yesus. Piạ e iạ nakasilo wawine ene, iạ e měngkawe naherang-herang.
7 Tangu malạekatẹ̌ e něhengetang si siạ, "Kai unụe nakaherang si kau? Mapiawe iạ měhabarẹ̌ si kau rahasian bawine ene ringangu rahasiam binatang sẹ̌sakeěnge, kụ těmbọ e pitu ringangu sungene mapul᷊o.
8 Binatang ene kạngerẹ nạungbe wọu nẹ̌biahẹ̌, arawe orasẹ̌ ini e sen tawe saụ mẹ̌biahẹ̌ kạpia. I sie tawe mararěna e sarung suměpụ bọu tạgial᷊ụ u papate, kụ sarung makoạ sol᷊ong kawawinasa. Taumata apang měmpẹ̌bẹ̌biahẹ̌ su dunia, kụ arenge tawe nikarol᷊ẹ̌ su ral᷊ungu Bukẹ̌ u Taumata Wiahẹ̌, kal᷊amonang dunia e ren tawe nịdiadi sarung dumal᷊inaụ kereu makasilo binatang ene. Batụu binatang ene nạung kạngerẹ e reng bọu nẹ̌biahẹ̌. Arawe orasẹ̌ ini e seng tawe saụ mẹ̌biahẹ̌, kapia kaiso i sie saụbe suměpụ kapia.
9 Ual᷊ingu ene ute kai hinong piạ kapelesa ringangu katatahuěnna. Kụ těmbọ pitu e ute kai wul᷊ude pitu; kụ kai manga wul᷊ude kẹ̌kaianengu tau wawine ene. Ringangu těmbọ pitu ene ute mal᷊aing mělẹ̌lahẹu Ratu i sire pitung katau:
10 kụ l᷊imang katau wọu tal᷊oaran sire e seng něngkawatang, arawe sěngkatau ute wědangben tawe nạděnta.
11 Kụ binatang kạngerẹ nạung měbẹ̌biahẹ̌, arawe orasẹ̌ ini seng tawe nẹ̌biahẹ̌, ute kai ratu kaual᷊une. I sie ute mal᷊aing sěngkatau wọu ratu i sire pitu e, kụ orasẹ̌ ini e mětẹ̌timona kawawinasa.
12 Sunge mapul᷊o kụ kinasilonu e ute kai ratu mapul᷊o kụ bẹ̌dang ta nẹ̌nětạ němpẹ̌parenta. Kaiso i sire sarungbe iapakawala mẹ̌parenta kere sěngkatau ratu sěngkapẹ̌parenta ringangu binatang ene sěngkaorasẹ̌ karěngụe.
13 Tẹ̌gal᷊u ratu mapul᷊o ini e kěbị nạung piạ timonan e mẹ̌sul᷊ung; i sire kěbị e kai mạnarakangu katoghasẹ̌ dingangu kawasan sire su binatang e.
14 I sire kai sarung mẹ̌sekẹ dumokạ Ahusu Domba e, Kaiso Ahusu Domba ringangu tumatol᷊ene masasatia e kụ seng nikuiang'E ringangu pinilen'E e sarung mamatạ manga ratu e, batụu kai i Sie Mawung kěbị manga mawu, dingangu Ratung kěbị mararatu e."
15 Malạekatẹ̌ ene mal᷊aing nẹ̌bera, "Akẹ nạung kinasilonu e, piạ kẹ̌kaianengu wawine tahapẹ̌sundal᷊ẹ̌, ute kai manga umatẹ̌, kawanua, ringangu wansa, ringangu manga haghing bera.
16 Sunge mapul᷊o kinasilonu e ringangu binatang e, i sire kai sarung měmpẹ̌binsịu taha pẹ̌sundal᷊ẹ̌ ene. I sire sarung měmpangaho kěbị apang tẹ̌taghuanenge, ringangu mapakatěntol᷊en sie. I sire sarung mahungkinạ gěsine ringangu maminasang putung si sie.
17 Batụu Mawu Ruata e seng nanganoạ naung i sire baugu měmpěndal᷊engu antagu munaran Duata. Mawu Ruata e seng napẹ̌sěngkanaung i sire tadeạu manarakangu pěngangawasang sire su binatang ene, tadeạu binatang ene mẹ̌parenta sarạeweng karariading apang kụ nipěhengetang u Mawu Ruata.
18 Bawine kụ kinasilonu e ute kai soa ghẹ̌guwạ, kụ měpẹ̌parenta mararatu e su dunia."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA