Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ma ngona Titus, ngona salingou nosidotoko 'o do-dotoko yadae-daene.

² Nakidongose 'o nau-naurika gee yope-perekiokau 'ato 'ona salingou ya'akunu manga nyafisuu yatahani, yobarija de yo'ahu gee yadaene 'o nyawa yakihoromati. Mita 'ona salingou tatapu yongaku ma Kristusika, yakidora 'o nyawaka de yotongosono 'o sangisara ma sigoronaka.

³ Koge'enali mita salingou nakidongose 'o nge-ngeweka gee yope-perekiokau, la to 'ona manga gokoie salingou 'isoka kokia naga 'o nyawa gee yo'ahu duga ka ma Jou wileleani. 'Ona koidadiwa yakisigurubungu 'o nyawa 'iregu, de 'uwa yodopokana 'o daluku ma gosaka. 'Ona salingou yosidotoko 'o gokoie yaowa-owa.

⁴ La de ge'ena 'ona 'idadi yakidotoko 'o nge-ngeweka gee koyope-perekiwasi la yosibosono manga rokata de manga ngowa-ngowaka,

⁵ yo'ahu yobarija, yo'ahu 'itebini, manga singina 'isure, de ya'akunu ya'aturu 'isure-sure manga woa ma dodaku, de mita yosingou-ngounu manga rokatika. De ge'enau komoiwa 'idadi yosito-torou 'o habari ma Jo'oungu ma Dutuno.

⁶ Koge'enali mita nakidongose 'o nyawa ma goo-gooka 'o nau-nauru, la 'ona yobarija naga 'o sagala moi-moika ma ngale ya'akunu ya'aturu manga 'ahu de 'idadi yatahani manga nyafisuu.

⁷ Naga 'o sagala moi-moioka ngona salingou 'ani di-diai yaowa-owa la 'o nyawa ma goo-gooka 'o nau-nauru 'idadi yomaduru ngonaka. Nako ngona nodotoko, salingou noloa de nosigou-gounguku.

⁸ Napake 'o demo-demo de ma faedaaka de yadae-daene, la 'o nyawa gee konido-domotekuwa ngonaka 'asa yakimaeke sababu 'ona ka moi ma koyamakewa 'okia sonaa 'ito-torou podiai, so koyosigurubunguwa 'ato nanga di-diai 'itorou.

⁹ 'O yongo-yongosi salingou yosigisene manga tuangika, de yasanangi manga tuangi 'awi singina naga 'o sagala moi-moioka, de koidadiwa yakiributu,

¹⁰ bolo yotosiki. Salingou kaitaurika yosidumutu 'ato 'ona manga jako yaowa de yosingounu, la de to 'ona manga jako ge'ena 'o nyawa yosiarene 'o do-dotoko ma ngale ma Jo'oungu ma Dutu wonasilaha-laha.

¹¹ Sababu ma Jo'oungu ma Dutu wosidumutokau 'awi singina ma sure ma ngale wosilaha 'o nyawa 'iodumu.

¹² Ma Jo'oungu ma Dutu 'awi singina ma sure ge'ena 'inadotoko la 'uwau po'ahu 'imakatilikutu de ma Jo'oungu ma Dutu wi mau, de kopamotekuwa 'o dunia ma nyafisuu, pobarija pa'aturu nanga 'ahu de nanga nyafisuu patahani, nanga singina 'itiai, de posingounu ma Jo'oungu ma Dutuka.

¹³ Ma 'orasi ne'ena ngone poda-dadanu 'o Wange gee ngone pongano-nganonou, ge'ena ma Wange 'o nyawa 'o duniaka 'asa yamake ma Yesus Kristus 'awi kumati. 'Una ge'ena la ma Jo'oungu ma Dutu gee 'awi kuasa ma batingi koi'iwa, de to ngone nanga Koana Wonasilaha-laha.

¹⁴ 'Una womasisarakani wosongene ma ngale wonariwo wonasipidili 'o sagala dorouoka. De wonadiai 'o 'umati 'itebi-tebini de 'idadi ka to 'unau wi rongamoi gee poma-magae podiai yaowa-owa.

¹⁵ De 'o hak ma Jo'oungu ma Dutuoka wonikulano, nosidotoko ge'ena 'iodumu, nakidongose de mita nakitawanono gee nisigise-gisene go'ona. De ka 'o nyawa moi ma 'uwa nakisimadaka koyokalesanguwa 'okia naga gee nosidoto-dotoko.

Titus

Video Titus 2

Ikuti Kami:

KONTAK | PARTISIPASI | DONASI