Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ma 'orasi ne'ena 'ona gee yo'ahu yomarimoi de ma Kristus Yesus, 'ona koyakihukumuawau.

² Sababu 'o Ngomasa 'Itebi-tebini so ngone po'ahu pomarimoi de ma Kristus Yesus. Ge'enau so ngoi 'isipidilokau 'o besesongoka gee ma duanguku 'o sowono de 'o songene.

³ 'O besesongo gee 'o Musa wositota-totara koinariwowa ma ngale 'uwau poduaka 'o sowono podiai sababu ngone kopa'akunuawa pamoteke 'iodumu. Ge'ena dau ma Jo'oungu ma Dutu wonariwokau. 'Una waisanga 'o sowono ma pareta 'o nyawa 'isowo-sowonoka ma ngekomo wosidingoto 'awi Ngowaka ma sirete, gee woboa womadadi nyawa, ma ngale watuusu 'o sowono.

⁴ Ma Jo'oungu ma Dutu koge'ena wodiai la 'okia naga gee 'isilefo-lefoku 'o besesongoka gee 'o Musa wositota-totara 'idadi padiai moteke 'o Ngomasa 'Itebi-tebini ma kuasa so po'ahu moteke ko to ngonewa nanga mau 'isowo-sowono.

⁵ 'O nyawa gee yo'ahu moteke ka to 'ona ma sirete manga mau 'isowo-sowono, 'ona yatiba-tibangi ka to 'ona ma sirete manga du-duaka. Ma 'o nyawa gee yo'ahu moteke 'o Ngomasa 'Itebi-tebini, 'ona yatiba-tibangi ka 'okia naga 'o Ngomasa 'Itebi-tebini ma du-duaka.

⁶ Nako 'ania di-dibangi yaparetano ka to ngini ma sirete 'ania mau 'isowo-sowono, ge'ena ma boiro 'o songene. Ma nako 'ania di-dibangi yaparetano 'o Ngomasa 'Itebi-tebini, ge'ena ma duanguku 'o 'ahu de nia singina 'isanangi.

⁷ 'O nyawa gee manga di-dibangi ka to 'ona ma sirete manga mau 'isowo-sowono yaparetano, 'ona ge'ena wisaturuu ma Jo'oungu ma Dutu, sababu 'o nyawa go'ona koyosingounuwa ma Jo'oungu ma Dutu 'awi besesongo, de ma goungu 'ona koya'akunuwa yosingounu ma Jo'oungu ma Dutu 'awi besesongo.

⁸ 'O nyawa gee yo'ahu moteke ka to 'ona ma sirete manga mau 'isowo-sowono, 'ona koya'akunuwa yadiai gee ma Jo'oungu ma Dutu wodua-duaka.

⁹ Ma ngini nio'ahu koniamotekuwa ka to ngini ma sirete 'ania mau 'isowo-sowono. Ngini nio'ahu moteke 'o Ngomasa 'Itebi-tebini nako la ma gou-goungu 'o Ngomasa 'Itebi-tebini naga 'ania 'ahu ma sigoronaka. 'O nyawa gee 'onaka koi'iwa ma Kristus 'awi Ngomasa, 'ona ge'ena ko to ma Kristusuwa 'awi nyawa.

¹⁰ Ma nako ma Kristus naga nginioka, ge'ena ngaro 'ania roese dua 'isongene sababu 'o sowono, ma 'o Ngomasa 'Itebi-tebini nikula 'o 'ahu sababu nimarimoioli de ma Jo'oungu ma Dutu.

¹¹ Nako 'o Ngomasa 'Itebi-tebini gee ma Kristus wosongenuku de wisimomi-momiki naga nginioka, ge'ena 'enau dua wosimomiki 'ania roese gee koika-kakaliwa.

¹² Ge'enau so 'Esa moi riaka dodoto, ngone salingou padiai 'okia naga gee moteke 'o Ngomasa 'Itebi-tebini ma mau, so koidadiwa moteke ka to ngone nanga mau 'isowo-sowono.

¹³ Sababu nako ngini nio'ahu moteke ka nia mau 'ito-torou, ge'ena ngini 'asa koniamakewa 'o 'ahu 'ika-kakali. Ma nako de 'o Ngomasa 'Itebi-tebini ma guata ngini niaso-songene 'o manarama 'isowo-sowono, ge'ena ngini 'asa nio'ahu.

¹⁴ 'O nyawa gee 'o Ngomasa 'Itebi-tebini yakipareta, 'ona ge'ena ma Jo'oungu ma Dutu 'awi ngowa-ngowaka.

¹⁵ Sababu 'o Ngomasa gee ma Jo'oungu ma Dutu winikula-kula nginika, ge'ena konisiyongosuwa so ma duanguku konimodonguwa. Ma 'ena 'o Ngomasa 'Itebi-tebini nidiai ngini niodadi ma Jo'oungu ma Dutu 'awi ngowa-ngowaka. De 'o Ngomasa 'Itebi-tebini ma guata so ngone po'asoko ma Jo'oungu ma Dutuka, "'Aba, 'ai Dea!"

¹⁶ 'O Ngomasa 'Itebi-tebini de mita to ngone nanga singina ma dodaka 'ingose 'ato ngone ne'ena ma Jo'oungu ma Dutu 'awi ngowa-ngowaka.

¹⁷ Nako ngone ne'ena to 'una 'awi ngowa-ngowaka, ge'ena ngone mita 'awi warisi ma dutu gee dua padawongo 'o co-catu ma Jo'oungu ma Dutu wadua-duangou ma ngale 'awi ngowa-ngowaka. Ngone 'asa padawongo de ma Kristus 'okia naga gee ma Jo'oungu ma Dutu wadua-duangou. Nako ngone posangisara de ma Kristus, ngone 'asa 'inasitedene mita de ma Kristus.

¹⁸ 'O sangisara 'iodumu gee ngone pamaokau ma 'orasi ne'ena, moteke to ngoi 'ai di-dibangi, ka ma eta ma koidadiwa positero de 'o sanangi gee dua 'inasidumutu ma 'orasi 'inasitedene.

¹⁹ 'O do-dadi 'iodumu posironga 'iduakoka 'imadadanu ma 'orasi ma Jo'oungu ma Dutu wosidumutu 'awi ngowa-ngowaka.

²⁰ Sababu 'o do-dadi 'iodumu ma Jo'oungu ma Dutu kawosidabikau ma faedaa koi'iwau, ge'ena ko 'o do-dadiwa ma sirete ma mau, ma 'ena ma Jo'oungu ma Dutu 'awi mau. Ngaro koge'ena ma de ma 'enasi 'o singina nganono

²¹ ge'ena la 'o 'orasi ma moi, 'o do-dadi 'iodumu 'asa ma Jo'oungu ma Dutu wosipidili gee 'isito-torou ma paretaka de wositedene ka ma moi de 'awi ngowa-ngowaka.

²² Ngone panako sigado ma 'orasi ne'ena 'o do-dadi 'iodumu 'itudu-tudunu 'imasigasoko sababu 'isangisara 'isoka 'o ngeweka mimoi mosangisara ma 'orasi momaku'arene.

²³ De duga ka'enawa 'itudu-tudunu ma 'ena ngone ma sirete mita potudunu nanga singina ma dodaka. Ngone padawongokau 'o Ngomasa 'Itebi-tebini ge'ena la ma Jo'oungu ma Dutu 'awi co-catu ma di-disiraka, ma ngone kapodadanuosi mita ma Jo'oungu ma Dutu wosipidili nanga roese 'iodumu 'o sowonoka de wonadiai to 'una 'awi ngowa-ngowaka.

²⁴ Sababu de nanga singina nganono ge'enau, so ngone 'inasilaha. Ma nako 'okia naga gee ngone pongano-ngano ge'ena pamakekau, ge'ena ko 'o singina nganonuawau. Sababu ma goungu 'o kianikia moi la pamakekau ge'ena ko 'o singina nganonuawau!

²⁵ Ma nako ngone pongano-nganono 'o kianikia gee kopamakewasi, ge'ena ngone podadanu de nanga sabari.

²⁶ Koge'enali mita 'o Ngomasa 'Itebi-tebini 'iboa 'inariwo 'okia naga gee ngone kopa'aku-'akunuwa. Sababu ngone kopanakowa kokia salingou ngone polahidoa. 'O Ngomasa 'Itebi-tebini ma sirete 'inasiga'asoko ma Jo'oungu ma Dutuka de ma singina nganono koge'ena ma amokoka sigado koya'akunuwa yangose de 'o demo-demo.

²⁷ So ma Jo'oungu ma Dutu gee wosikakanako 'okia naga nanga singina ma dodaka, wasahe 'o Ngomasa ge'ena ma mau, sababu 'o Ngomasa ge'ena 'iga'asoko ma Jo'oungu ma Dutuka ma ngale 'awi 'umati, de moteke to 'una 'awi mau.

²⁸ Ngone panako ma Jo'oungu ma Dutu wa'aturu 'okia sonaa 'iodumu, la 'awi nyawa gee wisiboso-bosono ge'ena la 'o nyawa gee waki'asoko moteke to 'una 'awi mau, yomadamake yaowa-owa.

²⁹ 'Ona gee ma Jo'oungu ma Dutu wakiirikokau ka ma guruenosi, wositatapuokau mita ma ngale yodadi 'isoka 'awi Ngowaka, ge'ena la ma Yesus Kristus. Ge'enau so 'o Ngowaka gu'una 'ifoloi wopareta naga 'awi 'esa moi yoku-kudaioka.

³⁰ Koge'ena ma do-dagi ma Jo'oungu ma Dutu waki'asoko 'ona gee wakisitatapuokau ka ma guruenosi, 'ona gee waki'asokokau, wakidiai yomarimoioli de de 'una. De 'ona gee yomarimoiokali de de 'una, 'ona yomadamake 'awi kumati.

³¹ Ngone panakokau 'iodumu ge'ena, so ngone 'idadi pongose konee, nako ma Jo'oungu ma Dutu de de ngone komoiwa 'ina'akunu.

³² Ma Jo'oungu ma Dutu kowatu'umunguwa 'awi Ngowaka ma sirete, so 'ena wosarakani ma ngale wonasilaha ngone poodumu. So ma raiokau 'una 'asa wonakula mita 'okia sonaa 'iregu-regu.

³³ Komoiwa moi ya'akunu 'inasisala ngone gee ma Jo'oungu ma Dutu wonairi-iriki, nako ma Jo'oungu ma Dutu ma sirete wongose 'ato ngone pomarimoiokali de de 'una!

³⁴ 'O nyawa 'asa koya'akunuwa 'inasisala ngone! Ma Kristus Yesus 'asa wonariwo ngone wonasiga'asoko ma Jo'oungu ma Dutuka. Ma Kristusou gu'una wosongenokau ma ngale wonariwo ngone, de 'ifoloiosi ge'ena la wisiwangokali ngaro wosongenukou ma. 'Una naga de ma Jo'oungu ma Dutu gee wi kuasa ma batingi koi'iwa ma ngale yomasidapareta.

³⁵ Komoiwa ya'akunu yatatoko ma Kristus 'awi dora ngoneno! 'O sangisara de 'o singina ma susa, 'o sikisaa, 'o baulaco, 'o saigalere, 'o bahaya de 'o do'oma koya'akunuwa yatatoko ma Kristus 'awi dora ngoneno.

³⁶ ('O Buku 'Itebi-tebini ma dodaka 'isilefoku koneda, "'O wange moi yapasiku ngomi rekeni mito'omaka sababu miongaku ngonaka. Ngomi midiai 'isoka 'o domba gee yatoakou.")

³⁷ Ma 'iodumu ge'ena dau ma dodaka, ngone ma gou-goungu koina'akunuwa, sababu ma Kristus gee wonasiboso-bosono wonariwo ngone!

³⁸ Sababu ngoi tongaku ma gou-goungu, kiaka naga bato 'o duniaka ne'ena, komoiwa 'idadi yatatoko ma Jo'oungu ma Dutu 'awi dora ngoneno. 'O songene bolo 'o 'ahu, 'o mala'ekati, bolo yopa-pareta bolo 'o sagala moi-moi gee podo-dodato ma 'orasi ne'ena de ma 'orasi ma du'uruoka, bolo 'iregu-reguosi gee 'ipa-pareta,

³⁹ 'okia sonaa 'o diwangoka, bolo 'o tonaoka bolo 'okia naga bato 'iregu-iregu, 'iodumu ge'ena koidadiwa yatatoko ma Jo'oungu ma Dutu wonadora ngone, 'isoka gee wosidumutokau ma Kristus Yesusoka to ngone nanga Jou.

Roma

Video Roma 8

Ikuti Kami:

KONTAK | PARTISIPASI | DONASI