Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nekini na luk idi ukum kuan lemulun luk bang Keristus Yésus.
2 Ngaceku ukum Roh luk maré ulun bang Keristus Yésus pangeh nemuit negku ratnan ukum sala' idi até ineh teh.
3 Ukum ineh na miak ngagka' sala', ngaceku pinian burur lemulun luk melaya', iamo' Allah pangeh nengecuk AnakNeh sebuleng dengan ayu lemulun luk mesala' mangun ku baré ngaceku sala' ineh, pad ngukum sala' bang pinian burur.
4 Allah nenganau' ineh, pad anun-anun luk icuk bang Ukum ineh miak uen ngeriput bang burur tau, luk na mulun maya' pinian burur, iamo' maya' pian Roh.
5 Lemulun luk mulun maya' pinian burur ngerawé ratnan tana' ini, iamo' lemulun luk mulun maya' Roh ineh ngerawé ratnan amung-amung luk pian Roh.
6 Ngaceku bua' terawé maya' pinian burur, ieh ineh maté; iamo' bua terawé ratnan Roh, ieh ineh ulun idi awang.
7 Lemulun luk ngerawé maya' pinian burur pebunu' dengan Allah, ngaceku na maya' ukum Allah, idi na tu-tu miak.
8 Lemulun luk maya' pinian burur na miak perurum dengan Allah.
9 Iamo' muyuh ini na maya' pinian burur, iamo' maya' pian Roh, ieh ineh kudeng Roh Allah tudo bang burur muyuh. Kudeng idé-idé luk na inan Roh Keristus bang niatneh, baken ieh pupu Keristus.
10 Iamo' kudeng Keristus tudo bang nemuyuh, sagan pana' burur ineh maté ngaceku sala', iamo' Roh ineh mulun ngaceku muyuh pangeh inau' matu.
11 Iamo' kudeng RohNeh luk nenui Yésus rat arang lun naté ineh tudo bang burur muyuh, idi Ieh ineh luk nenui Keristus Yésus rat arang lun naté ineh miak ngulun burur muyuh luk maté ineh pana', dengan RohNeh luk tudo bang burur muyuh.
12 Ngaceku ineh, O kinanak-kinanakku, tau ini inan baleh baken kuan pinian burur pad mulun maya' pinian burur,
13 ngaceku kudeng muyuh mulun maya' pinian burur, idi muyuh maté teh; iamo' kudeng dengan Roh ineh muyuh ngaté kekamen burur ineh, idi muyuh miak mulun peh.
14 Lemulun luk kiuten Roh Allah, ieh ineh anak-anak Allah.
15 Ngaceku baken muyuh ngalap roh mangun ku demulun tot teh, iamo' muyuh pangeh nengalap Roh Allah mangun ku anak Allah, idi bang Roh ineh tau ngitang, "O Ama'! O Ama'!"
16 Roh Allah ineh maré kali' dengan roh tau, ratnan tau ini anak-anak Allah.
17 Ngaceku tau ini anak-anakNeh, tau miak ngalap babpat luk litep Allah kuan pupuNeh. Idi teh tau ngalap babpat dengan Keristus, kudeng tau perurum medereh denganNeh, pad tau mepad uen ngerayeh denganNeh.
18 Ui ngerawé, idi dereh luk bang kareb ini na miak uen maad dengan rayeh luk uen ngelio kuan tau muci.
19 Dengan rapet luk rayeh amung-amung luk pinudut nganét anak-anak Allah uen ngegala'.
20 Amung-amung luk pinudut ineh na miak ngacing luk ulekneh, baken maya' terawé luk pinudut ineh, iamo' ngaceku pangeh litep Allah. Iamo' inan teh rapet ini,
21 ieh ineh amung-amung luk pinudut ineh miak mepuit ratnan taban luk ngusag, pad semuet bang puit luk rayeh pad-pad dengan anak-anak Allah.
22 Tau kali' idi amung-amung luk pinudut ineh mepad arod, idi mepad kali' mét nenganak macing nekini pana'.
23 Iamo' baken ineh mo', iamo' tau sebuleng luk inan Roh, ieh ineh baré Allah luk pun-pun ineh, ngarod bang niat tau, idi nganét Allah ngalap netau mangun ku anakNeh, pad amung burur tau puatinNeh.
24 Ngaceku ratnan rapet ineh mo' tau pangeh inulun; iamo' kudeng tau miak nier luk inan tau merapet, ineh baken rapet. Ngaceku idéké luk merapet ku luk miak sirenneh?
25 Iamo' kudeng tau merapet inan anun-anun luk na miak siren tau, idi dengan mulai niat tau nganét neneh.
26 Kudeng ineh teh Roh pana' ngedengan laya' tau. Ngaceku na tau kali' luk petulu pituen tau; iamo' Roh ineh sebuleng mutuh ratnan Allah kuan tau dengan arod luk na miak belén peh.
27 Allah luk nier niat lemulun kali' anun-anun luk teruayen Roh ineh, ngaceku Roh ineh mutuh ratnan Allah kuan amung-amung lun manu maya' pianNeh.
28 Tau kali', idi amung-amung kekamen perurum ngacing luk do' kuan lemulun luk mawa inan Allah, ieh ineh kuan lemulun luk tinawar maya' pianNeh.
29 Lun luk pinili' Allah atun, pangeh litepNeh mangun mepad kudeng AnakNeh, pad AnakNeh ineh mangun ku anak luk atun rat arang mula' kinanakNeh.
30 Idi Allah nenawar lemulun luk litepNeh, idi lemulun luk tinawarNeh ineh, ideh inau'Neh matu peh, idi lemulun luk inau'Neh matu ineh, ideh rinayehNeh peh.
31 Ngaceku ineh anunké luk belén tau nekini? Kudeng Allah ngedengan netau, idéké luk miak metueh rat netau?
32 Ngaceku Allah na nengimet AnakNeh sebuleng, iamo' nemaré Neneh ku peruan tau amung-amung, kali' rungen dengan baré ineh Ieh sikal maré anun-anun pana' luk miak barénNeh kuan tau.
33 Idéké miak ngadu' lemulun luk pinili' Allah? Allah sebuleng ngamo nedeh na mesala'.
34 Miakké idé-idé ngesala' nedeh? Keristus Yésus ineh pangeh naté idi muli' mulun teh, idi Ieh pa tinueh Allah. Ieh mutuh ratnan Allah kuan tau.
35 Idéké luk miak matad netau ratnan awa Keristus? Susa'ké, kian dereh lek, kian luk sikal ngedereh lek, kian lau lek, kian luk lubpa lek, kian luk ngesabeng lek, kian pelapet lek?
36 Maya' kudeng luk pangeh inayud, "Ngaceku Iko kai pinaté tebaco-tebaco; kai pidereh mepad kudeng dumba luk kereten."
37 Na, iamo bang amung-amung ini tau meluun tueh ngaceku Ieh luk mawa netau.
38 Ngaceku ui merapet até idi ulun, melaikat idi raca', amung-amung luk inan nekini idi luk sikal macing teh, idi lalud luk dat,
39 lalud luk pa luun, idi lalud luk pa liang, idi anun-anun luk pinudut pana', na miak matad netau ratnan awa Allah luk bang Keristus Yésus Tuhan tau.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA