Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Onda intua tobatuí malaekat nongkon malaekat pitu inta nokadai kon palo pitu tatua namangoi ko'inakoí bo noguman, "Igai, baí popo'ontongku ko'inimu in hukuman kom polacur moḷoben, tuata ing kotaí moḷoben inta pinosindog kom bingkií in ongkag mita.
2 Raja mita kon dunia na'a ain nogaid kon inta mokotor takinnya, bo bayongan intau kon dunia na'a ain noḷoḷangu sin nonginum kon anggur inta ain kinotorannya."
3 Bo aku'oi kinawasa'an in Roho i Allah bo dinia im malaekat tatua kom padang gurun. Kon tua aku'oi noko'ontong kon tobatuí bobay inta ilimituí kon tudu in tobatuí mahaḷuk inta nopars im batangannya. Mahaḷuk tatua nopuling im pais inta pohojat ko'i Allah. Pitu in uḷu mahaḷuk tatua bo mopuḷuh in tungoinya.
4 Bobay tatua nogi ḷambung in ḷambung nopars bo nopura noguyang, bo ihiasan im buḷawan mita, permata bo mutiara. Sia kokada-kadai in tobatuí palo buḷawan inta nopuling in soaáḷ mita inta mora'at bo mokotor, hasil in aid mita monia inta mongokotor.
5 Kom pogotnya pinaisan in tangoi inta mangalenya "no'ibuni". Tangoi tatua im "Babel inta moḷoben ki inaí im bayongan bobay inta sundaḷ bo intau mita moromuí kon dunia."
6 Bo inontongku bobay tatua noḷoḷangu in duguí in umat mita i Allah bo duguí intau mita inta nobalií saksi mita i Yesus. Naonda inontongku im bobay mita tatua, noherangdon totok in aku'oi.
7 Daí malaekat tatua noliboí ko'inakoí nana'a: "Nongonu sin ikow im moherangbií? Yo pogumankudon ko'inimu onu inta no'ibuni kom bobay tatua bo onu inta no'ibuni kom mahaḷuk inta sinakoiannya tatua, mahaḷuk inta pitu in uḷu bo mopuḷuh in tungoi.
8 Mahaḷuk tatua pernahbií nobiag ing kolipod, ta'e masai na'a diaídon, tongaí topiípabií bo ḷumuai in sia nongkon tampat pohohukuman kon irang bo sia mopobayakdon in tampat koyoyangan. Intau mita kon dunia na'a inta diaí pinais in tangoi monia kom bonu im buk intau nobiag mulaipa kon dunia na'a diaípa pinomia, moherangbií aka moko'ontong kom mahaḷuk tatua. Sim mahaḷuk tatua kolipod im pernahbií nobiag, ta'e tana'a in diaí bidon, tongaí buidon mo'itukat.
9 Kon soaáḷ mita nana'a paraḷu oyuíon in hikmat bo pongortian. Uḷu pitu tatua, mangalenya buḷud pitu; buḷud mita inta ilituían im bobay tatua. Bo uḷu pitu tatua mangalenya raja pitu:
10 lima nongkon sigad monia tua ain noḷabuí, tobatuí in nomarentahpa, bo tobatuí doman diaípa namangoi. Aka sia mamangoi, yo momarentahpa motoyong in sia.
11 Bo mahaḷuk inta pernah nobiag kolipod, ta'e diaídon in tana'a makow, tua in raja inta iwaḷunya. Sia tua in tobatuíbií doman raja kon sigad naya pitu tua, inta masa na'a koyogot mayak in tampat koyoyangan monia.
12 Tungoi mopuḷuh inta inontongmu tua in raja mopuḷuh inta diaípa nomangkoi nomarentah. Ta'e mosia ogoianbií ing kawasa momarentah saḷaku raja moyotakin im mahaḷuk tatua solama to jam ko'onggotea.
13 Mosia na'a notobatuíbií kon singog bo makusud kom moposarahkan in ropot bo kakuasa'an monia kom mahaḷuk tatua.
14 Mosia noyopakat kom moparang kon i Adií in Domba tatua. Ta'e ki Adií in domba tatua takin dumodudui-Nya mita inta mosatia bo inta ain inoinií bo pinilií-Nya tatua im monaḷow kon raja mita tatua, sin Siata in Tuang im bayongan tuang, bo Raja im bayongan raja."
15 Malaekat tatua noguman doman, "Tubig inta inontongmu tatua, tampat inta ilituían im polacur tatua, tuata im bangusa mita, rayat mita, negara mita bo bahasa mita.
16 Tungoi mopuḷuh bo mahaḷuk inta inontongmu tua, moya'atbií ing ginanya kom polacur tatua. Daitonbií agowon monia im bayongan kapunya'annya, bo pilangan monia. Ka'anonbií monia in tapuínya bo payongon monia in tuḷu.
17 Sing gina monia sinimbayagandon i Allah simbaí mogaid kon inta kino ibog-Nya. Sinobatuídon i Allah im mosia simbaí moyopakatdon moposarahkan ing kakuasa'an monia kom mahaḷuk tatua, simbaí mahaḷuk tatua momarentah modapot im mobalií onu inta pinoguman i Allah.
18 Bobay inta inontongmu tatua ing kotaíbií moḷoben, inta nomarentah kon raja mita kon dunia na'a."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA