Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tana'a diaí bidon in hukuman ko'i monia inta nobiag notobatuí i Kristus Yesus.
2 Sin Roho inta nobogoi ing kobiagan ain nopobebas ko'i monimu inta ain notobatuí i Kristus nongkon hukum in dosa bo hukum im popatoi.
3 Onu inta diaí koaíidan in hukum agama, sing kita intau ilo-ilow, yo tua ain inaidan i Allah. Ki Allah ain nonaḷow kong kawasa in dosa nongkon tabiat in intau takin cara nopotabaí mangoi ko'i Adií-Nya tontanií, inta namangoi naí ka'ada'an in intau baradosa, sim momopat kon dosa.
4 Pinomia i Alllah intua simbaí onu inta sinuntut kon hukum agama Yahudi mobaliídon ko'i naton inta diaí nobiag podudui kon ibog in awak, ta'e pinoduduibií kon ibog in Roho i Allah.
5 Intau mita inta nobiag podudui in tabiat intau, umuran morai kon onu inta kino'ibog in awak na'a. Ta'e intau mita inta nobiag podudui ibog in Roho i Allah, umuran morai kon onu inta kino'ibog in Roho i Allah.
6 Aka raian monimu kinawasa'an ibog in awak na'a, daí popatoibií im mo'ulií. Ta'e aka raianmu bo kinawasa'an ibog in Roho i Allah daí mo'uliímubií ing kobiagan bo ikow mobiag motompia takin i Allah.
7 Sin intau inta raiannya kinawasa'an ibog in awak, yo intau tatua mosisaturuanbií i Allah. Sin intau tatua doií dumudui kon hukum i Allah; bo memang sia tua in diaíbií mokomampu dumudui kon hukum i Allah.
8 Intau mita inta nobiag podudui in tabiat intau, diaí mokomampu moposanang kong gina i Allah.
9 Ta'e mo'ikow in diaíbií nobiag podudui ibog in awak na'a, mo'ikow in nobiagbií podudui ibog in Roho i Allah, aka memang Rohodon i Allah in totu-totu'u nongawasa ko'i monimu. Ta'e aka kon intau tatua bo diaí in Roho i Kristus, yo sia tua in de'emanbií kapunya'an i Kristus.
10 Aka ki Kristus bo nobiagdon kom bonu ing gina monimu, daí umpakahbií awakmu matoi lantaran dosa, ta'e Roho i Allah mobogoibií ing kobiagan ko'inimu, sin hubunganmu takin i Allah notompiadon.
11 Bo aka Roho i Allah inta ain nomiag bui ko'i Kristus bo nomiagdon bui kong ginamu, daí Sia inta ain nomiag bui ko'i Kristus tua im momiagbií doman kon awakmu inta diaí mononoi nion. Sia momakeí in Roho-Nya inta nobiag kom bonu ing gina monimu im mogaid kon tua komintan.
12 Manangka intua utat mita, oyuíon in tanggung jawab naton; ta'e de'emanbií tanggung jawab kon ibog in awak na'a. Dona'aidon ing kita dumudui kon ibog in awak na'a.
13 Sin aka mo'ikow bo mobiag dumudui kon ibog in awak na'a, daí matoibií, ta'e aka mo'ikow bo momakeí ing kawasa in Roho i Allah bo umuran monginggamaí kon aid mita inta mokobaradosa, yo mobiagbií im mo'ikow.
14 Intau mita inta kinawasa'an in Roho i Allah, mosia tua ing ki adií mita i Allah.
15 Sin Roho inta inogoi i Allah ko'i monimu, diaíbií mopobalií ko'i monimu ata, sahingga mo'ikow mobiagdon kom bonu im porasa'an mo'ondok. Ta'e Roho i Allah mopobaliíbií ko'i monimu ki adií mita i Allah. Bo takin kawasa in Roho tatua kita komintan monangoi ko'i Allah: "Amaí, oh Amaíku!"
16 Roho i Allah tatua noyotakin in roho naton moguman kong kita na'a ing ki adií mita i Allah.
17 Daí aka kita ki adií mita i Allah, yo kita na'a intaubií mita inta mogogabat-Nya bo inta motarima kom barakat mita inta ain sinadia i Allah ko'i adií-Nya mita. Kita in noyotakin i Kristus motarima kon onu inta ain sinadia i Allah ko'i-Nia; sin aka kita bo mokorasa kon roriga takin i Kristus, yo kita im pomulia'anbií doman moyotakin-Nya.
18 Podudui im pondapatku, bayongan in roriga inta korasa'an naton tana'a makow, diaí tugat poyobandingonmai ing kamulia'an inta poponyata ko'i naton.
19 Bayongan mahaḷuk mogoḷat bo mo'ibogdon totok moko'ontong kon wakutu i Allah moponyata ko'i adií-Nya mita.
20 Sim bayongan mahaḷuk pinomayakdon makow mogoguya'at, de'emanbií lantaran ibognya tontanií, ta'e lantaran pinomayakdon makow i Allah natua. Umpakah natua ta'e oyuíonbií in harapan tana'a:
21 Komintanmai bayongan mahaḷuk pilatan bidon nongkon kawasa inta mokogoguya'at bo potakin dayowon takin adií mita i Allah.
22 Kinota'auanbií naton kon uma'aipabií in na'a bayongan mahaḷuk modaitpabií mogamui kon roriga, naonda bo roriga im bobay kowakutu im mononggadií.
23 Bo de'emanbií tongaí mosia i mogamui, ta'e kitabií doman inta ain notarima kon Roho i Allah. Tua in o'ogoi i Allah inta muna, tongaí kita in umuranpabií doman mogoḷat makow ko'i Allah mopobebas kom bayongan awak naton bo baliíon-Nya ing kita ki adií-Nya mita.
24 Lantaran umuran moharap makow, daí posaḷamatonbií ing kita. Ta'e aka onu inta iharap makow naton tua bo ontongondon naton, daí tua in de'eman bidon harapon. Sin diaíbií in intau moharap makow kon onu inta ain inontongnya makow!
25 Ta'e aka kita moharap makow kon onu inta diaí inontong naton, daí mosabarbií ing kita mogoḷat.
26 Tongaí Roho i Allah mamangoibií motuḷung ko'i naton aka kita molomah. Sin diaíbií kota'auan naton naonda im pososambayang naton. Rohobií tatua im mayak tumayow ko'i Allah bo mopo'igum kom bayongan inta inamuimai naton.
27 Daí ki Allah, inta nonota'au kom bonu ing gina intau, nonota'aubií kom makusud in Roho tatua, sin Roho tatua mopo'igum ko'i Allah sing kopontingan in umat-Nya, bo tua im pinoduduibií kon ibog i Allah.
28 Kinota'auanbií naton kong ki Allahbií in nogator kom bayongan yagi-yagi, sahingga im mokopoaíngoi kon onu inta mopia kon intau mita inta motabi ko'i-Nia bo inta inoinií-Nya podudui in roncana-Nya.
29 Mosia inta aim pinilií i Allah, aindon sinantuí-Nya nongkon pinomangkoianmai simbaí mobalií motombatangan i Adií-Nya ki Yesus Kristus. Sahingga Adií tatua mobalií Adií guya-guyang kon sigad im bayongan utat.
30 Natuadon im pinogogoinií i Allah ko'i monia inta aindon sinantuí-Nya muna. Mosia inta inoinií-Nya tua, inogoi-Nya mopopia'an bui takin-Nya. Mosia inta sinarima-Nya mopopia'an bui takin i Allah, nogamaí kon silai kom bonu ing kobiagan i Allah tontanií.
31 Onu im mota'au naton singogon kon soaáḷ mita tatua? Aka ki Allah bo kon dotaí naton yo ki' ine im mokoḷawang ko'i naton?
32 Ki Adií-Nya tontanií diaídon irekeng-Nyamai, ta'e pinosarakan-Nyadon sing kopontingan naton komintan; yo diaíbií kumaan kon akaḷ aka kita diaí ogoian im bayongan yagi-yagi.
33 Ki ine im mota'au mogugat ko'i naton umat inta pinilií i Allah, aka ki Allah tontanií in nonantuí kong kita in diaíbií kotaḷaí?
34 Oyuíon degaí intau mo'ibog mopotaḷaí ko'i naton? Baing ki Kristus im mobela ko'i naton! Siabií tua inta aim minatoi, ta'e Siabií doman tua inta aim biniag bui nongkon kinopatoian bo aing kon tampat i Allah inta mokawasa.
35 Oyuíon degaí im mokomampu moḷamboi ko'i Kristus aka Sia motabi ko'i naton? Kasusahan, roriga, pomogutuían, malarat, kobiagan momasiking, bahaya ande popatoi, tua mita degaí mokomampu moḷamboi kon tua?
36 Kom bonu im Buk Mosuci pinais nana'a, "Tumongo singgai kami moyogintayow makow im popatoi lantaran Ikow. Kami pinomiadon naonda bo domba inta diaandon sin rata'an."
37 Ta'e kom bayongan tua moko'ulií ing kita kong ka'untungan inta mosompurna nongkon i-Nia inta motabi ko'i naton!
38 Sin aku'oi im moyakinbií totok, kon dunia na'a, popatoi andeka kobiagan, malaekat mita andeka pomarentah mita, inta oyuíondon tana'a makow andeka bain oyuíon kon singgai mo'iduduimai;
39 kawasa mita inta kon ḷangit, ande inta kom butaí, ande bayongan yagi-yagi. Tua komintan diaíbií mobalií ḷabot ko'i Allah kom mobogoi in tabi-Nya ko'i naton, inta naí inta aim pinonyata-Nya pinongin i Yesus Kristus, Tuhan naton.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA