Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kamma-kamma anne tenamo hukkungang lantabai tau assileokamo katallassanna siagang Isa Almasi.

² Nasaba’ hukkung battua ri RohNa Allata’ala ampasileoki katallassanta siagang Isa Almasi; Iami allappassangki’ battu ri hukkung angngerangaki’ mae ri dosaya siagang kamateanga.

³ Apa tenaya nakkulle nagaukang hukkung-hukkung agamaya, lanri lammana batangkalenta ikatte rupataua, iaminjo le’ba’ Nagaukang Allata’ala. Le’ba’mi Nabeta Allata’ala koasana dosaya lalang ri sipa’na rupataua; iamintu lalang Nasurona battu Ana’ KalenNa, le’bakamo battu sanrapang rupatau dorakaya, sollanna Natangkasi dosa-dosata.

⁴ Kammaminjo Nagaukang Allata’ala, sollanna akkulle nigaukang anjo apa-apa Nakaerokia lalang ri hukkung-hukkung agama Yahudia, lalang ri batangkalenta ikatte tau mannurukia mae ri RohNa Allata’ala, jari teai mannurukia mae ri sipa’-sipa’ ma’rupatauta.

⁵ Inai-nai mannuruki mae ri sipa’-sipa’ rupataua, tuli lananawa-nawai apa-apa nakaerokia sipa’-sipa’ ma’rupataua. Mingka inai-nai attallasa’ mannuruki ri RohNa Allata’ala, tuli lananawa-nawai anjo apa Nakaerokia RohNa Allata’ala.

⁶ Punna nikoasai pikkirannu ri sipa’-sipa’ ma’rupataua, kale’bakkanna lanugappai kamateanga. Mingka punna nikoasai pikkirannu ri RohNa Allata’ala, kale’bakkanna lanugappai katallassanga siagang passiamakkanga siagang Allata’ala.

⁷ Inai-nai nikoasai pikkiranna ri sipa’-sipa’ ma’rupataua, iami assimusu siagang Allata’ala; nasaba’ anjo taua tamannurukiai ri hukkung Napassuroanga Allata’ala; siagang tena memang todong nakkulle mannuruki ri hukkunNa Allata’ala.

⁸ Inai-nai attallasa’ mannuruki ri sipa’-sipa’ ma’rupataua, anjo tau kammaya tanikarannuangai ri atinNa Allata’ala.

⁹ Mingka ikau ngaseng teako mannuruki ri sipa’-sipa’ rupataua lalang tallasa’nu. Punna mattantu RohNa Allata’ala angngatoroki kalennu, mattantu lamannurukiko ri RohNa Allata’ala lalang tallasa’nu. Inai-nai tena ri kalenna RohNa Almasi, anjo taua teai taunNa Almasi.

¹⁰ Mingka punna nia’mo Almasi lalang ri kalennu, manna pole lamate tubunu passabakkang dosa, mingka lanri baji’na passisambungannu siagang Allata’ala, lanisareko ammotere’ katallassang ri RohNa Allata’ala.

¹¹ Punna niaki lalang ri kalennu RohNa Allata’ala, iamintu Roh ampattallasa’ poleangai Almasi battu ri kamateanga, Ia tomminjo RohNa lampattallasaki tubunu akkullea mate.

¹² Iaminjo saba’na, sari’battangku ngaseng, nanisare maki’ tanggongang parallua nikatutui; mingka teai tanggongang mae ri sipa’-sipa’ rupataua, nasaba’ tena naparallu niturukiang ero’na sipa’-sipa’ rupataua.

¹³ Nasaba’ punna niturukiang ero’na sipa’-sipa’ rupataua ma’nassa lamateko; mingka punna lanri koasaNa RohNa Allata’ala natuli nupamate panggaukang-panggaukang dosanu, ma’nassa lattallasakko.

¹⁴ Inai-nai nirurungang ri RohNa Allata’ala, iami ana’-ana’Na Allata’ala.

¹⁵ Nasaba’ anjo Roh Napassareanga Allata’ala mae ri kau ngaseng, tena Napa’jari atako sa’gennu a’jari malla’ lalang ri katallassannu. Passangalinna anjo RohNa Allata’ala ampa’jariko ana’-ana’Na Allata’ala. Siagang lanri koasaNa anjo RohNa Allata’ala akkulle maki’ angkana ri Ia, "Manggeku, Manggeku!"

¹⁶ RohNa Allata’ala siagang rohna kalenta ampa’nassai angkanaya a’jari maki’ ana’-ana’Na Allata’ala.

¹⁷ Jari punna a’jari maki’ ana’-ana’Na, ma’nassa a’jari tommaki’ warisi’Na, lantarimayai sikamma barakka’ le’baka Napasadia Allata’ala untu’ ana’-ana’Na. Lannarimaki’ siagang Isa apa le’baka Napasadia Allata’ala untu’ Isa; nasaba’ punna sikapa’risangki’ siagang Almasi, lasiagang tommaki’ Almasi nipakala’biri’.

¹⁸ Sikamma pa’risi’ nikasiaka ri kamma-kammaya anne turu’ ri panggappaku, tena nasiapa punna nipasingnganggaraki siagang kala’birang lanipa’nyataya mae ri katte sallang.

¹⁹ Sikontu linoa sanna’ ngasemmi manakku’na antayangi angkanaya kerepi wattu naNapa’nyata Allata’ala kala’birang laNapassareanga mae ri ana’-ana’Na.

²⁰ Nasaba’ niboli’mi a’jari jappo’ linoa, teai lanri ero’na linoa, passangalinna lanri niboli’na kamma ri Allata’ala. Mingka manna nakamma nia’ija panrannuang:

²¹ angkanaya nia’ se’re wattu nanilappassang sikontu linoa battu ri kakoasang ammanrakia siagang lamminawang tongi lanipamaradeka kammayatompa lanipakala’biri’ siagang ana’-ana’Na Allata’ala.

²² Niassengi angkanaya sa’genna kamma-kamma anne akkunrareng ngasengi sikontu linoa napakamma sessa, sanrapang sessana sitaua baine punna lammana’.

²³ Ba’lalo teai linoa bawang akkunrareng; passangalinna manna ikatte akkunrareng tongi lalang atinta. Le’ba’mi nitarima RohNa Allata’ala. Iaminjo passare uru-uruNa Allata’ala. Mingka attayangijaki’, sollanna nilappassang todong sikontu batangkalenta ri Allata’ala siagang Napa’jariki’ ana’-ana’Na.

²⁴ Nasaba’ lanri pa’minasata, nakinipasalama’. Mingka punna nigappa memammi anjo apa niminasaia, anjo teaimi pa’minasa arenna. Nasaba’ inaika amminasai apa nagappayamo?

²⁵ Mingka punna ma’minasaki’ ri apa-apa tenayapa nigappai, paralluki sa’bara’ antayangi anjo niminasaia.

²⁶ Kamma tomminjo, punna lammaki’, battui RohNa Allata’ala antulungki’. Nasaba’ taniassengai angkana antekamma bateta musti appala’ doang; Iaminjo Roh mange andallekang ri Allata’ala sannaka batena ampappalakkangki’, sa’genna taniassengamo ikatte nipau anjo apa parallua nipala’.

²⁷ Allata’alaji angngassengi atinna rupataua; jari Iami angngassengi anjo apa Napalaka Roh. Nasaba’ anjo Roh ampappalakkangi ri Allata’ala apa naparalluanga umma’Na Allata’ala; siagang situruki ero’Na Allata’ala anjo apa napalaka.

²⁸ Niassengi angkanaya Allata’ala ngaseng angngatoroki sikontu apa-apaya, sa’genna a’jari baji’ mae ri sikamma tau angkamaseangai, iamintu sikamma tau Nakioka situru’ ero’ panggaukanNa.

²⁹ Sikamma tau le’baka Napile Allata’ala, le’ba’ tommi nipattantu battu ri uru-uru memang untu’ a’jari sangkamma ana’Na, iamintu Isa Almasi. Lanri kammana, iaminjo Isa Almasi a’jari ana’ bungasa’ mae ri sikamma sari’battanna ngaseng.

³⁰ Kammaminjo bateNa Allata’ala angkioki sikamma tau le’baka Napattantu memang la’bi riolo; na sikamma anjo tau Nakioka nisare oloang assibajiki ammotere’ siagang Allata’ala. Na sikamma anjo tau le’baka nisare oloang assibajiki ammotere’ siagang Allata’ala, nisare tommi pammantangang lalang katallassang KalenNa Allata’ala.

³¹ Apamo lanikana kamma-kamma anne ri passala’ kammaya ngaseng anjo? Punna Narurungangki’ Allata’ala, maka inai akkulle angngewaki’?

³² Manna ana’ KalenNa tena todong Nakadarangi, passangalinna Napassareammi untu’ kaparalluanta ngaseng; maka talaNasareaki’ sikamma kaparalluanta maraenganga?

³³ Maka inai lakkulle antuntukki’ ikatte umma’ le’baka Napile Allata’ala, punna KalenNamo Allata’ala angkana tenamo nisala?

³⁴ Maka lania’ tau ampasalaki’? KalenNa Isa Almasi sallang angngalle-ngalleangki’. KalenNami le’ba’ mate, kammayatompa KalenNami le’ba’ nipattallasa’ poleang ammotere’ battu ri kamateanga siagang nia’mi ri sa’rinNa Allata’ala iamintu ri tampa’ makoasaya.

³⁵ Maka inai lakkulle ampisangkai Almasi angkamaseangki’? Maka akkullei kasusaanga yareka kasukkaranga, yareka passessaya, yareka kacipuranga, yareka kakasi-asianga, yareka bahayaya, yareka kamateanga, ampisangkai Almasi angkamaseangki’?

³⁶ Nia’ tattulisi’ lalang ri Kittaka kana kammaya anne: "Sikabusu’na alloa niaki lalang ri bahaya kamateanga ikambe passabakkang Ikau. Nipare’ sangkamma maki’ gimbala’ eroka nisamballe."

³⁷ Tena! Ba’lalo lalang ri sikammaya ngaseng anjo anggappa maki’ pammetang tojeng-tojenga lanri Ia mangngamaseanga mae ri katte ngaseng!

³⁸ Nasaba’ tappa’ sikalia’ angkanaya ri sikontu linoa, baji’ nakamateang yareka katallassang, baji’ namalaeka’ yareka tu makoasaya, baji’ tuntutang ri kamma-kammaya anne yareka tuntutang labattua sallang, yareka kakoasang maraengannaya;

³⁹ baji’ naapa-apa niaka ri langika yareka naapa-apa niaka ri buttaya, yareka apa-apa mamo maraengannaya, yangasenna anjo takkulleai ampisangkai Allata’ala angkamaseangki’, sangkamma le’bakamo Napappicinikang lalang ri KalenNa Isa Almasi, Batarata.

Roma

Video Roma 8

Ikuti Kami:

KONTAK | PARTISIPASI | DONASI