Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali si’i-si’i tau to samba’a pei i Kerisitu Yesu, to tamo mangaluluka pamporani ndayanya to maja’a, pei jamo mangaluluka pamporani i Nosa Mapasing, tau to etu taa tuwu ewa tau to rahuku.
2 Apa kuasa i Nosa Mapasing to mangawaika kita katuwu room mangalapa kita yako ri kuasa nu dosa pasi yako ri kuasa ngkapate. Kuasa i Nosa Mapasing etu re’e resi kita apa saba kita samba’a pei i Kerisitu.
3 Wali ane ojo yako porenta i Musa, taa kojo tilapa kita yako ri kuasa nu dosa apa pampobuuka ngkita to masae taa nakurang mangaluluka porenta etu. Pei ane i Pue Allah, Ia nakurang mangalapa kita yako ri kuasa nu dosa. Ia mampokau Ana to si Ia ma’i ri lino si’i mawali to lino. Pasi tempo Ia ma’i etu, koro to si Ia sewajuja ewa koro ngkita to madosa. Wali roo see, Ana i mPue Allah rapopate yau mangansompo dosa nto lino. Wali ewa wetu naika i mPue Allah manganangi kuasa nu dosa pasi mangalapa kita to madosa yako ri kuasa nu dosa etu. Wali palaong to taa maya naika mporenta i Musa, palaong etu i Pue Allah semo nangika.
4 Naka pei i Pue Allah mangika ewa wetu see kita takurang mangika palaong to singkonong pei Ia to rapakanasa ri raya mporenta i Musa etu. Kita takurang mangika palaong to etu apa kita tamo mangaluluka pamporani ndaya ngkita to maja’a. Kita jamo mangaluluka pamporani i Nosa Mapasing.
5 Wali tau to ojo mangaluluka pampobuukanya to masae, sira sangkani mampobuuka anu to naporani mpampobuuka to masae etu. Wali sira mangarata kapate. Pei i sema to mangaluluka pamporani i Nosa Mapasing, sira sangkani mampobuuka pamporani i Nosa Mapasing. Wali sira mangarata katuwu pasi masingkatao pei i Pue Allah.
6 (8:5)
7 Wali pampobuuka to masae, pampobuuka to etu bali i mPue Allah apa pampobuuka to etu taa mampolaika porenta i mPue Allah apa taa nakurang.
8 Pasi tau to tiroo ojo mangaluluka pampobuukanya to masae etu, tau etu taa nakurang mampakasanang i Pue Allah.
9 Pei a’i-a’i, komi tamo samba’a pei pampobuukamu to masae, apa Nosa i mPue Allah re’emo maroo-roo ri raya ngkomi. Wali komi samba’a pei Nosa i mPue Allah etu. Pei i sema tau to tare Nosa i ngKerisitu maroo ri rayanya, tau etu si’a i Kerisitu Puenya.
10 Pei kita re’e i Kerisitu ri raya ngkita. Wali nempo koro ngkita damate yau apa saba dosa, pei tonii ngkita tuwu apa i Pue Allah manganto’o kita tare dosanta.
11 Tempo owi i Pue Allah nangawangu muni i Yesu yako ri kapateNya. Ia mangika palaong etu yako ri kuasa i Nosa Mapasing, pasi i Nosa Mapasing etu semo to maroo ri raya ngkita. Wali nempo damate yau koro ngkita, i Pue Allah damangawangu muni seja kita yako ri kapatenta yako ri kuasa i Nosa Mapasing to maroo ri raya ngkita etu.
12 Wali a’i-a’i, si’i-si’i tamo kojo masipato kita mangalulu pampobuuka ngkita to masae.
13 Apa ane kita sangkani mangaluluka pampobuuka ngkita to masae etu, kita matantu damangarata kapate. Pei ane kita mangampake kuasa i Nosa Mapasing mangampobuuka kita ewa tau to matem to roomo raga’a yako ri lengko ngkoronya to maja’a, ane ewa see pampobuuka ngkita, kita datuwu.
14 Apa i sema tau to nakentar i Nosa Mapasing, tau etu ana i mPue Allah.
15 Apa tempo kita mangaya, tempo etu kita mangarata i Nosa Mapasing. Pasi i Nosa Mapasing etu si’a mampapowali kita mawali ewa watua see kita meka resi puenta. Ia mampapowali kita mawali ana i mPue Allah. Wali yako to naika i Nosa Mapasing etu see naka kita maya manganto’oka i Pue Allah, “O Baba, komi semo Pa’angku.”
16 Wali i Nosa Mapasing pasi tonii ngkita sira paka manganto’o kita ana i mPue Allah.
17 Pasi ane kita anaNya, kita seja damangarata tila to danawaika i mPue Allah anaNya. Wali kita damangarata tila etu sindara-ndara pei i Kerisitu. Apa ane kita mangarata kasesa ri lino si’i to ewa kasesa to narata i ngKerisitu, ane ewa see kita damangarata seja kayawa sewaju pei Ia.
18 Wali ane ewa pampobuuka to si aku kasesa to narata ngkita tempo si’i kodi kojo ane rapasewajuka kayawa to danapapokitaka i mPue Allah kita.
19 Apa ri tempo si’i samparia anu to napapowali i mPue Allah mawongko kojo mangampeampeas temponya i Pue Allah damampapokitaka sira kayawa ngkita to anaNya.
20 Apa tempo i Adam mangika dosa tempo owi, tempo etu samparia to napapowali i mPue Allah mawali yau tare batuanginya seja. Si’a anu to rapapowali to mamporani mawali yau tare batuanginya, pei i Pue Allah semo to mangika palaong to etu.
21 Pei anu to rapapowali etu re’e mangansarumaka i Pue Allah damangalapa muni sira yako ri huku etu. Wali tempo daralapa etu, anu to rapapowali tamo re’e to daboo yau. Pasi ewa tau to ana i mPue Allah ralapamo yako ri kuasa nu dosa pei mangarata kayawa, ewa see seja damawali resi anu to rapapowali etu.
22 Wali kita tansani yako ri pamulanya rataka ri tempo si’i samparia anu to napapowali i mPue Allah paka re’e mangarata kasusa pasi sira sakarai seja ewa naika ntau we’a moana.
23 Pei si’a ojo anu to napapowali i mPue Allah etu to sakarai, kita seja. Pei kita room mangarata i Nosa Mapasing wali i Nosa Mapasing semo tondong samparia anu to tiroo danawaika i mPue Allah kita. Wali kita seja sakarai mangampeas temponya i Pue Allah damangalapa koro ngkita yako ri kuasa ngkapate pasi mampaponsanika tau boros kita semo anaNya.
24 Wali tempo si’i kita roomo rapalaes, pei kita tawa mangarata samparia anu to danawaika i mPue Allah kita. Tempo si’i kita owo mangansarumaka damangarata. Wali ane kita owo mansarumaka damangarata, batuanginya kita tawa mangarata, apa tare tau to mansarumaka damangarata anu to re’emo resi ia.
25 Pei ane kita mansarumaka kita damangarata anu to tawa re’e resi kita, ane ewa see kita mansabaraka mangampeas.
26 Wali pansarumakanta etu mangansawang kita. Pasi ewa see seja naika i Nosa Mapasing mangansawang kita ri raya ngkayu’u ndaya ngkita. Apa kita taa tansani ewa wimba taika makai-kai resi i Pue Allah, pei i Nosa Mapasing mamponsaruka kita. Wali Ia semo to mamporata pokai-kai ngkita resi i Pue Allah, pasiwa Ia karai-rai seja manganto’o gombo to taa nakurang nto lino manganto’o.
27 Pasi i Pue Allah, to mamparesa raya ngkita, Ia nansani batuanginya gombo i Nosa Mapasing etu. Apa tempo i Nosa Mapasing mamponsaruka tau to i Pue Allah Puenya Ia mangaluluka pamporani i mPue Allah.
28 Wali i Pue Allah room mampokio kita singkonong pei songkaNya pasi kita mamporayang Ia. Wali see naka nempo kesaa to mawali resi kita i Pue Allah mangansawang see palaong etu mawali bae batuanginya resi kita.
29 Apa yako ri pamulanya i Pue Allah mangansani pasi mamporayang yami tau to damangaya Ia. Pasi tau to Ia mangansani pasi mamporayang yami etu Ia mamponsongkaka yami damawali ewa AnaNya, i Yesu. Wali ewa see nikaNya see i Yesu semo damawali Tukaka ngkita samparia to bae kojo anggaNya.
30 Wali tau to napansongkaka yami i mPue Allah etu, tau etu Ia mampokio. Pasi tau to napokio etu Ia manganto’o tare dosanya. Pasi tau to Ia manganto’o tare dosanya etu Ia mangokotaka damangarata kayawaNya.
31 Wali a’i-a’i, ane kita mampobuuka samparia palaong to naika i mPue Allah etu, kesaa wo’u to kita damanganto’o? Ewa si’i datato’o. Ane i Pue Allah mampasimbalika kita, tare to maya manganangi kita.
32 Apa i Pue Allah sakowa Ana to si Iaja Ia taa manganto’o, “Aku bo’ongKu mangawai.” Pei Ia mangawaika kita AnaNya etu mangkapateka kita samparia. Ia buya rayaNya mangawaika kita AnaNya, wali manasa kojo Ia buya seja rayaNya damangawaika kita samparia anu to yusa.
33 Wali i sema to maya manganto’o kita to napilis i mPue Allah sala? Kamonsonya tare to maya apa i Pue Allah semo to manganto’o kita tare dosanta.
34 Wali i sema to damanganto’o kita masipato rahuku? Bara i Kerisitu? Si’a, apa Ia room mangkapateka kita. Pasi Ia si’a ojo mate yau, Ia seja rawangu muni yako ri kapateNya. Pasi si’i-si’i Ia re’e ri awe i mPue Allah tondo ngkana, ri tampa to bae angganya, pasi Ia mamponsaruka kita.
35 Wali wimba, bara re’e to maya mangaga’a kita yako ri pamporayang i ngKerisitu? Tare to maya mangaga’a kita. Apa nempo kita mangarata kasusa, bara soba, bara kasesa, nempo mangarata oro bara kasiasi, nempo kita naraika nsa’e bara napopate yau nsa’e, nempo ewa wetu i Kerisitu tare pandooNya mamporayang kita.
36 Ane ri lino si’i, kita damangarata kojo kasusa ewa to re’e yami ratulis ri raya ntuntu i mPue Allah tempo owi. Anu to ratulis etu manganto’o, “O Pue, tare pandoonya tau rani mampopate yau kami apa saba kami mangalulu Komi. Pasi kami napobuuka ntau ewa domba to darasimbale yau.” Ewa wetu ratulis ri raya ntuntu i mPue.
37 Pei nempo bara kesaa kasusa to tarata etu, kasusa etu taa manganangi kita. Kita semo to manang. Pasi kita si’a ojo manang, kita seja radugangika karoso ndayanta apa saba yako kuasa i Yesu to mamporayang kita.
38 Wali aku manganto’oka komi kita manang apa aku kunsani kojo tare to maya mangaga’a kita yako ri pamporayang i mPue Allah. Apa nempo kita mate, bara tuwu, Ia tiroo mamporayang kita. Pasi nempo pomakau i mPue Allah bara measa bara anu to yusa to re’e kuasanya, sira taa maya mangaga’a kita yako ri pamporayanginya etu. Pasi anu to mawali resi kita tempo si’i bara ri tempo to darata, anu to etu taa seja maya.
39 Pasi anu to ndate yangi bara ri wawo lino taa seja maya. Wali samparia anu to rapapowali, tare pasi samba’a to maya mangaga’a kita yako ri pamporayang i mPue Allah to re’e resi kita apa saba kita samba’a pei i Kerisitu Yesu, Pue ngkita.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA