Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Orasẹ̌ ini selaing tawẹ apa pělahukung si sire kụ měbẹ̌biahẹ̌ mạsěmbaụ dingang i Kristus Yesus.
2 U torat'u Rohkẹ̌ u Ruata nakariading kitẹ mẹ̌bẹ̌biahẹ̌ masěmbaụ dingang i Kristus Yesus, seng něliwirẹ̌ si siạ bọu toratẹ̌ kụ nakakoạ dosa ringangu papate.
3 Apang kụ tawe ikakoạ u toratẹ̌ ual᷊ingu i kitẹ kawe taumata lome ute ene seng kinoạ u Mawu Ruata. Mawu Ruata namatạ kawasan dosa su ral᷊ungu lulun taumata rimolohu Ahuse sẹ̌sane, kụ diměnta su ral᷊ungu kakakoạ mẹ̌sul᷊ungu taumata marosa, mẹ̌deạu měndẹ̌dasẹ̌ kal᷊awọu rosa.
4 Mawu Ruata e nẹ̌koạ ene tadeạu kapulun'E ilahẹ su ral᷊ungu torat'u agaman Yahudi ene wotonge ikakoạ su ral᷊ungu watangeng i kitẹ kụ měbẹ̌biahẹ̌ tuhụ Rohkẹ̌ u Ruata kụ bal᷊inewe tụtuhụ lulun taumata.
5 Apan taumata kụ měbẹ̌biahẹ̌ tuhụ lulun taumata e měngkai měmpẹ̌sẹ̌sipiru apang ilẹ̌ěnning u lulun taumata. Kai arawe taumata kụ měbẹ̌biahẹ̌ tuhụ Rohkẹ̌ u Ruata, měngkai měmpẹ̌tẹ̌tiněnnang apang kụ ilẹ̌ěnningu Rohkẹ̌ u Ruata.
6 Kereu tiněnnanu e nipẹ̌kawasaěngu lulun taumata, něnggạe ute papate. Arawe kamageng tiněnnanue nipẹ̌kawasaěngu Rohkẹ̌ u Ruata, pul᷊ise ute pẹ̌bawiahẹ̌, ore lai pẹ̌darame ringangu Ruata.
7 I saing kụ sipirange pẹ̌kẹ̌kawasaěngu lulun taumata, tangú taumata ene kai rụdokạ Duata; ual᷊ingu tau ene tawe mẹ̌tatěngkasẹ̌llung su torat'u Ruata; kụ i sie mamben tawe makakasěllung su torat'u Ruata.
8 Taumata kụ apan mẹ̌bẹ̌biahẹ̌ tuhụ lulun taumata e tawe makaral᷊uasẹ̌ nangu Ruata.
9 Kaiso i kamene tawe nẹ̌biahẹ̌ tuhụ lulun taumata. I kamene nẹ̌biahẹ̌ tuhụ Rohkẹ̌ u Ruata -- kahěnga-hěngang nakoạ tumanggihe su ral᷊ungu watangengu. Taumata kụ tawẹ Rohkẹ̌ i Kristus, tau ene wal᷊inewe tataghuaneng i Kristus.
10 Kai kereu i Kristus biahẹ̌ su ral᷊ung'u watangengu, ute maningbe wadangu sarung mate ual᷊ingu rosa, kaiso Rohkẹ̌ u Ruata měngonggọu pẹ̌bawiahẹ̌ si kamene, watụ u pẹ̌kakauh'u ringangu Ruata e seng mapia.
11 Kereu Rohkẹ̌ u Ruata, kụ němiahẹ̌ si Kristus bọu papate e, wiahẹ̌ bue su ral᷊ungu watangengu e, ute i Sie kụ němiah'i Kristus bọu papate ene, sarung měmiahẹ̌ lai wadangu kụ mẹ̌tate ene. I Sie mẹ̌kẹ̌koạ ene ringangu Rohkẹ̌'E kụ biahẹ̌ su ral᷊ung i kamene.
12 Hakịu ene, manga anạ u sěmbaụ, i kitẹ e kai piạ sasimbang i kitẹ, kai wal᷊inewe waugu lulun taumata, batụu tawe hinone i kitẹ mẹ̌biahẹ̌ tumol᷊e kapulune.
13 Kai kamagengu i kamene měbẹ̌biahẹ̌ tụtuhụ lulun taumata, ute i kamene sarung mate; arawe kamagengbe ringangu kawasan Rohkẹ̌ u Ruata e, i kamene měngkai měmpạmatewe manga kakanoạ i kamene marosa, kụ i kamene sarungbe mẹ̌biahẹ̌.
14 Taumata kụ apạewen lẹ̌ahakeng u Rohkẹ̌ u Ruata e ute manga anạben Duata.
15 U Rohkẹ̌, kụ nionggọu Ruata si kamene e wal᷊inewe mẹ̌deạu i kamene makoạ ěllang hakịu i kamene mẹ̌bẹ̌biahẹ̌ su ral᷊ungu katatakutang. Kaiso Rohkẹ̌ u Ruata e kawe mapakạdiading kamene makoạ manga anạ u Ruata. Kụ dingangu kawasan Rohkẹ̌ u Ruata ene i kitẹ mẹ̌kẹ̌kui Mawu Ruata ene, "Amang, o i Amangku!"
16 Rohkẹ̌ u Ruata e mạhundingangkewen rohkẹ̌ i kitẹ e mẹ̌sẹ̌sahidi u i kitẹ e kai manga anạ u Ruata.
17 Ho! kereu i kitẹ e kawe manga anạ u Ruata, ute i kitẹ mal᷊aing taghuang'E kụ sarung manarimạ u manga al᷊amatẹ̌ kụ nisadian Duata su manga anạe. I kitẹ sarung manarimạ dingangkewen Kristus apạeweng kụ seng nisadian Duata si Sie; u kereu i kitẹ sěngkapẹ̌tatahang dingang i Kristus, i kitẹ e sarung iapakawantugẹ̌ lai ringang'E.
18 Kal᷊awọu sigěsạ kinahombangeng i kitẹ tempo ini, tuhụewe su ěnnaku ute mang tawe ikapẹ̌sasihing dingangu kawawantugẹ̌ kụ sarung ilahẹ si kitẹ.
19 Patikụ alang e měngkate měmpẹ̌kẹ̌kati tempone manga anạ u Ruata e ilahẹ.
20 U alang e seng niwala nipakahupadẹ̌ e, wal᷊inewe ual᷊ingu kapulune sẹ̌sane, kaiso kawe ual᷊ingu Ruata e napakawala kerene. Maning kerene tangu kai piạ l᷊ai ini lẹ̌harapeng:
21 U su tempo sěnsul᷊e alange sarung ipakal᷊iwirẹ̌ bọu kawasa kụ měnggoghahẹ̌ e ringangu sarung ipakal᷊iwirẹ̌ dingang mase ipakawantugẹ̌-sěngkakawantugẹ̌ dingangu manga anạ u Ruata.
22 I kitẹ masingkạ u sarang orasẹ̌ ini patikụ diadikange měngkai rụdal᷊umpasiang kere sěngkatau matimadẹ̌ bawine masunsara su tempom mělẹ̌hěnding.
23 Dingangu wal᷊ine kětạeng patikụ diadikang rụdal᷊umpasiang; kaiso i kitẹewe lai rụdal᷊umpasiang su ral᷊ungu naung i kitẹ. I kitẹ seng něnarimạ Rohkẹ̌ u Ruata nakoạ laonggọu Ruata kahumotongange, kaiso i kitẹ bědang lai mạngampal᷊ẹ̌ Duata mapakal᷊iwir'u watangeng i kitẹ kěbị dingangu mapakariading kitẹ manga anạ'E.
24 Ual᷊ingu pělaharapẹ̌, ute i kitẹ iapakasal᷊amatẹ̌. Kai kereu apang kụ lẹ̌harapeng i kitẹ ene seng kinasilong kitẹ, ute ene sembelain bal᷊ine harapẹ̌. U kai i sai tangu wẹ̌dang mělẹ̌harapẹ̌ sabarang kụ seng nikasilone?
25 Kụ kereu i kitẹ e kai mělẹ̌harapẹ̌ sabarang kụ tawe nikạsilong kitẹ, ute i kitẹ e měmpangampal᷊ẹ̌ be ringangu pẹ̌sasabarẹ̌.
26 Kerene lai Rohkẹ̌ u Ruata e rụděnta lụontol᷊ẹ̌ si kitẹ e kereu i kitẹ lome. Batụu i kitẹ e kai wẹ̌ga měnsang kereapa hinone i kitẹ e mẹ̌kal᷊iomaneng. Rohkẹ̌ ene sẹ̌sane mẹ̌těngon Duata ghụgahiorọ u kạguwạu ral᷊ungu naung baụg'i kitẹ sarangkatewe taikawera.
27 Tangu Ruata e kai masingkạ u ral᷊ungu naung u taumata, makạěnna timonan Rohkẹ̌ e, batụu Rohkẹ̌ e mẹ̌kẹ̌kal᷊iomaneng su Ruata waugu umat'E kụ matuhụ su kapulun Duata.
28 I kitẹ masingkạ u Ruata e mạngatorẹ̌ kal᷊awọu hal᷊ẹ̌, hakịu piạ tẹ̌tal᷊e mapia su taumata kụkěndag'i Sie ringangu kinuiang timuhụ karakin'E.
29 I sire apan kinapilen Mawu Ruata mal᷊aing tinantune rokeng tětạe tadeạu makoạ mẹ̌sul᷊ung dingangu Ahus'E, mangal᷊ene i Yesus Kristus. Ual᷊ingu ene ute Ahus'E ene mariadi kahumotongange sutal᷊oarang lawọ anạ u sěmbaụ.
30 Kerene Mawu Ruata e nẹ̌kui si sire apan seng nitilakeh'E kal᷊imona, kụ i sire kinuiang'E ene niapakakoạ saụ nipẹ̌sěngkapia ringang'E. Kụ i sire apang saụ nipẹ̌sěngkapian Duata e něngal᷊ạe wạgeange su ral᷊ungu pẹ̌bawiah'u Ruata e sẹ̌sane.
31 Apạe ikawerang kitẹ orasẹ̌ ini mạanung kěbị ene? Kereu Mawu Ruata e susěmbẹ̌kang kitẹ ute i sai wue makarokạ si kitẹ?
32 Ahus'E sẹ̌sane tawe nital᷊ěntukang'E kaiso nisarakang'E waụgu pandungang i kitẹ kěbị; lahạu i Sie tawe mangonggọu patikụ sabarang bal᷊ine si kitẹ?
33 I sai wue makapěneheng si kitẹ umatẹ̌ seng pinilen Duata, kereu Ruata sẹ̌sane napakal᷊ahẹu i kitẹ e tawẹ pẹ̌sasal᷊a?
34 Piạ ngae taumata mapulu mapẹ̌sal᷊ang kitẹ e? I Kristus Yesus hẹ̌dowen tumatawang si kitẹ e. I Sie kụ seng napohong, o kawe i Sie lai niapẹ̌bangung kapia wọu papate, kụ ene ringangu Ruata su tampạ makawasa.
35 I sai wue makasahaghe si Kristus kuměndagi kitẹ? Kụ kasasusa e makasahaghe tangu, arau kasasěsẹ arau tatumbiagẹ̌, arau karal᷊unusẹ̌ arau kakasiang arau hombang arau papate?
36 Su ral᷊ungu Winohẹ Susi e kạbawohẹ kere ini, "Kanandung ěllọ e i kami e mẹ̌bẹ̌biahẹ̌ su ral᷊ungu hombang u papate ual᷊ing'i Kau. I kami e nịkakoạ kere rumba tinantu potokang."
37 Tala! Katewe su ral᷊ungu patikụ ene tangu i kitẹ makahombang kal᷊auntung masukụ baugu i Sie kụ kiměndag'i kitẹ!
38 Batụu iạ mạngimang kahěngang u su patikụ dunia, baẹ papate arau walạewe pẹ̌bawiahẹ̌, baẹ malaikatẹ̌ arau walạewe mangangawasa, baẹ manga hombang kạdal᷊enge arau walạewe mangạe hombang su tempo ramahi arau walạewe lai hombang bal᷊ine;
39 baẹbe kakakoạ apa su l᷊angị arau walạewe kakakoạu manga apa su ral᷊ungu ěntana arau apa lai wal᷊ine, kěbị ene tawe makasahaghe Mawu Ruata kuměndag'i kitẹ, kere kụ seng nilahẹ'E su ral᷊ung i Kristus Yesus, Mawung kitẹ.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA