Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali yako etu re’e samba’a pomakau to pitu to re’e yama to pitu etu, ia ma’i mampogomboka aku, ia manganto’o, “Maimo, aku damampaporaoka korom huku to danarata nu lonte to nansani ntau boros. Lonte etu re’e matunda ri tampa to bae uenya.
2 Pasi to lino pasi makole-makolenya tare pandoonya magoyal resi ia. Palaong etu raporapaka ewa tau manginu tule naka kayangu.”
3 Wali ojo karoonya pomakau mangampogomboka aku, aku nawaika wo’u i Nosa Mapasing pangkita. Wali ri raya mpangkitangku etu, aku nakeni mpomakau to owo roo kukita ngena njo’u pada bone. Rata nja’u ria aku mangkita tau we’a to mampolea binatang maja’a to mawaa. Binatang etu pitu wo’onya pasi sampuyu tondunya. Pasi ia boros sanga ri koronya, sanga to manganto’o maja’a i Pue Allah.
4 Pasi tau we’a etu pakenya makamumu pasi mawaa. Pasi re’e weyawa, pasi re’e seja watu makilo to masuli olinya pasi mutiara mampakagaya pakenya etu. Wali tau we’a etu ia mangkongko sangkir weyawa. Banang nu sangkir etu anu to maja’a pasi makarika. Wali banang nu sangkirinya etu tondong lengkonya to magoyal.
5 Pasi tau we’a etu re’e sanga ratulis ri kirenya. Sanga etu batuanginya taa nansani ntau. Wali sanga to ratulis etu semo, “BABEL TO BAE, INDO NU LONTE PASI PU’U NGKAJA’A RI LINO.”
6 Wali aku mangkita tau we’a etu ia room mampopate yau malagi tau to i Pue Allah Puenya pasi to mangalulu i Yesu. Raa ntau to napopate yau etu raporapaka ewa tule to mampakayangu ia. Wali aku ipu kojo rayangku mangkita tau we’a etu.
7 Pei pomakau i mPue Allah ia manganto’oka aku, “Maka pei ipu raya ngkorom? Aku damampakanasaka korom anu to taa nansani ntau. Etu semo batuanginya tau we’a etu, pasi batuanginya binatang maja’a to pitu wo’onya pasi to sampuyu tondunya to napolea ntau we’a etu.
8 Wali binatang to nukita etu, ia tuwu tempo ruyu pei si’i-si’i ia tamo tuwu. Pei ia damasuwumo yako la’u wayau to taa ransani ungka ngkayombunya panewa yako etu ia darapakaja’aka. Wali to lino to tare sanganya ratulis nja’u raya buku ngkatuwu to yako ri tempo lino rapapowali, sira daipu rayanya mangkita binatang etu. Naka pei ipu raya nsira mangkita, apa ia tuwu tempo ruyu, pasi roo see ia tamo tuwu, panewa roo see ia damasuwu muni. See naka tau ipu rayanya.
9 Wali pobuuka kojo apa tau to mampobuuka kojo, tau etu damangansani batuanginya anu to kuto’o si’i. Binatang etu pitu wo’onya, wo’onya pitu etu batuanginya tongkutongku pitu to napotunda ntau we’a etu.
10 Pasi wo’onya pitu etu tondong makole pitu seja. Wali makole pitu etu re’e lima to room namate yau, pasi samba’a ia re’ewa pasi samba’a tawa rata. Makole to tawa rata etu, tempo ia darata ia taa maya taa maporenta pei taa masae paporentanya.
11 Wali mangkonong binatang to tuwu tempo ruyu pei ia matem, ia semo to mawali wo’u makole to kawayu. Ia samba’a yako ri makole to pitu, pei tempo ia tuwu muni ia mawali makole to kawayu, pei ia darapakaja’aka yau.
12 Wali mangkonong sampuyu tondu binatang to maja’a to nukita ngkorom etu, tondu etu batuanginya sampuyu makole. Makole etu sira tawa mangantima kuasa maporenta, pei sira damangantima kuasa mawali makole samba’a jam kasaenya. Wali sira damaporenta sindara-ndara pei binatang to maja’a.
13 Wali makole to sampuyu etu samba’aja pampobuukanya, pasi sira damangawaika yau resi binatang to maja’a karoso pasi kuasa to si sira.
14 Wali sira damangamusu Ana nu domba, pei Ana nu Domba pasi joaNya damanganangi sira. Ia manganangi sira apa Ia semo Pue to mangkuasang samparia pue pasi Ia semo Makole to mangkuasang samparia makole. Pasi joa to sindarandara pei Ana nu Domba tempo manganangi baliNya etu, etu semo tau to Ia semo mampokio pasi to ipilisiNya, pasi to tare pandoonya mangalulu Ia.”
15 Wali yako etu, pomakau etu mampogomboka wo’u aku, ia manganto’o, “Ue to nukita ngkorom ngena, ue to napotunda nu lonte, ue etu tondong nto lino, etu semo tondong bansa-bansa, pasi tondong ntau boros, pasi tondong mpaporenta pasi basa-basa nto lino.
16 Wali tondu to sampuyu to nukita ngkorom ngena, pasi binatang to maja’a, sira damaja’a nakita lonte etu. Wali sira damangoko yau samparia to re’e resi ia, pasi sira damangalambeng ia. Panewa sira damangkoni yau wombonya pasi damangantunu yau ia pura.
17 Naka pei sira mangika ewa see apa i Pue Allah mangawaika makole sampuyu etu pampobuuka see sira mangaluluka songka to si Ia. Wali songka i mPue Allah etu, etu semo sira samba’a pampobuukanya mangawaika yau kuasa nsira resi binatang to maja’a see ia semo to maporenta ri lino sampe rata temponya tibanang gombo i mPue Allah.
18 Wali tau we’a to nukita ngkorom etu, ia semo tondong nu kota to bae to mangkuasang samparia makole nto lino.” Etu semo gombo to nato’oka mpomakau etu aku.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA