Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Arawe i kau, Titus, i kau e paněntirongkon těntiro mạtumang.
2 Pěnasako si sire manga esẹ maghagurang e tadeạu i sire mẹ̌biahẹ̌ mẹ̌ngẹ̌dal᷊u watangeng, pelesa, dingangu tadeạu i sire mangimangbe su Mawu Ruata kere hinone, nasukụ u kakěndagẹ̌ dingangu masabarẹ̌ su sigẹ̌sạ.
3 Kerene lai sasai manga wawine maghaghurange tadeạu kalakuang i sire e mẹ̌tẹ̌tatal᷊ahino wue kere su hinone waugu taumata měbẹ̌biahẹ̌ nahae waugu Ruata. I sire tawe wotonge měhinakang taumata wal᷊ine, ringangu tawe wotonge měngkai mạhimatụ měnginung inumang makạbukang. I sire kai harusẹ̌ měněntirong hal᷊ẹ̌ mapapia,
4 tadeạu i sire mal᷊aing makapaněntiro manga wawine mangangudạ e kuměndagu kawinge ringangu anạ i sire,
5 mạpelesa, mẹ̌biahẹ̌ susi, mạkoạ i ninangu ral᷊ungu wal᷊e mapia marariringihẹ̌ su kawinge. Kamageng kerene tangu tawẹ apa taumata kụ makạtongkeang habarẹ̌ bọu anun Duata.
6 Kerene lai sasaiko i sire mangangudạ tadeạu i sire měngkapelesa.
7 Kụ i kau e pěnodẹkong kakanoạ mapia su patikụ munara e makoạ kakakěllaěng. Kereu i kau maněntiro harusẹ̌be pakatatul᷊idẹ̌ dingangu kạsěllahu ral᷊ungu naungu.
8 Pẹ̌pakẹkom bawera maral᷊uegha; kụ tawe kasěngkul᷊ang i sai-sai, tadeạu apan lụl᷊awang si kau ene e měngkamea ual᷊ingu tawẹ apa we kareakeng apa raral᷊akị ikapaul᷊ị i sire mạanung kitẹ.
9 Mẹ̌tatangkiange kai harusẹ̌ pakasasuměllung su mawune ringangu makạdal᷊uasẹ̌ naunge su patikụ munara. I sire kumbahang měngkai ruměndehẹ̌, arau mẹ̌tako.
10 Kaiso kawe manodẹ u kapia ringangu satia, takadeạu taumata e mẹ̌mantugẹ̌ injilu Mawu Ruata Měngangambang si kitẹ e.
11 U Ruata e seng něnodẹ u tatal᷊ěntụ e waụgu měngambang patikụ taumata.
12 Tatal᷊ěntụu Ruata e mạněntiro si kitẹ e tadeạu i kitẹ e semben tawe mẹ̌biahẹ̌ lumawang kapulun Duata e ringangu tawe tumatuhụ ěnning mạdunia e. I kitẹ tẹ̌těntiroěng měbiahẹ̌ su dunia ini tadeạu mẹ̌biahẹ̌ maamumang, adilẹ̌, dingangu satia su Ruata.
13 Kụ ini e i kitẹ kạpẹ̌ngẹ̌ngampal᷊e Ěllo lẹ̌antiwang i kitẹ e; su Ěllo ene dunia sarung makatingang kawantug'i Yesus Kristus, kụ kai Ruata Kasěllaheng'E Ratu'n Sal᷊amat'i kitẹ e.
14 I Sie seng něnarakangu watangeng'E waụgi kitẹ tadeạu měngambang si kitẹ bọu patikụ kararal᷊akisẹ̌ kụ něliung kitẹ bọu rosa ringangu sěmatang makoạ tataghuaneng'E sẹ̌sane, mase makěhagẹ̌ měkoạ mapia.
15 Těntiroko patikụ ene, ringangu pěnasako arau pěngurihẹ̌ko rumararingihẹ̌ si kamene ringangu piạ pěhěngkinge. Piawe piạu pẹ̌sěngkatau ta měndekeng i kau e.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA